ޖެންޑަރ މިނިސްޓްރީގެ ނާއިބާއި ސްޓޭޓް މިނިސްޓަރު ވެސް ހެލްތަށް
5 މެއި 2021 | ބުދަ 10:06އައިޝަތު ރަޝީދާއި ޝަކޫރު މީގެ ކުރިން ތިއްބެވީ ޖެންޑަރ މިނިސްޓްރީގައި
އައިޝަތު ރަޝީދާއި އަބްދުއްޝުކޫރު އަބްދުލްހަކީމް
މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސްގެ ނާއިބާއި ސްޓޭޓް މިނިސްޓަރު ވެސް މިނިސްޓްރީ އޮފް ހެލްތަށް ބަދަލު ކުރައްވައިފިއެވެ.
ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވަނީ މިނިސްޓަރ އޮފް ސްޓޭޓް ފޮރ ހެލްތުގެ މަގާމަށް އައިޝަތު ރަޝީދު އަދި މިނިސްޓަރ އޮފް ހެލްތުގެ ނާއިބުގެ މަގާމަށް އަބްދުއްޝުކޫރު އަބްދުލްހަކީމް އައްޔަން ކުރައްވާފައެވެ.
އައިޝަތު ރަޝީދު ކުރިން ހުންނެވީ މިނިސްޓަރ އޮފް ސްޓޭޓް ފޮރ ޖެންޑަރ، ފެމިލީ އެންޑް ސޯޝަލް ސަރވިސަސްގެ މަގާމުގައެވެ. އަދި އަބްދުއްޝުކޫރު އަބްދުލްހަކީމް ހުންނެވީ މިނިސްޓަރ އޮފް ޖެންޑަރ، ފެމިލީ އެންޑް ސޯޝަލް ސަރވިސަސްގެ ނާއިބުގެ މަގާމުގައެވެ.
މިނިސްޓްރީތަކަށް ގެނެވުނު މި ބަދަލުތަކުގެ އިތުރުން ރައީސް ވަނީ ކެބިނެޓަށް ވެސް ބޮޑެތި ބަދަލުތަކެއް ގެންނަވާފައެވެ. އެގޮތުން މިނިސްޓަރ އޮފް ފިޝަރީޒް މެރިން ރިސޯސަސް އެންޑް އެގަރިކަލްޗަރ ގެ މަގާމަށް ޑރ ހުސައިން ރަޝީދު ހަސަން އައްޔަން ކުރައްވާފައިވާއިރު އެންވައިރަންމެންޓާއި ޓެކްނޮލޮޖީ އެއްކޮށްލައި މިނިސްޓަރުކަމަށް އައިމިނަތު ޝައުނާ ވަނީ އައްޔަން ކުރައްވާފައެވެ.
މިއާއެކު މިނިސްޓްރީ އޮފް ކޮމިޔުނިކޭޝަން، ސައެންސް އެންޑް ޓެކްނޯލޮޖީ ވަކި މިނިސްޓްރީއެއްގެ ގޮތުގައި އުވިގެން ދިޔައީއެވެ. އެ މިނިސްޓްރީގެ މުވައްޒަފުންނާއި މަސައްކަތްތައް އެންވައިރަންމެންޓް މިނިސްޓްރީގެ ދަށަށް ބަދަލުކޮށް މިނިސްޓްރީގެ ނަން މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޮލޮޖީއަށް ރައީސުލްޖުމްހޫރިއްޔާ ވަނީ ބަދަލުކުރައްވާފައެވެ.
