މައިންޒް އަތުން ބަލިވެ ބަޔާނަށް އިތުރު އިންތިޒާރެއް

މައިންޒް އަތުން ބަލިވުމާ ގުޅިގެން ޖެހިޖެހިގެން ނުވަވަނަ ފަހަރަށް ޖަރުމަން ލީގު ކާމިޔާބުކުރުމަށް އެންމެ ފަހުގެ ޗެމްޕިއަން ބަޔާން މިއުނިކަށް އިތުރު އިންތިޒާރެއް ކުރަން ޖެހިއްޖެއެވެ.

ހޮނިހިރު ދުވަހު ކުޅުނު މެޗުން ބަޔާން ބަލިވީ 2-1 ގެ ނަތީޖާއަކުންނެވެ. މި މެޗުން މޮޅުވެގެން ބަޔާނަށް ލީގު ޗެމްޕިއަންކަން ކަށަވަރުކުރެވެން އޮތް ނަމަވެސް، މިހާރު އެ ޓީމަށް ވަނީ އިންތިޒާރެއް ކުރަން ޖެހިފައެވެ. އެގޮތުން ލީގުގައި ބާކީ އޮތް ތިން މެޗުގެ ތެރެއިން އެންމެ މެޗަކުން މޮޅުވެގެންވެސް ބަޔާނަށް ލީގު ޗެމްޕިއަންކަން ހޯދޭނެއެވެ.

މައިންޒުގެ ދަނޑުގައި ކުޅުނު މެޗުގެ ފުރަތަމަ ހާފުގައި އެ ޓީމުން ވަނީ މޮޅު ކުޅުމެއް ދައްކާފައެވެ. އެގޮތުން މެޗުގެ ވަރަށް ކުރީކޮޅު މައިންޒުން ވަނީ ލީޑު ނެގިއިރު، މެޗު ފަށައިގެން ތިންވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ޖޮނަތަން ބާކާޓެވެ. އަދި މެޗުގެ 37 ވަނަ މިނެޓުގައި ރޮބިން ކުއައިސަން ވަނީ ލަނޑެއް ޖަހައި، މައިންޒުގެ ލީޑު ފުޅާކޮށްދީފައެވެ.

އޭގެ ފަހުން މި މެޗުގައި ބަޔާނުން ކުޅުން ރަނގަޅުކޮށް ގިނަ ހަމަލާތަކެއް އުފެއްދި ނަމަވެސް، އެ ޓީމަށް މެޗުގައި ލަނޑެއް ކާމިޔާބުކުރެވިފައިވަނީ އިތުރު ވަގުތުގައެވެ. މި ލަނޑު ބަޔާނަށް ކާމިޔާބުކޮށްދިނީ އަނިޔާއިން ރަނގަޅުވެ އެނބުރި ކުޅުމުގެ ތެރެއަށް އައި ތަޖުރިބާކާރު ފޯވާޑް ރޮބަޓް ލެވަންޑޯސްކީއެވެ. މިއީ މި ސީޒަނުގެ ޖަރުމަން ލީގުގައި ލެވަންޑޯސްކީ ކާމިޔާބުކުރި 36 ވަނަ ލަނޑެވެ.

މި ނަތީޖާއާއެކު ބަޔާން އޮތީ ތާވަލުގެ އެއްވަނައިގައި ކުޅުނު 31 މެޗުން ލިބުނު 71 ޕޮއިންޓާއެކުއެވެ. ދެވަނައިގައި އޮތް އާރްބީ ލައިޕްޒީގަށް 30 މެޗުން ލިބިފައިވަނީ 61 ޕޮއިންޓެވެ. އަދި ބަޔާން ބަލިކުރި މައިންޒް އޮތީ ތާވަލުގެ 12 ވަނައިގައި 30 މެޗުން 34 ޕޮއިންޓާއެކުއެވެ.

މީގެ އިތުރުން ލީގުގައި ހޮނިހިރު ދުވަހު ކުޅުނު މެޗުން ވުލްފްސްބާގް ބަލިކޮށް ބޮރޫޝިއާ ޑޯޓްމުންޑުން ވަނީ ގަދަ ހަތަރެއްގެ އުއްމީދު އާކޮށްފައެވެ. މި މޮޅާއެކު ޑޯޓްމުންޑް އޮތީ ތާވަލުގެ ފަސްވަނައިގައި ކުޅުނު 31 މެޗުން ލިބުނު 55 ޕޮއިންޓާއެކުއެވެ. ތާވަލުގެ ހަތަރުވަނައިގައި އޮތް އެއިންޓްރެކްޓް ފްރެންކްފަޓަށް 30 މެޗުން 56 ޕޮއިންޓް ލިބިފައިވާއިރު، ޑޯޓްމުންޑް އަތުން ބަލިވި ވުލްފްސްބާގް އޮތީ ތާވަލުގެ ތިންވަނައިގައި 31 މެޗުން ލިބުނު 57 ޕޮއިންޓާއެކުއެވެ.