ހުވަދުއަތޮޅު އުތުރުބުރިން ފެށިގެން އައްޑޫ ސިޓީއަށް މޫސުމާބެހޭ ގައުމީ އިދާރާއިން ވައިޓް އެލަރޓް ނެރެފިއެވެ.

މޯލްޑިވްސް މީޓިއޮރޮލޮޖީ ސެންޓަރުން ބުނެފައި ވަނީ މެއި ދެ ވަނަ ދުވަހުގެ ރޭ 11:30ން ފެށިގެން ތިން ވަނަ ދުވަހުގެ ފަތިހު 04:30ށް ގއ. އަތޮޅުން ފެށިގެން އައްޑޫ ސިޓީއަށް ބޯކޮށް ވާރޭވެހުމާއެކު ގުގުރާނެ ކަމަށް ލަފާކުރެވޭ ކަމަށެވެ.

މެއި ދެވަނަ ދުވަހުގެ ރޭ 08:00ން ތިން ވަނަ ދުވަހުގެ ރޭ 08:00ށް ދެކުނުގެ އެކި ހިސާބަށް ވިއްސާރަކުރުމާއެކު ބައެއް ރަށްރަށަށް ބޯކޮށް ވާރޭވެހި ގުގުރުން އެކަށީގެން ވާކަމަށް ވެސް ބުނެފައިވެއެވެ.

އެހެން ހިސާބުތަކަށް ވެސް ކެރީގެ އަސަރުފޯރައި ގުުގުރުން އެކަށީގެންވާ ކަމަށާއި ދެކުނުގެ އަތޮޅުތަކަށް ހުޅަނގު ދެކުނާއި ހުޅަނގުން އަދި އެހެން ހިސާބުތަކަށް ހުޅަނގާއި ހުޅަނގު އުތުރުން ގަޑިއަކު 03 މޭލާއި 13 މޭލާ ދެމެދުގެ ބާރުމިނުގައި ވައިޖެހޭނެ ކަމަށް ވެސް މެޓް އޮފީހުން ލަފާކުރެއެވެ.

މެޓް އޮފީހުން އިތުރަށް ބުނެފައިވަނީ އެ ސަރަހައްދުގައިވާ އަތޮޅުތަކަށް ވިލާގަނޑުގައި ގަޑިއަކު ގާތްގަޑަކަށް 30 މޭލަށް ވައި ގަދަވާނެ ކަމަށް ލަފާ ކުރެވޭ ކަމަށެވެ.  

ރާއްޖޭގެ ކަނޑުތައް އާއްމު ގޮތެއްގައި މަޑުވެފައި ވިލާގަނޑުގައި ގަދަ ވާނެކަމަށާއި ރާޅުގެ އުސްމިނުގައި އެއް ފޫޓާއި ތިން ފޫޓު އަދި ވިލާގަނޑާއެކު ދެ ފޫޓާއި ހަތަރު ފޫޓަށް އުފުލޭނެ ކަމަށްވެސް އަންދާޒާ ކުރެއެވެ.