ދެކުނު އޭޝިއާ ސަރަހައްދުން ވާރކް ޕާރމިޓް ހޯލްޑަރުން އެތެރެވުން ހުއްޓާލުމަށް އަންގައިފި
8 މެއި 2021 | ހޮނިހިރު 14:21ދެކުނު އޭޝިއާ ސަރަހައްދުން އަންނަ ފަތުރުވެރިން ވެސް މީހުން ދިރިއުޅޭ ރަށްރަށަށް ދަތުރު ކުރުން ހުއްޓާލުމަށް އަންގާފައިވޭ
ވެލާނާ އިންޓަނޭޝަނަލް އެއާޕޯޓް
ދެކުނު އޭޝިއާގެ ގައުމުތަކާއި ސަރަހައްދުތަކުން ވާރކް ޕާރމިޓް ހޯލްޑަރުން ދިވެހިރާއްޖެއަށް އެތެރެވުން ހުއްޓައިލުމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ)ން އަންގައިފިއެވެ.
ހޮނިހިރު ދުވަހު އެޗްޕީއޭއިން ކޮށްފައިވާ އިއުލާނެއްގައި ބުނީ ދިވެހިރާއްޖޭގައި ކޮވިޑް-19 ފެތުރުން ކޮންޓްރޯލްކޮށް، އާންމު ރައްޔިތުންގެ ސިއްހަތާއި ރައްކާތެރިކަމަށްޓަކައި، އާންމު ސިއްހަތު ރައްކާތެރިކުރުމުގެ ގާނޫނުގެ ދަށުން އަޅަންޖެހޭ ފިޔަވަޅުތައް އެޅުމަށް މަގުފަހިކުރުމުގެ ގޮތުން، ޑިރެކްޓަރ ޖެނެރަލް އޮފް ޕަބްލިކް ހެލްތަށް ލިބިދޭ ބާރުގެ ދަށުން، މި ފިޔަވަޅު އެޅުމަށް ނިންމާފައިވާ ކަމަށެވެ.
މީގެ އިތުރުން ދެކުނު އޭޝިއާގެ ގައުމުތަކާއި ސަރަހައްދުތަކުން ރާއްޖެއަށް އަންނަ ފަތުރުވެރިން، މީހުން ދިރިއުޅޭ ރަށްރަށަށް ދަތުރު ކުރުން ހުއްޓާލުމަށް ވެސް ވަނީ އަންގާފައެވެ. އެ ސަރަހައްދުގެ ގައުމުތަކުގައި ކޮވިޑް ހަލުވިކަމާއެކު ފެތުރެމުން އަންނައިރު ރާއްޖޭގައި ވެސް މި ބަލި އަންނަނީ ހަލުވި ކަމާއެކު ފެތުރެމުންނެވެ.
އެގޮތުން ދުވާލެއްގެ މައްޗަށް ރިޕޯޓު ކުރެވޭ ކޭސްތަކުގެ އަދަދު މަތިވެ، އެ އަދަދު ވަނީ 700 ފަހަނައަޅައި ގޮސްފައެވެ. ފާއިތުވި 24 ގަޑިއިރު ތެރޭގައި ރާއްޖެއިން 766 މީހުން ކޮވިޑަށް ޕޮޒިޓިވްވެފައިވާއިރު ރާއްޖެއިން ޕޮޒިޓިވްވި މީހުންގެ ޖުމްލަ އަދަދު މިހާރު ވަނީ 34،134ށް އަރާފައެވެ. އަދި އެކްޓިވް ކޭސްތަކުގެ އަދަދު 8261ށް އަރާފައިވާއިރު ހޮސްޕިޓަލްގައި އެޑްމިޓްކޮށްގެން 205 މީހަކަށް އަންނަނީ ފަރުވާ ދެމުންނެވެ.
ރާއްޖޭގައި ކޮވިޑުގެ ހާލަތު ގޯސްވަމުން އަންނައިރު މިހާރު ވަނީ ބައެއް ފިޔަވަޅުތައް ވަރުގަދަކޮށްފައެވެ. އަދި ރާއްޖޭގައި ކޮވިޑުގެ އަދަދުތައް އިންތިހާއަށް މަތިވަމުން ދާތީ ރައީސުލްޖުމްހޫރިއްޔާ އިބްރާހިމް މުހައްމަދު ސާލިހް ވަނީ ކަންބޮޑުވުން ފާޅުކުރައްވާފައެވެ. މި ބަލިން ރައްކާތެރިވުމުގެ ގޮތުން އަޅާފައިވާ ފިޔަވަޅުތަކަށް ޚާއްސަ ސަމާލުކަމެއް ދެއްވުމަށް އެމަނިކުފާނު ވަނީ އިލްތިމާސް ކުރައްވާފައެވެ.
