ވެންޓިލޭޓަރު ކަންތަކުގައި ދައުލަތަށް ގެއްލުން ލިބޭ ގޮތަށް މާއްދާތައް އިތުރުކުރި މައްސަލާގައި ދައުވާކުރަން ޕީޖީއަށް ފޮނުވުމަށް އެދިއްޖެ
29 އެޕްރީލު 2021 | ބުރާސްފަތި 13:38ބައެއް ކަންކަމަކީ ބަންޑާރަނާއިބު ލަފާދެއްވި ދެލިކޮޕީގައި ނުހިމެނޭ ކަންކަން
ޕީޖީ ހުސައިން ޝަމީމް ނޫސްވެރިންގެ ބައްދަލުވުމެއްގައި ވާހަކަ ދައްކަވަނީ
ވެންޓިލޭޓަރު ކަންތަކުގައި ދައުލަތަށް ގެއްލުން ލިބޭ ގޮތަށް މާއްދާތައް އިތުރުކުރި މައްސަލާގައި ދައުވާކުރަން ޕީޖީއަށް ފޮނުވުމަށް އެދިއްޖެއެވެ.
ވެންޓިލޭޓަރު މައްސަލަ އަލުން ރިވިއު ކޮށްދިނުމަށް ރައްޔިތުންގެ މަޖިލީހުން ޕީޖީގައި އެދުމުން އެކަމާއި ގުޅިގެން މަޖިލީހުގެ ރައީސަށް ފޮނުވި ސިޓީގައި ޕީޖީ ޝަމީމް ވިދާޅުވީ މި މައްސަލައަކީ އާންމު މަސްލަހަތު ބޮޑު މައްސަލައަކަށްވާތީ ތަހުގީގީ ނަޒަރަކުން ވެސް މައްސަލަ ބަލާފައިވާ ކަމަށެވެ. އަދި ވެންޓިލޭޓަރު އެއްބަސްވުމުގައި ބަންޑާރަނާއިބު ލަފާ ދެއްވި ދެލި ކޮޕީ އާއި ސޮއިކުރި ދެލިކޮޕީގައި 18 ތަފާތެއް ހުރި ކަމަށް ފާހަގަކުރެވޭ ކަމަށް ޝަމީމް ވިދާޅުވިއެވެ.
އެއްބަސްވުމުގައި ސޮއިކުރުމުގެ ކުރިން ބަންޑާރަނާއިބުގެ ލަފާ މިނިސްޓްރީ އޮފް ހެލްތުން ހޯދާފައިވެއެވެ. ޕީޖީ އޮފީހަށް ހުށަހެޅުނު ލިޔުންތަކުގެ ތެރޭގައި ބަންޑާރަނާއިބު ލަފާ ދެއްވުމުގައި ބެއްލެވި އެއްބަސްވުމުގެ ދެލިކޮޕީ އާއި ސޮއިކުރި އެއްބަސްވުމުގެ ދެލިކޮޕީ ވެސް ހިމެނެއެވެ. މި ދެ ލިޔުން ތަހުގީގުގައި އަޅައި ކިޔައިފައި އޮތް ކަމަށް ނުފެންނާތީ އެ މަސައްކަތް ޕީޖީ އޮފީހުން ކުރިއިރު ބަންޑާރަނާއިބު ލަފާ ދެއްވި ދެލިކޮޕީއާއި ސޮއިކުރި ދެލިކޮޕީގައި 18 ތަފާތެއް އެބަހުރި ކަމަށް ޝަމީމު ވިދާޅުވިއެވެ.
ތަފާތުތަކުގެ ތެރޭގައި ދައުލަތަަށް ކަނޑައެޅިގެން ގެއްލުން ލިބޭނެ، ކަންކަން އެގޮތަށް ހިމެނުމަށް ގާނޫނީ ގޮތުން މަގުބޫލު އެއްވެސް ސަބަބެއް އޮތް ކަމަށް ނުފެންނަ މާއްދާތައް ވެސް ހިމެނެއެވެެ. މީގެ ތެރެއިން ބައެއް ކަންކަމަކީ ބަންޑާރަނާއިބު ލަފާދެއްވި ދެލިކޮޕީގައި ނުވެސް ނެތް ކަންކަން ކަމަށް ޕީޖީ ވަނީ ވިދާޅުވެފައެވެ. އަދި އެއްބަސްވުމުގައި ސޮއިކުރުމުގެ ކުރިން ބަންޑާރަނާއިބުގެ ލަފާ ހޯއްދެވި ދެލިކޮޕީ އާއި ސޮއިކުރި ދެލިކޮޕީއާ އަޅައި ކިޔުމަށްފަހު ޕީޖީ އޮފީހަށް ފާހަގަކުރެވުނު ކަންތައްތައް އެންޓި ކޮރަޕްޝަން ކޮމިޝަނާއި ހިއްސާކޮށްފައިވާ ކަމަށް ވެސް ސިޓީގައިވެއެވެ.
ބަދަލުތައް ގެނެވިފައިވާ ގޮތް ދިރާސާކޮށް އެކަން އެގޮތަށް މެދުވެރިވެފައިވާ ސަބަބާއި އެކަން ކުރުމުގައި އަމަލީ ގޮތުން ބައިވެރި މީހުންނާއި އެކަންކުރުމަށް އިރުޝާދުދިން މީހުން ހޯދުމަށްޓަކައި ތަހުގީގު ފުރިހަމަކޮށް އެއްބަސްވުމުގައި ސޮއިކުރުމުގައި ދައުލަތަށް ކަނޑައެޅިގެން ގެއްލުން ލިބޭ ގޮތަށް މާއްދާތައް އިތުރުކުރުވެފައިވާ މައްސަލައިގައި ދައުވާއެއް ކުރެވެން އޮތް ބައެއްގެ މައްޗަށް ދައުވާ ކުރުމަށް އެ އޮފީހަށް ފޮނުވައި ދިނުމަށާއި އެ މައްސަލައާ ގުޅިގެން އެގްޒެކިއުޓާސް ޖެނެރަލް ޓްރޭޑިންއަށް ފޮނުވި ފައިސާ ދައުރުވި ގޮތް ބަލައި ތަހުގީގު ކުރުމަށް އެންޓި ކޮރަޕްޝަން ކޮމިޝަނުގައި އެދިފައިވާ ކަމަށާއި އެކޮމިޝަނުން ލިޔުމުން އަދި ޖަވާބު ދީފައިނުވާ ކަމަށް ވެސް ޕީޖީ ވިދާޅުވިއެވެ.
ވެންޓިލޭޓަރުތައް ހޯދުމުގައި ހެލްތް މިނިސްޓްރީން ބޮޑެތި އޮޅުވާލުންތަކެއް ހިނގާފައިވާ ކަމަށް ފާހަގަވީ ކޮވިޑާ ގުޅިގެން ހިންގާފައިވާ ޚަރަދުތައް، ރައްޔިތުންގެ މަޖިލީހުގެ އެންގުމަށް، އޮޑިޓަރ ޖެނެރަލްގެ އޮފީހުން ހެދި އޮޑިޓަށް ފަހުއެވެ. އެ ހޯދުންތަކާއި ގުޅިގެން އޭސީސީން ކުރި ތަހުގީގަކަށް ފަހު، 11 މީހެއްގެ މައްޗަށް ދައުވާކުރަން ޕްރޮސިކިއުޓަރ ޖެނެރަލް އޮފީހަށް ފޮނުވިއެވެ. އޭގެ ތެރޭގައި މި ސަރުކާރުގެ ފުރަތަމަ ހެލްތް މިނިސްޓަރު އަބްދުﷲ އަމީން ވެސް ހިމެނިވަޑައިގަންނަވައެވެ.
ނަމަވެސް މި މައްސަލައިގައި ތުހުމަތުކުރެވޭ ފަރާތްތަކުގެ މައްޗަށް ޖިނާއީ ދައުވާއެއް ސާބިތުކުރެވޭ މިންވަރަށް ހެކި ހުށައަޅާފައި ނުވާ ކަމަށް ބުނެ ޕީޖީ އޮފީހުން ވަނީ މި ދައުވާތައް އަނބުރާ ފޮނުވާލާފައެވެ.
