އެމްއެމްޕިއާރްސީ މައްސަލާގައި ސާފުކުރަން ބޭނުންވާ މައުލޫމާތު ވަރަށް ސާފުކޮށް ސިޓީގައި ބަޔާންކޮށްފައި އޮންނާނެ ކަމަށް ހެންވޭރު ހުޅަނގު ދާއިރާގެ މެންބަރު ޙަސަން ލަޠީފް ވިދާޅުވެއްޖެއެވެ.

މެމްބަރު މިހެން ވިދާޅުވެފައިމިވަނީ، އެމްއެމްޕީއާރްސީ މައްސަލަ މިހާރު އޮތް ހިސާބެއް ބެލުމަށް ފޮނުއްވި ސިޓީއަށް އެކަށީގެންވާ ޖަވާބެއް ކޮމިޓީން ނުދެއްވާ ކަމަށް މަޖިލީހުގެ ރައީސް މުހައްމަދު ނަޝީދު ވިދާޅުވުމުންނެވެ.

އެމްއެމްޕީއާރުސީގެ ޚިޔާނާތުގެ މައްސަލާގައި ކުރީ ސަރުކާރާއި މިސަރުކާރުގައި ހިމެނޭ ބައެއް ބޭފުޅުންނާއި އެހާރާއި މިހާރުގެ މަޖިލިސް މެންބަރުން ވެސް ހިމެނޭކަމަށާއި، ނަމަވެސް އެ މައްސަލަ ނުބެލި ދިގުލައިގެންދާތީ، އަވަސްކޮށްދެއްވުމަށް ހެންވޭރު ހުޅަނގު ދާއިރާގެ މެންބަރު ޙަސަން ލަޠީފް ވަނީ މަޖިލީހުގެ ރައީސްއަށް މާރިޗު މަހުގެ 21 ވަނަ ދުވަހު ވަނީ ސިޓީއެއް ފޮނުވާފައެވެ.

އެމްއެމްޕީއާރުސީގެ ވައްކަމާ ޚިޔާނާތުގައި ހިމެނޭ ފަރާތްތަކުގެ ތެރޭގައި، ސަލާމަތީ ޚިދުމަތްތަކުގައި ކުރީގައިމަސައްކަތްކުރައްވާފައިވާ ފަރާތްތަކާއި މިހާރު ވެސް މަސައްކަތް ކުރައްވަމުން ގެންދަވާ ފަރާތްތަކާއި، ޝަރުޢީ ދާއިރާގައި ކުރީގައި މަސައްކަތް ކުރައްވާފައިވާ ފަރާތްތަކާއި، މިނިވަން މުއައްސަސާތަކުގައި ކުރީގައި މަސައްކަތް ކުރައްވާފައިވާ ފަރާތްތަކާއި، ރައްޔިތުންގެ މަޖިލީހުގެ މެމްބަރުކަން ކުރައްވާފައިވާ ފަރާތްތަކާއި އަދި މިހާރު ވެސް މެމްބަރު ކަމުގައި ތިއްބެވި ފަރާތްތަކާއި، ދައުލަތުގެ ސްޓޭޓް މިނިސްޓަރުކަމާއި މިނިސްޓަރުކަން ކުރައްވާފައިވާ ބޭފުޅުންނާއި އަދި މިހާރުވެސް ސްޓޭޓް މިނިސްޓަރުންނާއި މިނިސްޓަރުކަން ކުރައްވަމުން ގެންދަވާ ބޭފުޅުން ހިމެނޭކަމަށެވެ. މިކަން ދައުލަތުން ހާމަކޮށްފައިވާތީވެ މިހާރު އެމައްސަލަ ގޮސްފައިވާ ހިސާބު ބެލުމަށާއި މިހާރު ސަރުކާރުން އެ މައްސަލާގައި އަމަލުކުރަމުން އަންނަގޮތް ސާފުކޮށްދިނުމަށް ސިޓީގައި އެދިފައިވެއެވެ.

އެސިޓީއާއި ގުޅިގެން މިއަދުގެ ޖަލްސާގައި ސިޓީ އިއްވެވުމަށްފަހު މަޖިލީހުގެ ރައީސް މުޙައްމަދު ނަޝީދު ވިދާޅުވީ، އެމަނިކުފާނި އެސިޓީ ސަލާމަތީ ޚިދުމަތްތަކާބެހޭ ކޮމިޓީއަށް ފޮނުއްވި ކަމަށެވެ. އެހެންނަމަވެސް އެކަމަށް އެދެވޭ ޖަވާބެއް ކޮމިޓީގެ މުގައްރިރުގެ ފަރާތުން ލިބިފައިނުވާ ކަމަށެވެ.

އެހެންކަމުން މިކަމަކީ ރާއްޖޭގެ ހުރިހާ ރައްޔިތުންގެ ނަޒަރު ހުއްޓިފައިވާ މައްސަލައަކަށް ވާތީވެ، އެ މައްސަލާގައި މެމްބަރު ހަސަން ލަތީފު އެދިވަޑައިގެންނެވި މައުލޫމާތު ސާފުކޮށްދިނުމަށް ޕްރޮސެކިއުޓަރ ޖެނެރަލްގެ އޮފީހަށާއި އެންޓި ކޮރަޕްޝަން ކޮމިޝަނަށާއި، އެސެޓް ރިކަވަރީ ކޮމިޝަނަށާއި އަދި ފުލުހުންނަށް އެމަނިކުފާނު އެދިވަޑައިގެންފައިވާ ކަމަށް ވިދާޅުވިއެވެ. އަދި އެ އިދާރާތަކުން ޖަވާބު ލިބުމުން އެކަން މެމްބަރުންނާ ހިއްސާކުރައްވާނެ ކަމަށް ވިދާޅުވިއެވެ. މީގެ އިތުރުން ރައްޔިތުން ވެސް އެމަނިކުފާނާ މި މައްސަލައާއި ގުޅިގެން ސުވާލު ކުރައްވާކަމަށް ވިދާޅުވިއެވެ.