ކޮވިޑް-19 ޖެހިގެން އިތުރު މީހަކު ނިޔާވެއްޖެ، މިއީ 84 ވަނަ މަރު
ނިޔާވެފައިވަނީ އުމުރުން 51 އަހަރުގެ ދިވެހި އަންހެނެއް
އައިޖީއެމްއެޗް ހޮސްޕިޓަލް
ކޮވިޑް-19 ޖެހިގެން އިތުރު މީހަކު ނިޔާވެއްޖެއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)ން ހާމަކުރިގޮތުގައި އާދިއްތަ ދުވަހުގެ ފަތިހު 04:45 ހާއިރު އައިޖީއެމްއެޗްގެ އިމަރޖެންސީ ރޫމަށް ގެންދެވުނު އުމުރުން 51 އަހަރުގެ ދިވެހި އަންހެނަކު ފަތިހު 05:46ގައި ވަނީ ނިޔާވެފައެވެ. މިއީ ކޮވިޑް ޖެހިގެން ނިޔާވި 84 ވަނަ މީހާ ކަމަށް ބުނެފައިވެއެވެ.
ރާއްޖޭގައި ކޮވިޑް ޖެހިގެން ނިޔާވާ މީހުންގެ އަދަދު އިތުރުވަމުން އަންނައިރު ހުކުރު ދުވަހު ވެސް ހަތަރު މީހަކު ވަނީ ނިޔާވެފައެވެ.
ހުކުރު ދުވަހު ފުރަތަމަ މީހާ ނިޔާވެފައިވަނީ ބުރާސްފަތި ދުވަހުގެ ރޭ ދަންވަރު 03:47 ހާއިރުއެވެ. އެއީ އުމުރުން 60 އަހަރުގެ އިންޑިއާއަށް ނިސްބަތްވާ ފިރިހެނެކެވެ. އޭނާއަކީ ދަރުމަވަންތަ ހޮސްޕިޓަލުގައި އެޑްމިޓްކޮށްގެން ފަރުވާދެމުން ދިޔަ މީހެކެވެ. އޭނާ އެ ބައްޔަށް ޕޮޒިޓިވްވީ އޭޕްރީލް މަހުގެ 28 ވަނަ ދުވަހުއެވެ.
ދެވަނަ މީހާ ނިޔާވީ ހުކުރު ދުވަހުގެ ހެނދުނު 07:50 ހާއިރުއެވެ. އެއީ އުމުރުން 37 އަހަރުގެ ބަންގްލަދޭޝް ފިރިހެނެކެވެ. އޭނާ ނިޔާވީ މާފުށީގައި ކަރަންޓީނުގައި ހުއްޓައެވެ. އެއީ އޭޕްރީލް މަހުގެ 26 ވަނަ ދުވަހު ބައްޔަށް ޕޮޒިޓިވް ވެފައިވާ މީހެކެވެ.
އަދި ހުކުރު ދުވަހުގެ މެންދުރުފަހު 2:46 ހާއިރު އުމުރުން 81 އަހަރުގެ ދިވެހި އަންހެނަކު ނިޔާވެފައިވާއިރު، އެ ރޭ 11:15 ހާއިރު އައިޖީއެމްއެޗްގެ އިމަޖެންސީއަށް ގެނައި އުމުރުން 83 އަހަރުގެ އަންހެނަކު ވެސް ވަނީ ނިޔާވެފައެވެ.
