ފުރަތަމަ ފަހަރަށް ތުރުކީ ލޮކްޑައުން ކޮށްފި

ތުރުކީގައި ކޮވިޑުގެ ކޭސްތައް އިތުރުވަމުން އަންނާތީ އެގައުމު ފުރަތަމަ ފަހަރަށް ލޮކްޑައުން ކޮށްފިއެވެ.

ބުރާސްފަތި ދުވަހުގެ ހަވީރުން ފެށިގެން އަންނަ މަހުގެ 17 ވަނަ ދުވަހާއި ހަމައަށް އެގައުމު ލޮކްޑައުން ކޮށްފައިވާއިރު ކޮވިޑުން ރައްކާތެރިވުމަށް އަޅާފައިވާ އެހެނިހެން ފިޔަވަޅުތައްވެސް ވަނީ ވަރުގަދަ ކޮށްފައެވެ. އެގޮތުން ޒަރޫރީ ބޭނުންތައް ފިޔަވައި އެހެން ކަމަކު ގެއިން ބޭރަށް ނުކުތުން ވަނީ މަނާ ކޮށްފައެވެ. އަދި އެއް ސިޓީން އަނެއް ސިޓީއަށް ދަތުރުކުރުންވެސް ވަނީ މަނާކޮށްފައެވެ.

މީގެ އިތުރުން ސްކޫލުތައް ބަންދުކޮށް ޕަބްލިކް ޓްރާންސްޕޯޓް ބޭނުން ކުރެވޭ މިންވަރު މަދުކުރުމަށް ވަނީ ނިންމާފައެވެ. މިއީ ތުރުކީން މިހާތަނަށް ކޮވިޑުން ރައްކާތެރިވުމަށް އަޅާފައިވާ އެންމެ ހަރުކަށި ފިޔަވަޅުތަކެވެ.

މިދިޔަ ނޮވެމްބަރު މަހުން ފެށިގެން އެގައުމުން ރައްކާތެރިކަމުގެ ފިޔަވަޅުތައް އަޅާފައިވާއިރު ކޮވިޑަށް ޕޮޒިޓިވްވާ މީހުންގެ އަދަދު 6،000ށް ވުރެ ދަށްވިއެވެ. އެކަމަކު މިހާރު އެގައުމަކީ ޔޫރަޕްގެ ގައުމުތަކުގެ ތެރެއިން ކޮވިޑް އިންފެކްޝަން ރޭޓު އެންމެ މަތި އެއް ގައުމެވެ.

ތުރުކީގެ ސިއްހަތާއި ބެހޭ ވުޒާރާއިން ބުނީ ކޮވިޑުގެ އައު ރާޅެއް ބިންދާލާފައިވާ ކަމަށާއި މި ރާޅާއިއެކު ޕޮޒިޓިވްވާ މީހުންގެ އަދަދު 60،000ށް ވުރެ މަތިވެފައިވާ ކަމަށެވެ. އަދި ބަލީގައި މަރުވާ މީހުންގެ އަދަދު އިތުރުވަމުން އަންނަ ކަމަށެވެ.

ތުރުކީގައި މިހާތަނަށް 4.75 މިލިއަން މީހުންނަށް ކޮވިޑް ޖެހި މި ބަލީގައި 39،398 މީހުން މަރުވެފައިވެއެވެ.