އިދިކޮޅުން އުޅެނީ "ޖޭ" ވެގެން - ރޮޒައިނާ
އިދިކޮޅުން ހީކުރިގޮތަށް ކަންކަން ނުދިއުމުން އެކަމާ "ޖޭ" ވެގެން
ރޮޒައިނާ އާދަމް - އިދިކޮޅުން ހީކުރިގޮތަށް ކަންކަން ނުދިއުމުން އެކަމާ "ޖޭ" ވެގެން މިހާރު އެ އުޅެނީ
އިދިކޮޅުން އަޑުގަދަކޮށް ކަންކަމާ ދެކޮޅަށް ވާހަކަދައްކައި ހަދަނީ "ޖޭ" ވާތީ ކަމަށް އައްޑޫމީދޫ ދާއިރާގެ މެމްބަރު ރޮޒައިނާ އާދަމް ވިދާޅުވެއްޖެއެވެ.
ދައުލަތުގެ ކޭޝްފްލޯ މެނޭޖްކުރުމަށްޓަކައި މަރުކަޒީ ބޭންކް އެމްއެމްއޭ އިން ދަރަނި ނެގޭ ގޮތަށް ރައްޔިތުންގެ މަޖިލީހުން މިދިޔަ އަހަރު ދީފައިވާ ހުއްދަ އިތުރުކޮށްދިނުމުގެ މައްސަލަ ދިރާސާކުރުމަށް އެކުލަވާލި ވަގުތީ ކޮމިޓީން މައްސަލަ ދިރާސާކޮށް ނިންމި ގޮތުގެ ރިޕޯޓަށް މަޖިލީހުގައި ވާހަކަ ދައްކަވަމުން ރޮޒައިނާ ވިދާޅުވީ ކޮވިޑްގެ ހާލަތުގައި އިގްތިސާދު އެންމެ ރަނގަޅަށް ހިފެހެއްޓި އެއްގައުމަކީ ރާއްޖެ ކަމަށާއި، އަދި އިދިކޮޅުން ހީކުރިގޮތަށް ކަންކަން ނުދިއުމުން އެކަމާ "ޖޭ" ވެގެން އުޅޭކަމަށެވެ.
ރޮޒައިނާ ވިދާޅުވީ ކޮވިޑްގެ ހާލަތުގެ ތެރޭގައި ވެސް ތަރައްގީގެ އެއްވެސް މަޝްރޫޢުއެއް ހުއްޓުމެއް ނެތި މި ސަރުކާރުން ކުރިއަށް ގެންދިޔަ ކަމަށާއި، އަދި އެކަމާވެސް އިދިކޮޅު ފަރާތްތަކުން "ޖޭ"ވާ ކަމަށެވެ. މި ސަރުކާރު އައިތާ ދެ އަހަރުގެ ތެރޭގައި އެއްވެސް ސަރުކާރަކުން ނުކުރާވަރަށް މަސައްކަތް ކުރާތީވެ އެކަމާވެސް އިދިކޮޅުން "ޖޭ" ވެގެން މަޖިލީހުގެ ތަޅުމުގައި އަޑުގަދަ ކުރައްވަނީ ކަމަށެވެ.
ރޮޒައިނާ ވިދާޅުވީ މި ސަރުކާރުން އެމްޓީސީސީއަކީ ފައިދާވާ ކުންފުންޏަކަށް ހަދާފައިވާކަމަށާއި، އަދި ފެނަކަ އިނދަޖައްސާލާފައި ވަނިކޮށް ފެނަކަ އަކީވެސް ފައިދާވާ ކުންފުންޏަކަށް ހަދާފައިވާކަމަށެވެ.
ރޮޒައިނާ ވިދާޅުވީ މި ހުރިހާ ކަމެއްގެ ތެރޭގައިވެސް އިދިކޮޅު ފަރާތްތަކަށް ހަމައެކަނި ދެއްކުނީ ރައީސް ޔާމީން މިނިވަން ކުުރުމުގެ ވާހަކަ އެކަނިކަމަށެވެ.
