ކޮވިޑް-19ން ރައްކާތެރިވުމަށް ތިނަދޫގައި އަޅާފައިވާ ފިޔަވަޅުތައް އިތުރަށް ވަރުގަދަކޮށްފި
2 މެއި 2021 | އާދީއްތަ 16:0625 އޭޕްރީލްގައި އެރަށް ވަނީ މޮނިޓަރިންގެ ހާލަތަށް ގެނެސްފައި
ގދ. ތިނަދޫ، އެރަށަށް ވަނީ މިހާރު މޮނިޓަރިންގެ ހާލަތަށް ގެނެސްފައި
ކޮވިޑް-19ން ރައްކާތެރިވުމަށް ގދ. ތިނަދޫގައި އަޅާފައިވާ ފިޔަވަޅުތައް އިތުރަށް ވަރުގަދަކޮށްފިއެވެ.
ތިނަދޫ އިން ކޮވިޑް-19 އަށް ބަޔަކު ޕޮޒިޓިވްވުމާއި ގުޅިގެން، އެޗްޕީއޭއިން 25 އޭޕްރިލް 2021 އިން ފެށިގެން އެރަށް ވަނީ މޮނިޓަރިންގެ ހާލަތަށް ގެނެސްފައެވެ. އަދި އެކްޓިވް ކޭސްތަކުގެ އަދަދުތައް އިތުރުވަމުންދާތީ އީއޯސީ އިން އަޅާފައިވާ ފިޔަވަޅުތައް ވަރުގަދަކޮށް، މި ފިޔަވަޅުތައް މޮނިޓަރިންގ ޙާލަތު އުވާލަންދެން ދެމެހެއްޓުމަށް ނިންމާފައިވާ ކަމަށް އެރަށުގެ ކައުންސިލުން މައުލޫމާތުދެއެވެ.
ބަލި ކޮންޓްރޯލް ކުރުމަށް ތިނަދޫގައި ގިނަ ފިޔަވަޅުތަކެއް އަޅާފައިވާއިރު، އެރަށުގެ ކައުންސިލުން ބުނީ މިހާރު ދިމާވެފައިވާ ހާލަތުން އަރައިގަތުމަށް ރައްޔިތުންގެ އެއްބާރުލުން ވަރަށް ފުރިހަމައަށް ބޭނުންވާ ކަމަށެވެ.
އެގޮތުން މިދަނޑިވަޅުގައި އެންމެހައި ރައްޔިތުން ވީހާވެސް ގިނަ ވަގުތު ގޭގައި ތިއްބެވުމަށާއި، ޝަރޫރީ ކަމެއްގައި ބޭރަށް ދާއިރު، މާސްކް އެޅުމަށާއި، އަދި ރޯގާގެ އެއްވެސް އަލާމާތެއް ފެނިއްޖެ ނަމަ ލަސްނުކޮށް ޑރ. އަބްދުލް ސަމަދު މެމޯރިއަލް ހޮސްޕިޓަލްގެ ކޮވިޑް-19 ހޮޓްލައިން 7934641 ގުޅައި މައުލޫމާތު ހިއްސާކޮށް ދިނުމަށް ވަނީ އެދިފައެވެ.
އެޗްޕީއޭއިން އާއްމުކޮށްފައިވާ އުސޫލާއި އެއްގޮތަށް މާސްކް ނާޅާ ބޭރުގައި އުޅޭ ފަރާތްތަކާއި މެދު ފިޔަވަޅު އަޅައި ޖޫރިމަނާ ކުރުމުގެ ކަންކަން ތިނަދޫ ޕޮލިސް ސްޓޭޝަނުން ކުރާނެ ކަމަށް ބުނެފައިވެއެވެ.
