ކޮވިޑް-19ން ރައްކާތެރިވުމަށް ގދ. ތިނަދޫގައި އަޅާފައިވާ ފިޔަވަޅުތައް އިތުރަށް ވަރުގަދަކޮށްފިއެވެ.
ތިނަދޫ އިން ކޮވިޑް-19 އަށް ބަޔަކު ޕޮޒިޓިވްވުމާއި ގުޅިގެން، އެޗްޕީއޭއިން 25 އޭޕްރިލް 2021 އިން ފެށިގެން އެރަށް ވަނީ މޮނިޓަރިންގެ ހާލަތަށް ގެނެސްފައެވެ. އަދި އެކްޓިވް ކޭސްތަކުގެ އަދަދުތައް އިތުރުވަމުންދާތީ އީއޯސީ އިން އަޅާފައިވާ ފިޔަވަޅުތައް ވަރުގަދަކޮށް، މި ފިޔަވަޅުތައް މޮނިޓަރިންގ ޙާލަތު އުވާލަންދެން ދެމެހެއްޓުމަށް ނިންމާފައިވާ ކަމަށް އެރަށުގެ ކައުންސިލުން މައުލޫމާތުދެއެވެ.
ތިނަދޫ އީ.އޯ.ސީގެ ފަރާތުން ރައްޔިތުންގެ ސަލާމަތާއި ރައްކާތެރިކަމަށް އަޅާފައިވާ ފިޔަވަޅުތަކަކީ
- ސައިހޮޓާ ރެސްޓޯރަންޓްތަކުން އާއްމު ޚިދުމަތް ދިނުން މެދުކަނޑާލުމާއެކު، ރައްކާތެރިކަމާއެކު ކާބޯތަކެތި ޑެލިވަރީކުރުމުގެ ޚިދުމަތް ދިނުން.
- ފިހާރަތަކުން ޑެލިވަރީ ޚިދުމަތްދިނުމާއި، ފިހާރަތަކުގެ އެތެރެއަށް ކަސްޓަމަރުން ނުވަދެ ޚިދުމަތް ލިބިދެވޭ ގޮތަށް ތަކެތި ވިއްކުމުގެ އިންތިޒާމް ހަމަޖެއްސުމާއެކު، ފައިސާ ބަލައިގަތުމުގައި ނަގުދު ފައިސާ ބޭނުން ނުކޮށް ފައިސާ ޓްރާންސްފަރ ކުރެވޭ ގޮތް ހެދުން.
- ގާޑިޔާތަކުގެ ޚިދުމަތްތައް އެޗްޕީއޭގެ ގައިޑްލައިނާއި އެއްގޮތަށް ރޭގަނޑު 10:00 އާއި ހަމައަށް ހުޅުވާފައި ބެހެއްޓުން.
- ކަސްރަތު ކްލާސްތަކާއި، ޖިމް، އަދި ހުރިހާ ކުޅިވަރު ކޯޓްތަކާއި ކުޑަކުދިންގެ ޕާރކްތަކާއި، މިއުޒިއަމް ޕާރކް ބަންދުކުރުން.
- ފަރު މަސްވެރިކަންކުރާ އުޅަނދުފަހަރު ކައުންސިލުން ދޫކުރާ ޚާއްސަ ހުއްދައިގެ ދަށުން 3 މީހުންނަށްވުރެ މަދު ޢަދަދަކަށް މީހުން ގޮވައިގެން ނޫނީ މަހަށް ނުފުރުން.
- އެއަރޕޯޓްގެ ޑިއުޓީތަކަށް މީހުން ދިއުމާއި އައުން މަޑުޖައްސާލުން.
- ފިނިބުރު ޖެހުން މަނާކުރުމާއި، 3 މީހުންނަށްވުރެ ގިނަމީހުން އެއްފަހަރާ އެއްތަނަކަށް އެއްވެއުޅުން މަނާކުރުން.
- އޮފީސްތަކާއި އެނޫންވެސް މަސައްކަތު މާޙައުލުތަކުގައި ގައިދުރުކަމާއެކު މާސްކު އަޅައިގެން އެޗްޕީއޭގެ މިންގަޑުތަކާއި އުޞޫލުތަކާއި އެއްގޮތަށް ޙަރަކާތްތެރިވުން.
- ހާލުބެލުން ޕޯޓަލްގައި ރަޖިސްޓްރީނުވެ، އެޗްޕީއޭގެ ހުއްދަ ނެތި މާލެއިން ތިނަދޫއަށް އަންނަ ފަރާތްތައް ޖޫރިމަނާ ކުރުން.
- ރޯދަ ވީއްލުމަށް ގޭގެއަށް ޒިޔާރަތް ކުރުމާއި ރެސްޓޯރެންޓްތަކާއި ގޭގޭގައި އަދި މައިދާންތަކުގައި އާއިލީ ރޯދަވީއްލުން ނުބޭއްވުމާއި އެއްވެސް ބާވަތެއްގެ އެއްވުމެއް ބޭއްވުން މަނާކުރުން
- މޮނިޓަރިންގ ޙާލަތު އުވާލަންދެން ސްކޫލްތަކާއި، ކޮލެޖް ޔުނިވާރސިޓީ އަދި ޓިއުޝަންކުލާސްތަކާއި ޤުރުއާން ކުލާސްތައް އޮންލައިންކޮށް ކުރިއަށް ގެންދިއުން.
- މިސްކިތްތަކަށް ނަމާދަށްދާއިރު، މާސްކް އެޅުމާއި އަމިއްލަ މުސައްލާ ގެންދިއުން.
- މިސްކިތްތަކުގައި ރޯދަވީއްލުން ކުރިޔަށް ނުގެންދިއުން.
- އީއޯސީން ހުއްދަ ލިބިގެން ނޫން ގޮތަކަށް ތިނަދޫން އެއްވެސް ރަށަކަށް ދަތުރު ނުކުރުން.
- ތިނަދޫއަށް މުދާ ގެންނަ އުޅަނދުތައް ތިނަދޫ ފަޅަށް ވަނުމުގެ ކުރިން އީއޯސީގެ ހުއްދަ ހޯދުމާއި، އީއޯސީން ހުއްދަ ލިބިގެން ނޫން ގޮތަކަށް ރަށަށް މުދާ ބޭލުމާއި އެރުވުމުގެ މަސައްކަތް ނުކުރުން.
- އީއޯސީން ހުއްދަ ލިބިގެން ތިނަދޫއަށް އަންނަ އުޅަނދުފަހަރު ފެރީ ޓަރމިނަލް ނޫންތަނަކަށް ބަނދަރު ނުކުރުން.
ބަލި ކޮންޓްރޯލް ކުރުމަށް ތިނަދޫގައި ގިނަ ފިޔަވަޅުތަކެއް އަޅާފައިވާއިރު، އެރަށުގެ ކައުންސިލުން ބުނީ މިހާރު ދިމާވެފައިވާ ހާލަތުން އަރައިގަތުމަށް ރައްޔިތުންގެ އެއްބާރުލުން ވަރަށް ފުރިހަމައަށް ބޭނުންވާ ކަމަށެވެ.
އެގޮތުން މިދަނޑިވަޅުގައި އެންމެހައި ރައްޔިތުން ވީހާވެސް ގިނަ ވަގުތު ގޭގައި ތިއްބެވުމަށާއި، ޝަރޫރީ ކަމެއްގައި ބޭރަށް ދާއިރު، މާސްކް އެޅުމަށާއި، އަދި ރޯގާގެ އެއްވެސް އަލާމާތެއް ފެނިއްޖެ ނަމަ ލަސްނުކޮށް ޑރ. އަބްދުލް ސަމަދު މެމޯރިއަލް ހޮސްޕިޓަލްގެ ކޮވިޑް-19 ހޮޓްލައިން 7934641 ގުޅައި މައުލޫމާތު ހިއްސާކޮށް ދިނުމަށް ވަނީ އެދިފައެވެ.
އެޗްޕީއޭއިން އާއްމުކޮށްފައިވާ އުސޫލާއި އެއްގޮތަށް މާސްކް ނާޅާ ބޭރުގައި އުޅޭ ފަރާތްތަކާއި މެދު ފިޔަވަޅު އަޅައި ޖޫރިމަނާ ކުރުމުގެ ކަންކަން ތިނަދޫ ޕޮލިސް ސްޓޭޝަނުން ކުރާނެ ކަމަށް ބުނެފައިވެއެވެ.
