ފާއިތުވި 24 ގަޑިއިރުގެ ތެރޭގައި 318 މީހަކު ކޮވިޑް-19ށް ޕޮޒިޓިވް ވެއްޖެއެވެ.

ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނީ ބުދަ ދުވަހުގެ އިރުއޮއްސި 6:00ން ބުރާސްފަތި ދުވަހުގެ 6:00ށް ނެގި 2556 ސާމްޕަލްގެ ތެރެއިން 318 މީހަކު ޕޮޒިޓިވްވެފައިވާ ކަމަށެވެ. އެއީ މާލެ ސަރަހައްދުން 142 މީހުންނާއި އަތޮޅުތެރެއިން 130 މީހުންނެވެ. އެޗްޕީއޭއިން ބުނީ ހިންގަމުންދާ ރިސޯޓުތަކުން 33 މީހުން، ސަފާރީތަކުން 08 މީހުން، އިންޑަސްޓްރިއަލް ރަށްރަށުން 04 މީހުން އަދި ތަރައްގީ ކުރަމުންދާ ރަށަކުން އެކަކު ޕޮޒިޓިވްވެފައިވާ ކަމަށެވެ.

4585 އެކްޓިވް ކޭސް ހިމެނޭއިރު، މިހާރުވެސް ހޮސްޕިޓަލްތަކުގައި 134 މީހަކަށް ފަރުވާ ދެމުންދާ ކަމަށް އެޗްޕީއޭއިން ބުނެއެވެ.

ރާއްޖެއަށް ކުރިމަތިވި ކޮވިޑް-19ގެ ތިންވަނަ ރާޅާއެކު ކޮންމެ ދުވަހަކު އެތައް ބަޔަކު ބައްޔަކު ދަނީ ޕޮޒިޓިވް ވަމުންނެވެ. މިހާތަނަށް 29،370 މީހަކު ބައްޔަށް ޕޮޒިޓިވްވެފައިވާއިރު، ރަނގަޅުވެފައިވަނީ 24،703 މީހުންނެވެ. މި ބަލީގައި 73 މީހަކު ވަނީ ނިޔާވެފައެވެ.

މާލޭގެ އިތުރުން އަތޮޅުތެރޭގެ ގިނަ ރަށްރަށުން މިހާރު ވަނީ ކޭސްތައް ފެނިފައެވެ. ކޮވިޑް-19ގެ ކޭސްތައް އިތުރުވަމުންދާ މި ދަނޑިވަޅުގައި ބޮޑެތި ލުއިތަކެއް ދީފައިވާތީ ބައެއް ފަރާތްތަކުން ދަނީ ކަންބޮޑުވުން ފާޅުކުރަމުންނެވެ. އަދި ބަލި ކޮންޓްރޯލް ކުރުމަށް އިތުރު ފިޔަވަޅުތައް އެޅުމަށް ވެސް ގޮވާލާފައިވެއެވެ. މިހާރުގެ ހާލަތަށް ބާލާއިރު، ރާއްޖޭގައި އިންޑިއާގެ ކޮވިޑް-19ގެ ވޭރިއަންޓް އުޅެދާނެ ކަމަށް ހެލްތް އެމަރޖެންސީ އޮޕަރޭޝަން ސެންޓަރ (އެޗްއީއޯސީ)ން ވަނީ ލަފާކޮށްފައެވެ.