ކޮވިޑް 19 ގެ ބަލިމަޑުކަން ފެތުރުނަ ނުދިނުމަށް އަޅާ ފިޔަވަޅުތަކުގެ ތެރެއިން މޮނިޓަރިންގެ ހާލަތަށް ގެނެވުނު ރަށްރަށުގެ އަދަދު 27 އަށް އަރައިފިއެވެ.

ހެލްތު ޕްރޮޓެކްޝަން އޭޖެންސީ ( އެޗްޕީއޭ ) އިން އެންމެފަހުން ހިއްސާކޮށްފައިވާ މައުލޫމާތަށް ބަލާއިރު މެއި މަސް ފެށުނު ފަހުން އަށް ރަށެއް މޮނިޓަރިންއަށް ލާފައިވެއެވެ. ބުދަދުވަހު ވެސް ރަށެއް މޮނިޓަރިންގެ ހާލަތަށް ގެނެސްފައިވެއެވެ. އެންމެ ފަހުން މޮނިޓަރިންގެ ހާލަތަށް ގެނެވިފައިވަނީ ފ.ނިލަންދޫއެވެ. މި މަހު މޮނިޓަރިންގެ ހާލަތަށް ގެނެވުނު އިތުރު ރަށްރަށަކީ، އައްޑޫސިޓީ، އދ.ދަނގެތި، ހއ.ދިއްދޫ، ފ.ފީއަލި، ހދ. ކުޅުދުއްފުށި، އއ. ހިމަންދޫ އަދި ކ.ގުރައިދޫއެވެ.

މޮނިޓަރިންގެ ހާލަތުގައިވާ އެހެން ރަށްރަށަށް ބަލާއިރު، ޅ.ނައިފަރު މޮނިޓަރިންގެ ހާލަތަށް ގެނެސްފައިވަނީ މާޗުމަހުގެ 23 ވަނަ ދުވަހުއެވެ. އދ. މާމިގިލި މޮނިޓަރިންއަށް ލާފައިވަނީ އޭޕްރީލްމަހުގެ ހަތަރުވަނަ ދުވަހުއެވެ. އެމަހުގެ ނުވަވަނަ ދުވަހު ތ. ވޭމަންޑު މޮނިޓަރިންގެ ހާލަތަށް ގެނެސްފައިވާއިރު، ތ.މަޑިފުށި މޮނިޓަރިންއަށް ގެނެސްފައިވަނީ 16 ވަނަ ދުވަހުއެވެ.

އޭޕްރީލްމަހުގެ 19 ވަނަ ދުވަހު ތިން ރަށެއް މޮނިޓަރިންގެ ހާލަތަށް ލާފައިވެއެވެ. އެއީ އއ. ބޮޑުފޮޅޫދޫއާއި، ބ. އޭދަފުށީގެ އިތުރުން ކ. ހިންމަފުއްޓެވެ. ޖެހިގެން އައި 20 ވަނަ ދުވަހުވެސް ދެރަށެއް މޮނިޓަރިންއަށް ގެނެސްފައިވެއެވެ. އެއީ ކ އަތޮޅު ގުޅީގެ އިތުރުން އެއަތޮޅު މާފުއްޓެވެ. އެއާއެކު 21 ވަނަ ދުވަހު އއ. މަތިވެރި މޮނިޓަރިންގެ ހާލަތަށް ގެނެސްފައިވެއެވެ. ލ.މާމެންދޫ މޮނިޓަރިންއަށް ލާފައިވަނީ އޭޕްރީލް 23 ވަނަ ދުވަހުއެވެ.

އެމަހުގެ 24 ވަނަ ދުވަހު ވެސް ތިން ރަށެއް މޮނިޓަރިންއަށް ލާފައިވެއެވެ. އެއީ ލ.ގަމާއި، ލ. ފޮނަދޫއާއި، ގދ. ތިނަދޫއެވެ. އއ. އުކުޅަހާއި ކ. ތުލުސްދޫ މޮނިޓަރިންއަށް ލާފައިވަނީ އޭޕްރީލް 27 ވަނަ ދުވަހުއެވެ. އަދި 28 ވަނަ ދުވަހު ލ. ދަނބިދޫ ވެސް މޮނިޓަރިންގެ ހާލަތަށް ގެނެސްފައިވެއެވެ. އޭޕްރީލްމަހު އެންމެފަހުން މޮނިޓަރިން އަށް ލާފައިވަނީ އއ. ރަސްދޫއާއި، މ. ކޮޅުފުއްޓެވެ. އެއީ އޭޕްރީލް މަހުގެ 30 ވަނަ ދުވަހުއެވެ.

ރާއްޖެއަށް ކޮވިޑްގެ ހަތަރުވަނަ ރާޅެއް އަރާފައިވާއިރު، މުޅި ރާއްޖެއިން ދުވާލަކަށް ޕޮޒިޓިވްވާ މީހުންގެ އަދަދު މިހާރު ހުރީ 600 އިން މަތީގައެވެ. ކުރިން ހަމަ އެކަނި މާލެއިން މީހުން ބައްޔަށް ޕޮޒިޓިވްވި ނަމަވެސް އަތޮޅުތެރޭގެ ގިނަ ރަށްރަށުން މިހާރު ބަލި ފެނިފައިވެއެވެ.