ސީސީޓީވީގެ ނިޒާމު މާލޭސިޓީގައި ގާއިމުކުރާނެ
ރައީސް ނަޝީދަށް އަމާޒުކޮށް ދިން ނިރުބަވެރި ޙަމަލާއާ ގުޅިގެން ފުލުހުން ޙަރަކާތްތެރިވަނީ
މާލޭގައި ދިރިއުޅޭ ރައްޔިތުންނަށް އަމާންކަމާއި ރައްކާތެރިކަން ކަށަވަރުކޮށްދިނުމުގެ ގޮތުން ކުރިއަށް އޮތްތަނުގައި ގިނަ މަސައްކަތްތަކެއް ކުރާނެ ކަމަށް އިންތިޚާބީ މޭޔަރު ޑރ. މުހައްމަދު މުއިއްޒު ވިދާޅުވެއްޖެއެވެ.
ރާއްޖެޓީވީގެ ލައިވް ކަވަރޭޖަށް ދެއްވި ޚާއްސަ އިންޓަވިއުގައި ޑރ. މުއިއްޒު ވިދާޅުވީ މާލޭގައި ދިރިއުޅޭ ރައްޔިތުންނަށް ރައްކާތެރިކަން ކަށަވަރުކޮށްދޭން ޖެހޭ ކަމަށާއި، ކުރިއަށް އޮތްތަނުގައި ސިޓީ ކައުންސިލުން ފުލުހުންނާ ގުޅިގެން ވަރަށް ބޮޑު މަސައްކަތްތަކެއް ކުރާނެ ކަމަށެވެ.
އެގޮތުން އެންމެނަށް ވެސް ރައްކާތެރިކަން ކަށަވަރުކުރެވޭ ގޮތަށް ސީސީޓީވީގެ ނިޒާމު މާލޭސިޓީގައި ގާއިމުކުރާނެ ކަމަށް ޑރ. މުއިއްޒު ވިދާޅުވިއެވެ. އަދި ވިދާޅުވީ ބޮޑު ކުށެއް ކުރާއިރު، ނުވަތަ މީހަކަށް ބޮޑު އަނިޔާއެއް ދޭއިރު އެކަން ކުރާ މީހަކު ހޯދުމަކީ ދަތިކަމެއް ކަމަށާއި، މިހާރު ދިމާވާ އެންމެ ބޮޑު މައްސަލައަކީ އެއީ ކަމަށެވެ. ނަމަވެސް ސީސީޓީވީގެ ނިޒާމާއެކު އެހަމަލާއެއް ދީނީ ކާކު ނޭނގިގެން އުޅެން ނުޖެހޭނެ ކަމަށް ޑރ. މުއިއްޒު ވިދާޅުވިއެވެ.
ރައީސް މުހައްމަދު ނަޝީދަށް އަމާޒުކޮށް ދިން ހަމަލާއަށް އަލިއަޅުއްވާލައްވާ ޑރ. މުއިއްޒު ވިދާޅުވީ މިފަދަ ނުރައްކާތެރި ހިތާވެރި ދަނޑިވަޅުގައި އެންމެން އެކުގައި ގުޅިގެން މަސައްކަތް ކުރަން ޖެހޭ ކަމަށާއި، މިފަދަ ހާލަތުގައި ސިޔާސީ ފިކުރާ ދުރަށްދާން ޖެހޭ ކަަމަށެވެ. މިއަމަލު ކުށްވެރި ކުރައްވައި އަވަހަށް އިންސާފު ގާއިމުކޮށްދިނުމަށް ވެސް ޑރ. މުއިއްޒު ވަނީ ގޮވާލައްވާފައެވެ.
