ހަމަލާދިން މީހުން ހޯދުމަށް އެންމެންގެ އެހީ ބޭނުންވޭ - މާރިޔާ
7 މެއި 2021 | ހުކުރު 17:52ރައީސް ނަޝީދުގެ ބޮޑީގާޑުން ކުރި މަސައްކަތަށް ޝުކުރު ހައްގުކަމަށް ވިދާޅުވި
މިނިސްޓަރ އޮފް ޑިފެންސް މާރިޔާ އަހުމަދު ދީދީ
ބުރާސްފަތި ދުވަހުގެ ރޭ ކުރީގެ ރައީސް އަދި މަޖިލީހުގެ ރައީސް މުހައްމަދު ނަޝީދަށް ހަމަލާ ދިން މީހުން ހޯދުމަށް އެންމެން އެކުގައި މަސައްކަތް ކޮށްދިނުމަށް މިނިސްޓަރ އޮފް ޑިފެންސް މާރިޔާ އަހުމަދު ދީދީ ގޮވާލައްވައިފިއެވެ.
މި ހާދިސާއާއި ގުޅިގެން ސަލާމަތީ ބާރުތަކުން ކުރަމުންދާ މަސައްކަތްތަކާއި ގުޅޭގޮތުން ވާހަކަފުޅު ދައްކަވަމުން ޑިފެންސް މިނިސްޓަރ ވަނީ މި ހަމަލާ ހަރުކަށި އިބާރާތުން ކުށްވެރި ކުރައްވާފައެވެ. ރައީސް ނަޝީދަކީ ދިވެހި ރައްޔިތުންގެ ލޯބި ލިބިފައިވާ ބޭފުޅެއްކަމުން މި ހާދިސާގެ ސަބަބުން ގިނަ ރައްޔިތުންނަތަކެއް ނުތަނަވަސްކަމެއްގެ ތެރެއަށް ވެއްޓިފައިވާކަމަށް މިނިސްޓަރ ވިދާޅުވިއެވެ.
މި ހާދިސާގެ ސަބަބުން މިފަދަ ނުރައްކާ ރާއްޖޭގައި އޮތްކަން ހާމަވެ މިކަހަލަ ކަމެއް ކޮންމެ މީހަކަށްވެސް ކުރަމަތި ވެދާނެކަމަށް ބަލައި ސަމާލުކަން އިތުރު ކުރަންޖެހޭކަމަށް މިނިސްޓަރ ވިދާޅުވިއެވެ. މި ސަބަބަށްޓަކައި މިފަދަކަމެއް ކުރާކަމުގެ އެއްވެސް މަޢުލޫމާތެއް ލިބިފައިވާނަމަ އެކަން ސަލާމަތީ ފަރާތްތަކަށް އަދި ވަކިން ޚާއްސަކޮށް ކައުންޓަރ ޓެރަރިޒަމް ޔުނިޓްގެ ނަންމަބަރު 1615އަށް މައުލޫމާތު ދިނުމަށް ވަނީ އެދިވަޑައިގެންފައެވެ. ކިތަންމެ ކުޑަކަމެއް މިގޮތަށް ފާހަގަކުރެވުނަސް އެކަން އެންގުމަކީ މިފަދަ ނިރުބަވެރި އަމަލުތައް ހުއްޓުވުމަށް އެޅޭނެ ބާރެއްކަމަށް ވިދާޅުވިއެވެ.
މިނިސްޓަރ މާރިޔާ ވަނީ މަޖިލީހުގެ ރައީސަށް ހަމަލާ ދިން މީހުން ހޯދުމަށް ސަލާމަތީ އިދާރާތަކާއި ފުލުހުންނައި އާންމުން ހިމެނޭހެން އެންމެ އެކުގައި މަސައްކަތް ކޮށްދިނުމަށް ގޮވާލައްވާފައެވެ. މީގެއިތުރުން މިނިސްޓަރ މާރިޔާ ވަނީ ހަމަލާ ދިން މީހުން ހޯދައި އިންސާފުގެ ކުރިމައްޗަށް ގެންނާނެކަމުގެ ޔަގީންކަން އަރުވާފައެވެ. އަދި ދިވެހިން ބިރުވެރިކަމުގެ ތެރޭގައި ނުބޭތިއްބޭނެކަމަށް ވެސް ވިދާޅުވިއެވެ.
މިނިސްޓަރ މާރިޔާ ވަނީ މިހާދިސާގައި ރައީސް ނަޝީދުގެ ބޮޑީގާޑުންގެ ގޮތުގައި ތިބި ސިފައިން އަމަލުކޮށްފައިވާ ގޮތަށް ތައުރީފު ކުރައްވާފައެވެ. އެގޮތުން އެ މީހުންނަށްވެސް އެކިކަހަލަ އަނިޔާވެފައިވާ ދަނޑިވަޅެއްގައި ކުޑަ ވަގުތުކޮޅެއްގެ ތެރޭގައި ރައީސް ނަޝީދު އޭޑީކޭ ހޮސްޕިޓަލަށް ގެންދިޔަ ގެންދިއުމަށް ވަނީ ތައުރީފުކުރައްވާފައެވެ.
