އޮސްޓްރޭލިއާގެ ފުލުހުންގެ ޓީމު ރާއްޖެ އަތުވެއްޖެ
އޮސްޓްރޭލިއާގެ ޓީމެއް މައްސަލައިގެ ތަހުގީގަށް ރާއްޖެ އަންނަކަން ރައީސް ސާލިހު ވަނީ އިއުލާން ކުރައްވާފައި
ފުލުހުންގެ އޮޕަރޭޝަން
ރައީސް ނަޝީދަށް ދިން ހަމަލާގެ ތަހުގީގުގައި ދިވެހި ފުލުހުންނަށް އެހީވުމަށް އޮސްޓްރޭލިއާގެ މަރުކަޒީ ފުލުހުންގެ ޓީމެއް ރާއްޖެ އައިސްފައިވާ ކަމަށް ކޮމިޝަނާރ އޮފް ޕޮލިސް މުހައްމަދު ހަމީދު ވިދާޅުވެއްޖެއެވެ.
ފުލުހުން ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމުގައި، ކޮމިޝަނާރ އޮފް ޕޮލިސް މުހައްމަދު ހަމީދު ވިދާޅުވީ އޮސްޓްރޭލިއަން ފެޑެރަލް ޕޮލިސްގެ ތަހުގީގު ޓީމު މިހާރު ރާއްޖެ އައިސްފައިވާ ކަމަށެވެ. އެ ޓީމު ރާއްޖެ އައީ ހޮނިހިރު ދުވަހު ހެނދުނު ކަމަށާއި، ތަހުގީގުގައި އެހީތެރިކަން ފޯރުކޮށްދެމުން އަންނަ ކަމަށް ވިދާޅުވިއެވެ.
އޮސްޓްރޭލިއާގެ ޓީމެއް މި މައްސަލައިގެ ތަހުގީގަށް ރާއްޖެ އަންނަކަން ރައީސް ސާލިހު ވަނީ ހާދިސާ ހިނގި ރޭ އިއުލާން ކުރައްވާފައެވެ. އޭރުން ފެށިގެން ކްރައިމް ސީން ބަންދުކޮށް ފުލުހުން އެތަނުގައި ހަރަކާތްތެރިވަމުން އަންނައިރު ތަހުގީގުގައި މިހާތަނަށް ދެމީހަކު ވަނީ ހައްޔަރުކޮށްފައެވެ. އަދި އިތުރު މީހެއްގެ އައިޑެންޓިޓީ ދެނެގަތުމަށް އާންމުންގެ އެހީއަށް ވެސް ވަނީ އެދިފައެވެ.
