ބުރާސްފަތި ދުވަހުގެ ރޭ އިރާކޮޅު ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ހަމަލާއާ ގުޅިގެން ހައްޔަރު ކޮށްފައިވާ ދެމީހުންގެ ވަނަވަރު، ފުލުހުން އާއްމު ކޮށްފިއެވެ.
ފުލުހުން ބުނީ މި ދެމީހުންނަކީ ވެސް މި މައްސަލައިގައި ތުހުމަތު ކުރެވޭ ދެމީހުން ކަމަށެވެ. އަދި މި ދެމީހުންނަކީ ވެސް އެކިއެކި ކުށުގެ ރިކޯޑުތައް އޮންނަ މީހުން ކަމަށް ފުލުހުން ވަނީ ހާމަ ކޮށްފައެވެ.
މި މައްސަލައާއި ގުޅިގެން ހައްޔަރުކޮށްފައިވަނީ 21 އަހަރުގެ މުޖާޒް އަހުމަދު، މއ. ފޭރުގެ، އާއި ގއ. ކޮނޑޭއަށް އުފަން 32 އަހަރުގެ ތަހުމީން އަހުމަދެވެ. ތަހުމީން އަހުމަދަކީ އައިއީޑީ ހަރުކުރެވިފައިވާ ސައިކަލުގެ ވެރިފަރާތް ކަމަށް ފުލުހުން ބުނެއެވެ.
ތަހުގީގަށް ހައްޔަރުކުރި ދެ މީހުންނަކީ ވެސް ހަރުކަށި ފިކުރާ ގުޅުން ހުރި މީހުން ކަމަށް ފުލުހުން ބުނެއެވެ.
