ޗެމްޕިއަންސް ލީގުގެ ފައިނަލް މެޗު އިންގްލެންޑަށް ބަދަލުކުރަނީ؟

ތުރުކީގެ އިސްތަންބޫލުގައި ކުޅެން ހަމަޖެހިފައިވާ ޔުއެފާ ޗެމްޕިއަންސް ލީގުގެ ފައިނަލް މެޗު އިންގްލެންޑަށް ބަދަލުކުރަން މަޝްވަރާކުރަމުން އަންނަ ކަމަށް ރިޕޯޓުތައް ބުނެފިއެވެ.

މިދިޔަ އަހަރުގެ ޗެމްޕިއަންސް ލީގުގެ ފައިނަލުވެސް އެންމެ ފުރަތަމަ ކުޅެން ހަމަޖެއްސީ އިސްތަންބޫލުގައެވެ. އެކަމަކު އޭރު ކޮވިޑް-19 ގެ ހާލަތު މުޅި ދުނިޔޭގައިވެސް ވަރަށް ބޮޑަށް ގޯސްކޮށް އޮތުމުން، މިދިޔަ ސީޒަނުގެ ޗެމްޕިއަންސް ލީގުގެ ކުއާޓާ ފައިނަލާ ހަމައިން ފަށައިގެން މެޗުތައް ކުޅެފައިވަނީ ސެންޓްރަލައިޒްކޮށްގެން ޕޯޗުގަލުގެ ލިޒްބަންގައެވެ.

އެއާއެކު މި ސީޒަނުގެ ފައިނަލް މެޗު އިސްތަންބޫލުގައި ކުޅެން ޔުއެފާއިން ނިންމި ނަމަވެސް، އިސްތަންބޫލުގައި ކޮވިޑުގެ ހާލަތު ދާދި ފަހުން ވަނީ ގޯސްވެފައެވެ. އެގޮތުން މީގެ ހަފުތާއެއްހާ ދުވަސް ކުރިން ޔޫރަޕުގައި އެންމެ ބޮޑަށް ކޮވިޑް ފެތުރޭ ގައުމަކަށް ތުރުކީ ވުމާއެކު، އެ ގައުމުގެ ސަރުކާރުން ވަނީ ފުލް ލޮކްޑައުނަކަށް ގޮސްފައެވެ.

އެއާއެކު އިނގިރޭސިވިލާތުގެ ސަރުކާރުން ވަނީ ފައިނަލް މެޗު ބެލުމަށް ތުރުކީއަށް ނުދިޔުމަށް އެ ގައުމުގެ ސަޕޯޓަރުންގެ ކިބައިން އެދިފައެވެ. މި މަހު 29 ވަނަ ދުވަހު ކުޅޭ ފައިނަލުގައި ވާދަކުރަން އޮތީ އިންގްލެންޑުގެ ދެ ޓީމު ކަމަށްވާ މެންޗެސްޓާ ސިޓީ އާއި ޗެލްސީއެވެ. ޗެމްޕިއަންސް ލީގުގެ ފައިނަލަށް ކޮންމެވެސް ވަރަކަށް ސަޕޯޓަރުން ވައްދަން ޔުއެފާއިން ނިންމާފައިވާއިރު، ހަމައެކަނި އިންގްލެންޑުންވެސް 8،000 ސަޕޯޓަރުން ދާގޮތަށް މީގެ ކުރިން ވަނީ ހަމަޖެހިފައެވެ.

ރިޕޯޓުތައް ބުނާ ގޮތުން ޗެމްޕިއަންސް ލީގުގެ ފައިނަލުގައި އިނގިރޭސި ދެ ޓީމު ވާދަކުރާތީ، އެ ގައުމުގެ ސަރުކާރުން އަންނަނީ އެ މެޗު އިންގްލެންޑުގައި ކުޅެން މަސައްކަތްކުރަމުންނެވެ. މިހާރު އެ މެޗު ކުޅުން އެންމެ ގާތީ އިންގްލެންޑުގެ ވެމްބްލީ ސްޓޭޑިއަމުގައި ކަމަށްވެސް ރިޕޯޓުތައް ބުނެއެވެ. އެކަމަކު ދާދި ފަހުން އިންގްލެންޑުގެ އެސްޓަން ވިލާއިން ވަނީ އެ މެޗު، އެ ޓީމުގެ ދަނޑުގައި ހޯސްޓްކުރުމުގެ ޝައުގުވެރިކަން ހުރި ކަމަށް ބުނެފައެވެ.

މި ފަހަރުގެ ޗެމްޕިއަންސް ލީގުގެ ފައިނަލުގައި ސިޓީ އާއި ޗެލްސީ ބައްދަލުކުރާއިރު، މުބާރާތުގެ ފައިނަލަށް ސިޓީ ދަތުރުކުރީ ސެމީ ފައިނަލުން ޕީއެސްޖީ ކަޓުވާލުމަށްފަހުއެވެ. އަދި މުބާރާތުގެ ފައިނަލަށް ޗެލްސީ ދަތުރުކުރީ ސެމީން މި މުބާރާތުގެ އެންމެ ކާމިޔާބު ޓީމު ކަމަށްވާ ރެއާލް މެޑްރިޑް ކަޓުވާލުމަށްފަހުއެވެ.