ހުކުރު ދުވަހު އަތޮޅުތެރެއިން 1،243 މީހުން ވެކްސިންުގެ ދެވަނަ ޑޯޒް ޖަހައިފި
އޭޕްރިލް 30 ވަނަ ދުވަހު އަތޮޅުތެރެއިން ވެކްސިންގެ ފުރަތަމަ ޑޯޒް 432 މީހަކު ވަނީ ޖަހާފައި
ވެކްސިން ޖެހުމުގެ ގައުމީ ކެމްޕޭނުގެ ތެރެއިން ޓްރީ ޓޮޕް ހޮސްޕިޓަލުގައި ވެކްސިން ދިނުމުގެ މަސައްކަތް ކުރިއަށް ދަނީ
ހުކުރު ދުވަހު އަތޮޅުތެރެއިން 1،243 މީހުން ވެކްސިންުގެ ދެވަނަ ޑޯޒް ޖަހައިފިއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އާންމުކުރި މައުލޫމާތަށް ބަލާއިރު އޭޕްރިލް 30 ވަނަ ދުވަހު އަތޮޅުތެރެއިން ވެކްސިންގެ ފުރަތަމަ ޑޯޒް 432 މީހަކު ވަނީ ޖަހާފައެވެ. މިއާއެކު ރާއްޖެއިން ޖުމްލަ 296،961 މީހަކު ވެކްސިންގެ ފުރަތަމަ ޑޯޒް ޖަހާފައިވާއިރު 102،589 މީހުން ވަނީ ވެކްސިންގެ ދެވަނަ ޑޯޒް ޖަހާފައެވެ. އޭޕްރިލް 30 ވަނަ ދުވަހަކީ ހުކުރު ދުވަހަކަށް ވުމުން ގްރޭޓަރ މާލެ ސަރަހައްދުގައި ވެކްސިން ޖަހާފައެއް ނުވެއެވެ. އަދި މޭ އެއްވަނަ ދުވަހަކީ ބައިނަލްއަގްވާމީ މަސައްކަތްތެރިންގެ ދުވަހަށް ވުމުން ހޮނިހިރު ދުވަހުވެސް ވެކްސިންގެ ޖެހުމުގެ ކަންތައް މާލެ ސަރަހައްދުގައި ކުރިއަށް ގެންގޮސްފައެއް ނުވެއެވެ.
އެޗްޕީއޭ އިން މި މައުލޫމާތު އާންމުކޮށްފައިވާއިރު އެއްވެސް ރަށެއްގައި ވެކްސިންގެ ދެވަނަ ޑޯޒްގެ 60 އިންސައްތަ ހަމަވެފައެއް ނުވާ ކަމަށް ހެލްތު އިމަރޖެންސީ އޮޕަރޭޝަން ސެންޓަރުން ވަނީ ދާދިފަހުން ހާމަކޮށްފައެވެ. އެޗްއީއޯސީ އިން ބުނީ އެއްވެސް ރަށެއްގައި ވެކްސިންގެ ދެވަނަ ޑޯޒްގެ 60 އިންސައްތަ ހަމަވެފައި ނުވާ ކަމަށެވެ. އަދި ރަށްރަށަށް ދިއުމަށް ޕީސީއާރް ޓެސްޓު ބޭނުންވާ މީހުންނަށް ފްލޫ ކްލިނިކްތަކުން ހިލޭ ޕީސީއާރް ޓެސްޓު ހެދޭނެ އިންތިޒާމް ހަމަޖެހިފައިވާ ކަމަށެވެ.
އެޗްއީއޯސީން މިހެން ބުނެފައިވާއިރު ރަށެއްގެ އާބާދީގެ 60 އިންސައްތަ މީހުން ކޮވިޑް-19 ވެކްސިން ގެ ދެ ޑޯޒް ފުރިހަމަކުރުމުން ކަރަންޓީނު ވުމަކާ ނުލައި އެ ރަށަކަށް ދަތުރު ކުރެވޭނެ އުސޫލު ހެލްތު ޕްރޮޓެކްޝަން އެޖެންސީން ވަނީ އާންމުކޮށްފައެވެ.
އެޗްޕީއޭއިން ބުނެފައިވަނީ އެޕްރީލް 20 ވަނަ ދުވަހުން ފެށިގެން ވަކިގޮތެއް އަންގަންދެން ރަށެއްގެ އާބާދީގެ 60 އިންސައްތަ މީހުންނަށް ކޮވިޑް ވެކްސިނުގެ ޑޯޒްތައް ހަމަވެފައިނުވާ ރަށްރަށަށް ވެކްސިންގެ ދެ ޑޯޒް ފުރިހަމަކޮށް، ދެ ހަފުތާ ވެފައިވާ މީހުންނަށް ކަރަންޓީންވުމަކާ ނުލައި ދަތުރުކުރެވޭނެ ކަމަށެވެ. އެ ރަށެއްގައި ބަލި އުޅޭ ނިސްބަތް ފަސް އިންސައްތައަށް ވުރެ މަތި ރަށަކުން އެނޫން ރަށަކަށް ދަތުރުކުރާނަމަ ޕީ.ސީ.އާރ ނެގެޓިވް ޓެސްޓާއެކު ދަތުރުކުރެވޭނެ ކަމަށާއި ވެކްސިން ޖެހުމަށް ޝަރުތު ހަމަނުވާ ކުދިން މި ފަރާތްތަކާއެކު ދަތުރުކުރަން ޖެހޭނަމަ ޕީ.ސީ.އާރު ނެގެޓިވް ޓެސްޓާއެކު ދަތުރުކުރެވޭނެ ކަމަށް ވެސް އެޗްޕީއޭ އިން ބުނެއެވެ.
