ފަހު ވަގުތު މޮޅުވެ ލައިޕްޒީގް ފައިނަލަށް

ޖަރުމަން ކަޕުގެ ސެމީ ފައިނަލުން ފަހު ވަގުތު ވާޑާ ބްރެމެން ބަލިކޮށް، މުބާރާތުގެ ފައިނަލަށް އާރްބީ ލައިޕްޒީގް ދަތުރުކޮށްފިއެވެ.

ހުކުރު ދުވަހުގެރޭ ކުޅުނު ސެމީގެ މެޗުން ލައިޕްޒީގް މޮޅުވީ 2-1 ގެ ނަތީޖާއަކުންނެވެ.

މި މެޗުގައި ދެ ޓީމުންވެސް ގިނަ ހަމަލާތަކެއް އުފެއްދި ނަމަވެސް، މެޗުގެ 90 މިނެޓު ހަމަވިއިރުވެސް ދެ ޓީމުން ކުރެ ޓީމަކަށް ލަނޑެއް ކާމިޔާބުކުރެވިފައެއް ނުވެއެވެ. އެހެންކަމުން ނަތީޖާ ނެރުމަށް އިތުރު ވަގުތުގެ ދެ ހާފު ކުޅުނުއިރު، ފުރަތަމަ ހާފު ފަށައިގެން ތިންވަނަ މިނެޓުގައި ލައިޕްޒީގުން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ހީ-ޗަން ވަންގެވެ.

އެކަމަކު ފުރަތަމަ ހާފުގެ އިތުރު ވަގުތުގައި ބްރެމެނުން ވަނީ ލަނޑެއް ޖަހައި، ނަތީޖާ އެއްވަރުކޮށްފައެވެ. ލައިޕްޒީގުގެ ޒުވާން ޑިފެންޑަރު ޑަޔުޓް އުޕަމެކާނޯ ހެދި ގޯހެއްގެ ފައިދާ ނަގައި، މި ލަނޑު ބްރެމެނަށް ކާމިޔާބުކޮށްދިނީ ލެއޮނާޑޯ ބިޓެންކޯޓެވެ. ނަމަވެސް ދެވަނަ ހާފުގެ އިތުރު ވަގުތުގައި އެމިލް ފޯސްބާގް ވަނީ ލަނޑެއް ޖަހައި، މުބާރާތުގެ ފައިނަލަށް ލައިޕްޒީގް ގެންގޮސްދީފައެވެ.

މި މެޗުން މޮޅުވެ ޖަރުމަން ކަޕުގެ ފައިނަލުގެ ޖާގައެއް ލައިޕްޒީގުން ހޯދިއިރު، އެ ޓީމަށް ވަނީ ކޯޗު ހޫލިއަން ނާގަލްސްމަނުގެ އިރުޝާދުގެ ދަށުން މުބާރާތެއް ކާމިޔާބުކުރުމުގެ ފުރުސަތު ލިބިފައެވެ. މި ސީޒަނަށްފަހު ލައިޕްޒީގް ދޫކޮށްލަން ނާގަލްސްމަން ނިންމާފައިވާއިރު، އޭނާ ހަވާލުވާނީ ޖަރުމަން ކަޕުގެ ޗެމްޕިއަންކަން އެންމެ ފަހުން ހޯދި ބަޔާން މިއުނިކާއެވެ.

މި މުބާރާތުގެ ފައިނަލަށް ލައިޕްޒީގް ދަތުރުކުރިއިރު، ފައިނަލުގައި އެ ޓީމު ބައްދަލުކުރަން ޖެހޭނީ ދެވަނަ ސެމީގައި ބޮރޫޝިއާ ޑޯޓްމުންޑާއި ހޮލްސްޓެއިން ކިއެލް ބައްދަލުކުރާ މެޗުން މޮޅުވާ ޓީމަކާއެވެ.