އިންޑޮނީޝިއާގެ ސަބްމެރިންގެ ކްރޫއިން މަރުވި ހާދިސާއާ ގުޅިގެން މިނިސްޓަރ ޝާހިދު ތައުޒިޔާ ވިދާޅުވެއްޖެ
މި ސަބްމެރީން ގެއްލުނީ މިސެއިލް ތަމްރީނެއް ކުރިޔަށް ގެންދަނިކޮށް
ފޮރިން މިނިސްޓަރ އަބްދުﷲ ޝާހިދު
އިންޑޮނީޝިއާ ސިފައިންގެ ސަބްމެރިން ކޭ.އާރް.އައި ނަންގަލާއަށް ދިމާވި ޙާދިސާގައި، އެ ސަބްމެރިންގެ ކްރޫއިން މަރުވުމާގުޅިގެން އިންޑޮނީޝިއާގެ ފޮރިން މިނިސްޓަރ ރެޓްނޯ އެލްޕީ މަރްސޫދީއަށް ފޮރިން މިނިސްޓަރ އަބްދުﷲ ޝާހިދު ތައުޒިޔާގެ މެސެޖެއް ފޮނުއްވައިފިއެވެ.
މިނިސްޓަރ ޝާހިދުގެ މެސެޖްގައި، މި ޚަބަރު އެއްސެވީ ފުން ހިތާމަޔާއެކުގައިކަމަށް ވިދާޅުވެ، ދިވެހި ސަރުކާރާއި ރައްޔިތުންނާ އަދި މިނިސްޓަރގެ އަމިއްލަ ނަންފުޅުގައި އިޚްލާސްތެރި ތައުޒިޔާ ވިދާޅުވިއެވެ. އަދި މަރުވި ކްރޫ މެމްބަރުންގެ އާއިލާތަކަށް ތައުޒިޔާ ރައްދުކޮށްދެއްވުމަށްވެސް އެދިވަޑައިގަތެވެ.
ކުރިން އިންޑޮނީޝިއާއިން ބަލާފައިވަނީ ކޭ.އާރް.އައި ނަންގަލާ ގެއްލިފައި ވާކަމަށެވެ. އެހެންނަމަވެސް އޭގެ ބައިތައް ފެނުމާ ގުޅިގެން، ސަބްމެރިން ކަނޑު އަޑިއަށް ފެތިފައިވާކަމަށް އިންޑޮނީޝިއާގެ ކަނޑުގެ ސިފައިން މިހާރު ވަނީ ނިންމާފައެވެ. އަދި ސަބްމެރިންގައި ތިބި މީހުން ދިރިތިއްބާ ފެނިދާނެކަމުގެ އުންމީދުނެތްކަމަށް ވަނީ ނިންމާފައެވެ.
އިންޑޮނޭޝިއާ ސިފައިންގެ މި ސަބްމެރީން ގެއްލިފައިވަނީ ކަނޑުއަޑީގައި މިސައިލުގެ ތަމްރީނެއް ކުރިޔަށް ގެންދަނިކޮށެވެ.
