މެއި އެއްވަނަ ދުވަހު މާލޭގައި ވެކްސިނެއް ނުޖަހާނެ
30 އެޕްރީލު 2021 | ހުކުރު 12:52އެ ދުވަހަކީ ބައިނަލްއަގުވާމީ މަސައްކަތްތެރިންގެ ދުވަސް
ވެކްސިނުގެ ފުރަތަމަ ޑޯޒް ޖެހުމަށް އިސްލާމީ މަރުކަޒުގެ ބޭރުގައި ކިއު ހަދާފައި
މެއި މަހުގެ އެއްވަނަ ދުވަހު މާލެ ސަރަހައްދުގައި ވެކްސިން ނުޖަހާނެ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
މާލެ ސަރަހައްދުގައި މެއި އެއްވަނަ ދުވަހު ވެކްސިން ނުޖެހުމަށް އެޗްޕީއޭ އިން ނިންމާފައިވަނީ އެ ދުވަހަކީ ބައިނަލްއަގުވާމީ މަސައްކަތްތެރިންގެ ދުވަސް (މޭޑޭ) ކަމަށްވާތީއެވެ. މޭޑޭއަކީ ދުނިޔޭގެ ގިނަ ގައުމުތަކުގައި ރަސްމީ ބަންދު ދުވަހެކެވެ.
އެޗްޕީއޭއިން ބުރާސްފަތި ދުވަހު އާންމުކުރި ތަފާސްހިސާބުތައް ދައްކާގޮތުން 5،709 މީހުން ވަނީ ވެކްސިން ޖަހާފައެވެ. އޭގެ ތެރެއިން 982 މިހުންނަކީ ވެކްސިންގެ ފުރަތަމަ ޑޯޒު ޖެހި މީހުންނެވެ. އަދި ދެވަނަ ޑޯޒު ޖެހީ 4،727 މީހުންނެވެ.
ވެކްސިންގެ ފުރަތަމަ ޑޯޒު ޖެހި މީހުންގެ ތެރެއިން މާލެ ސަރަހައްދުން ވެކްސިން ޖެހީ 343 މީހުންނެވެ. އަދި އަތޮޅުތެރެއިން 639 މީހުންނެވެ. ދެވަނަ ޑޯޒު ޖެހި މީހުންގެ ތެރޭގައި ގިނައީ އަތޮޅުތެރެއިން ވެކްސިން ޖެހި މީހުންނެވެ. އެއީ 2،794 މީހުންނެވެ. މާލެ ސަރަހައްދުން ވެކްސިން ޖެހީ 1،933 މީހުންނެވެ.
މިއާއެކު ވެކްސިން ޖެހި މީހުންގެ ޖުމްލަ އަދަދު ވަނީ 295،251ށް އަރާފައެވެ. އަދި އޭގެ ތެރެއިން ދެވަނަ ޑޯޒު ޖެހީ 97،339 މީހުންނެވެ.
ރާއްޖޭގެ އާބާދީގެ ބޮޑު އިންސައްތައަކަށް ވެކްސިން ދެވުމުން ބަލި ކޮންޓްރޯލް ކުރެވޭނެ ކަމަށް ކަމާބެހޭ ފަރާތްތަކުން ވަނީ ލަފާކޮށްފައެވެ. ވެކްސިން ޖެހުމުގެ އުސޫލުތަކަށް ދާދި ފަހުން ބަދަލުތަކެއް ގެނެސްފައިވާތީ އެ ބަދަލުތައް ގެނައީ ރާއްޖެއިން ވެކްސިން ހުސްވާތީ ކަމަށް ބައެއް މީހުން ބުނެއެވެ. އެކަމަކު ހެލްތު މިނިސްޓްރީން ވަނީ އެކަން ދޮގުކޮށްފައެވެ.
