މި މަހު ބޭއްވުމަށް ހަމަޖެހިފައިވާ އޭއެފްސީ ކަޕުގެ މެޗުތައް ރާއްޖޭގައި މި ވަގުތު ނުބޭއްވޭނެކަން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ކުލަބުތަކަށް އަންގައިފިއެވެ.

މީގެ ކުރިން ތާވަލުކޮށްފައި އޮތް ގޮތުން މި މަހުގެ 11 ވަނަ ދުވަހު އޭއެފްސީ ކަޕުގެ ޕްލޭއޮފުގައި ރާއްޖޭގެ ކުލަބު އީގަލްސް އާއި އިންޑިއާގެ ބެންގަލޫރު އެފްސީ ބައްދަލުކުރާނެއެވެ. އަދި އެ މެޗަށްފަހު މުބާރާތުގެ ދެކުނު އޭޝިއާ ގްރޫޕުގެ މެޗުތައް މި މަހުގެ 14 ވަނަ ދުވަހުން ފެށިގެން 21 ވަނަ ދުވަހުގެ ނިޔަލަށް ރާއްޖޭގައި ބޭއްވުމަށް އޮތީ ތާވަލުކޮށްފައެވެ.

އެކަމަކު އޭއެފްސީ ކަޕުގެ މައްސަލަ ހޫނުވީ ޕްލޭއޮފް މެޗުގައި އީގަލްސްއާ ދެކޮޅަށް ކުޅެން މާލެ އައިސްފައިވާ ބެންގަލޫރު ޓީމުން ކޮވިޑް-19 ގެ އުސޫލުތަކާ ޚިލާފުވުމުންނެވެ. ހޮޓެލް ޖެންގައި ބެންގަލޫރު ޓީމު ކޭމްޕްކުރަމުން އަންނައިރު، އެ ޓީމުގެ ކުޅުންތެރިންނަށް ހޮޓަލުންނުކުމެވޭނީ ހަމައެކަނި ތަމްރީނުތަކަށާއި މެޗުތައް ކުޅެން އެކަންޏެވެ. އެކަމަކު ހޮނިހިރު ދުވަހުގެ ހަވީރު މާލޭ މަގުތަކުން އެ ޓީމުގެ ބައެއް ކުޅުންތެރިން ފެނިފައިވާ ކަމަށް ބައެއް މީޑިއާތަކުން ވަނީ ރިޕޯޓުކޮށްފައެވެ. 

ރާއްޖޭގެ އޮންލައިން ނޫސް "އަދަދު" އަށް މައުލޫމާތުދެއްވަމުން އެފްއޭއެމުގެ ޖެނެރަލް ސެކްރެޓަރީ ހުސެއިން ޖަވާޒް (ޖަވާ) ވިދާޅުވީ މި ވަގުތު އޭއެފްސީ ކަޕުގެ މެޗުތައް ރާއްޖޭގައި ހޯސްޓްކުރެވެން ނެތްކަން ކުލަބުތަކަށް އަންގާފައިވާ ކަމަށާއި، ދެން މެޗުތައް ކުރިއަށް ގެންދާނެ ގޮތެއް ކަނޑައަޅާނީ އޭއެފްސީގެ ކޮމިޓީތަކުން ކަމަށެވެ.

ޕްލޭއޮފުން މޮޅުވާ ޓީމަކަށް ގްރޫޕް ސްޓޭޖުގެ ފަހު ޖާގަ ލިބޭއިރު، ގްރޫޕް ސްޓޭޖުގެ ހިމެނެނީ ރާއްޖޭގެ މާޒިޔާ ސްޕޯޓްސް އެންޑް ރެކްރިއޭޝަނާއި، އިންޑިއާގެ މޯހަން ބަގާން އަދި ބަންގްލަދޭޝްގެ ޗެމްޕިއަން ބަޝުންދަރާ ކިންގްސްއެވެ. މީގެ ކުރިން އޭއެފްސީ ކަޕަށް ތައްޔާރުވުމަށް މާޒިޔާ އާއި އީގަލްސްގެ ކުޅުންތެރިން ވަނީ ކޮވިޑަށް ޓެސްޓުކުރުމަށްފަހު ކޭމްޕްކޮށްފައެވެ.

ރާއްޖޭގައި މި ވަގުތު އޭއެފްސީ ކަޕް ނުބޭއްވޭނެކަން އެފްއޭއެމުން އެންގިއިރު، ހޮނިހިރު ދުވަހުގެރޭ ކުރެއްވި ޓްވީޓެއްގައި ކުޅިވަރާ ބެހޭ ވަޒީރު އަޙްމަދު މަޚްލޫފް ވަނީ އުސޫލާ ޚިލާފުވި މައްސަލާގައި ބެންގަލޫރު ޓީމު ވަގުތުން ރާއްޖެ ދޫކޮށް ފުރަން ޖެހޭ ކަމަޑް ވިދާޅުވެފައެވެ. އަދި ރާއްޖޭގައި ޕްލޭއޮފް މެޗު ނުކުޅެވޭނެ ކަމަށާއި، އެއާއެކު އޭއެފްސީ ކަޕުގެ ގްރޫޕް ސްޓޭޖް މެޗުތައްވެސް ފަސްކުރަން އޭއެފްސީއަށް އަލުން ހުށަހަޅާނެ ކަމަށްވެސް ވަޒީރު ވަނީ ވިދާޅުވެފައެވެ.

ބެންގަލޫރުން އުސޫލާ ޚިލާފުވި މައްސަލަ ހޫނުވެފައިވީ ނަމަވެސް، "ގޯލް.ކޮމް" އަށް ދިން އިންޓަވިއުއެއްގައި ބެންގަލޫރުގެ އޮފިޝަލަކު ވަނީ ރާއްޖޭގެ ހެލްތު ޕްރޮޓެކްޝަން އޭޖެންސީ (އެޗްޕީއޭ) އާއި އޭއެފްސީން އެކުލަވާލާފައިވާ އުސޫލުތަކާ އެ ކުލަބުގެ އެއްވެސް ކުޅުންތެރިއަކު ޚިލާފުވިކަން އެނގިފައި ނުވާ ކަމަށް ބުނެފައެވެ.

އެކަމަކު ބެންގަލޫރުގެ ސީއީއޯ ޕާތު ޖިންދާލް އާދީއްތަ ދުވަހު ކުރެއްވި ޓްވީޓެއްގައި ވިދާޅުވީ އެ ކުލަބުގެ ބިދޭސީ ތިން ކުޅުންތެރިންނާއި އޮފިޝަލުންގެ ކިބައިން ފެނުނު، ބަހަނާއެއް ދެއްކެން ނެތް އަމަލަށް ކުލަބުގެ ފަރާތުން މައާފަށް އެދޭ ކަމަށެވެ. އަދި އެ ކުޅުންތެރިންނަށް ހަރުކަށި ފިޔަވަޅު އަޅާނެ ކަމަށްވެސް ވަނީ ވިދާޅުވެފައެވެ.