ކޮވިޑާ ގުޅިގެން އަޅާފައިވާ ފިޔަވަޅުތައް އިތުރަށް ހަރުދަނާ ކުރަން މަޝްވަރާކުރަމުން އަންނަ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.
ރާއްޖޭގައި ކޮވިޑުގެ އަދަދުތައް އިންތިހާއަށް މަތިވަމުން ދިއުމަކީ އެކަމާ ކަންބޮޑުވާކަމެއް ކަމަށް ވިދާޅުވެ ބަލިން ރައްކާތެރިވުމުގެ ގޮތުން އަޅާފައިވާ ފިޔަވަޅުތަކަށް ޚާއްސަ ސަމާލުކަމެއް ދެއްވުމަށް އެމަނިކުފާނު އިލްތިމާސް ކުރެއްވިއެވެ. ބަލި ކޮންޓްރޯލްކުރުމަށްޓަކައި ފިޔަވަޅުތައް އިތުރަށް ހަރުދަނާ ކުރުމަށް ހޯމަދުވަހުން ފެށިގެން މަޝްވަރާތައް ކުރިއަށް ގެންދަވާ ކަމަށް ވެސް ވިދާޅުވިއެވެ.
އެޗްޕީއޭގެ ހިސާބުތައް ދައްކާގޮތުން މާލެއާއި އަތޮޅުތެރޭގައި ކޮވިޑްގެ ހާލަތު އޮތީ އިންތިހާއަށް ގޯސްވެފައެވެ. މާލެ އިން އެކަނި އިއްޔެ 276 މީހުން ޕޮޒިޓިވްވެފައިވާ އިރު މިއީ ބަލި ހަލުވި ސްޕިޑްގައި ފެތުރެމުން އަންނަ ކަމުގެ އިންޒާރެކެވެ.
އަތޮޅުތަކުގައި ވެސް ބަލި ފެތުރުން އިތުރުވެފައިވާތީ އެއް ރަށުން އަނެއް ރަށަށް ދަތުރުކުރުން ވަނީ މަނާކޮށްފައެވެ. އަތޮޅުތެރޭގައި މިހާރުވެސް 1902 އެކްޓިވް ކޭސް އެބައުޅެއެވެ. މުޅި ޖުމްލަ ރާއްޖެއިން 508 މީހުން އާދީއްތަ ދުވަހު ކޮވިޑަށް ޕޮޒިޓިވްވެ ރިޕޯޓުކޮށްފައިވެއެވެ.
