އައިއީޑީ ގޮއްވާލި މީހުންގެ ހުރިހާ ހަރަކާތެއް މާލޭގެ އެކި ސީސީޓީވީތަކުން!
ސީސީޓީވީތަކަށް އެމީހުން ދިޔަ ތަންތަނާއި ހުރިހާ އަމަލެއް ރިކޯޑުވެފައިވޭ
ރައީސް ނަޝީދަށް ދިން ހަމަލާ
ރައްޔިތުންގެ މަޖިލީހުގެ ރައީސް މުހައްމަދު ނަޝީދު ދިރިއުޅުއްވާ ގެކޮޅު ކައިރީ އެއްޗެއް ގޮއްވާލައި އެމަނިކުފާނަށް ނިރުބަވެރި ހަމަލާއެއް ދިނުމަށް އެތަނުގައި އަމަލީގޮތުން ހަރަކާތްތެރިވި މީހުންގެ ހުރިހާ ހަރަކާތެއް މާލޭގެ އެކި ސީސީޓީވީތަކުން ފުލުހުން ހޯދައި އާންމުކޮށްފިއެވެ.
ފުލުހުން އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ވަނީ ރައީސް ނަޝީދަށް ދިން ޓެރަރިސްޓް ހަމަލައިގައި އައިއީޑީ ގޮއްވާލި މީހާ ކަމަށް ތަހުމަތުކުރެވޭ ވ. ތިނަދޫ، ހިޔާ، އަދުހަމް އަހުމަދު ރަޝީދު، އައިއީޑީ ގޮއްވާލުމުގެ ކުރިން ހަރަކާތްތެރި ވެފައިވާ ގޮތާއި އޭގެ ފަހުން އޭނާ އުޅުނު ގޮތުގެ ތަފްސީލީ ވީޑިއޯއެއް އާންމުކޮށްފައެވެ.
ފުލުހުން އެންމެ ފުރަތަމަ ދެއްކި ވީޑިއޯއިން ފެންނަ ގޮތުގައި ގޮއްވާލުމުގެ ކުރިން އޭނާ ހުރީ ނީލޯފަރު މަގުން މަޖީދީ މަގަށް ނިކުންނަ އިރު ކުރިމަތީގައި ހުރި އަތަމާ ޕެލަސް ގޯޅި ތެރޭގައެވެ. އެތަނުގައި ހުރި ފާރެއްގައި ހަމަޖެހިލައި ފައި ވިއްދައިގެން ފޯނަކުން ވާހަކަދައްކަމުންދާ މަންޒަރު އެ ވީޑިއޯއިން ފެނެއެވެ. އަދި ތަކުރާރުކޮށް، ކުރިއަށް ނިކުމެލައި އެ ސަރަހައްދު ބަލަމުން ދެއެވެ.
ރައީސް ނަޝީދު ގެކޮޅުން ނިކުމެވަޑައިގެން ކާރުކޮޅާ ދިމާލަށް ވަޑައިގެންނެވި އިރު އަދުހަމް މަޑުމަޑުން އެ ދިމާ ކުރިމައްޗަށް ނިކުމެ އެތަނުގައި ހުރި ތަނބަކަށް ނިވާވެ ބޮން ގޮއްވާލާ މަންޒަރު ވެސް ވީޑިއޯއިން ފެނެއެވެ. ފުލުހުން ބުނީ އެ ވީޑިއޯ ރަނގަޅަށް ބެލުމުން އޭނާ އަތުގައި އޮތް ރިމޯޓު ވެސް ފެނިފައިވާ ކަމަށާއި، އެތަނުގައި ދެން ތިބި އާންމުންނާއި އޭނާގެ އުޅުމުގައި ތަފާތުތަކެއް ހުރިކަން ފާހަގަވި ކަމަށެވެ. އެގޮތުން އެހެން މީހުން ވަގުތުން އެކަމަށް ރިއެކްޓް ކުރި އިރު، އޭނާގެ އުޅުން ހުރި ގޮތުން އެއީ ކުރިއާލާ އެނގިފައިވާ ކަމެއްކަން ދޭހަވާ ކަމަށް ފުލުހުން ބުންޏެވެ.
ފުލުހުން ބުނީ އެތަނުގައި އޭނާ ހުރި އިރު ފާރުގައި ފައި ވިއްދައިގެން ހުރުމުން އެތަނުގެ ފޫޓްޕްރިންޓު ވެސް ނަގާފައިވާ ކަމަށެވެ. އަދި އޭނާ ހައްޔަރުކޮށް ނެގި ފުޓް ޕްރިންޓާއި ފާރުގެ ޕްރިންޓް ދިމާވާ ކަމަށާއި އެތަނުގައި ހުރީ އަދުހަމް ކަން ޔަގީން ވެފައިވާ ކަމަށެވެ.
މީގެ އިތުރަށް އައިއީޑީ ގޮއްވާލުމަށް ފަހު ދެން އޭނާގެ އަމަލު ހުރި ގޮތުގެ ތަފްސީލީ ވީޑިއޯ ވެސް އާންމުކޮށްފައިވެއެވެ. އެތަނުން ބާރަށް ދުވެފައި ކަނާތަށް ގޮސް، ހެލެނބެލި ގޯޅިން ވަދެގެން ރަށްދެބައި މަގާ ހަމައަށް އޭނާ ދިޔައީ ދުވެފައެވެ. އަދި އެހިސާބުން ހަލުވި ހިނގުމެއްގައި ގޮސް ޗާނދަނީ މަގުން ޖަލާލުއްދީން މިސްކިތުގައި މަޑުކުރި ކަމަށާއި އެތަނުގައި ގިނަ އިރު ނުކޮށް، ނިކުމެގެން އަމީނީ މަގަށް ގޮސް އަމީނީ ބިލްޑިން ކުރިމަތީގައިވާ ޕާކަށް ޕާކަށް ވަދެފައިވާ ކަމަށް ބުންޏެވެ.
އޭނާގެ ބައިވެރިޔާ މުޖާޒުއާ ބައްދަލުވި ކަމަށް ފުލުހުން ބުނަނީ އެ ޕާކުންނެވެ. އެތަނުން ދެމީހުން އެކީ ނިކުމެ ގާކޮށި ތެރެއިން ގޮސް ގަލޮޅު މަދަރުސާ ހުރަސްކޮށް ބޮޑުރަސްގެފާނު މަގުން އަރައިގެން ޖަމާލުއްދީން ސްކޫލް ކައިރީގައި ހުރި ގެސްޓް ހައުސް އަކަށް ވަދެފައިވާ މަންޒަރު ވެސް ފުލުހުންނަށް ސީސީޓީވީ ފުޓޭޖުން ފެނިފައިވާ ކަމަށް ފުލުހުން ބުންޏެވެ.
ނޫސްވެރިންގެ މި ބައްދަލުވުމުގައި ފުލުހުން ވަނީ އެ ހުރިހާ ރޫޓެއް ފެންނަ އެނިމޭޓޭޑް ވީޑިއޯއެއް ދައްކާފައެވެ. ފުލުހުން ބުނީ އެ ހުރިހާ ތަފްސީލެއް ލިބިފައި ވަނީ މާލޭގެ އެ ސަރަހައްދުތަކުގައި ހުރި އަމިއްލަ ސީސީޓީވީ ތަކާއި، ފުލުހުންގެ ސީސީޓީވީތަކުން ކަމަށެވެ.
މި މައްސަލައިގައި ހޮނިހިރު ދުވަހު، މުޖާޒުގެ އިތުރުން ދެން ހައްޔަރު ކުރީ، ގއ. ކޮނޑޭ، ފޮޅޭމާގެ ތަހުމީން އަހުމަދެވެ. މި މައްސަލައިގައި އެންމެ ފަހުން ހައްޔަރު ކުރީ އައިޑީ ގޮއްވާލި އަދުހަމް އަހުމަދެވެ. މި މީހުންގެ މައްޗަށް މިހާރު ވަނީ 15 ދުވަހުގެ ބަންދުގެ މުއްދަތެއް ޖަހާފައެވެ.
