ހަމަލާއާ ގުޅޭ މައުލޫމާތާއި ފޮޓޯ އޮންލައިންކޮށް ހިއްސާ ކުރެވޭނެ
ފުލުހުން ދީފައިވާ ލިންކު ބޭނުން ކޮށްގެން ހިއްސާ ކުރެވޭނެ
ރައީސް ނަޝީދަށް އަމާޒުކޮށް ދިން ނިރުބަވެރި ޙަމަލާއާ ގުޅިގެން ފުލުހުން ހަރަކާތްތެރިވަނީ
ބުރާސްފަތި ދުވަހުގެ ރޭ އިރާކޮޅު ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ހަމަލާއާ ގުޅޭ ވީޑިއޯއާއި ފޮޓޯ އޮންލައިންކޮށް ހިއްސާ ކުރެވޭނެކަމަށް ފުލުހުން ބުނެފިއެވެ.
ފުލުހުން ކުރި ޓްވީޓެއްގައި ބުނީ، މެއި 6 ވަނަ ދުވަހު ދީފައިވާ ޓެރަރިސްޓް ހަމަލާއާ ގުޅޭ މައުލޫމާތާއި ފޮޓޯއާއި ވީޑިއޯ ފުލުހުން ދީފައިވާލިންކުބޭނުން ކޮށްގެން ހިއްސާ ކުރެވޭނެ ކަމަށެވެ.
ފުލުހުން ވަނީ މި މައުލޫމާތު ހިއްސާ ކުރާ ފަރާތްތަކާއި ހިއްސާކުރާ މައުލޫމާތުގެ ސިއްރުކަން ހިފަހައްޓާނެކަމުގެ ޔަގީންކަން ދީފައެވެ. އަދި ފުލުހުންގެ ހޮޓްލައިން ނަންބަރު 9704000ށް ގުޅައި މައުލޫމާތު ހިއްސާ ކުރެވޭނެ ކަމަށްވެސް ބުނެފައިވެއެވެ.
ބުރާސްފަތި ދުވަހުގެ ރޭ ރައީސް ނަޝީދަށް އަމާޒުކޮށް ދިން ހަމަލާގައި އެމަނިކުފާނަށް ލިބިވަޑައިގެންނެވި ޒަޚަމްތަކަށް ފަރުވާ ހޯއްދަވަމުން ގެންދަވަނީ އޭޑީކޭ ހޮސްޕިޓަލްގައެވެ. އައިއީޑީއެއް ގޮއްވާލުމުން ބުރަބުރައިގެން ދިޔަ ތޫނު ގިނަ އެތިއެތިކޮޅު އެމަނިކުފާނުގެ ހަށިކޮޅަށް ހެރިފައިވާތީ އެ ތަކެތި ނެގުމަށް ގިނަ އޮޕަރޭޝަންތަކެއް ކުރި އިރު އެކަމަށް 16 ގަޑިއިރަށް ވުރެ ގިނަ ވަގުތު ހޭދަވިއެވެ.
މިހަމަލާ އާ ގުޅިގެން 4 މީހަކު ފާހަގަކުރެވިފައިވާކަމަށް ފުލުހުން ވަނީ ބުނެފައެވެ. ނަމަވެސް މިހާތަނަށް އައިއިރު އެއްވެސް މީހަކު ހައްޔަރުކޮށްފައެއް ނުވެއެވެ.
