ފަހު ވަގުތު ނިއުކާސަލުން ލިވަޕޫލް ހުއްޓުވައިފި

އިނގިރޭސި ޕްރިމިއާ ލީގުގައި ހޮނިހިރު ދުވަހު ނިއުކާސަލް ޔުނައިޓެޑުން ފަހު ވަގުތު އެންމެ ފަހުގެ ޗެމްޕިއަން ލިވަޕޫލާ އެއްވަރުކޮށްފިއެވެ.

ލިވަޕޫލުގެ ދަނޑުގައި ކުޅުނު މެޗު އެއްވަރުވީ 1-1 ގެ ނަތީޖާއަކުންނެވެ.

މި މެޗުގެ ފުރަތަމަ ހާފުގައި ލިވަޕޫލުން މޮޅު ކުޅުމެއް ދެއްކިއިރު، މެޗުގެ ވަރަށް ކުރީކޮޅު އެ ޓީމުން ވަނީ ލީޑު ނަގާފައެވެ. މެޗު ފަށައިގެން ތިންވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ މުހައްމަދު ސަލާހެވެ. އެކަމަކު މެޗުގެ 20 ވަނަ މިނެޓުގައި ނިއުކާސަލުގެ ޝޯން ލޯންގްސްޓާފަށް ނަތީޖާ އެއްވަރުކުރަން ރަނގަޅު ފުރުސަތެއް ލިބުނު ނަމަވެސް، އޭނާ ފޮނުވާލި ހަމަލާ ލިވަޕޫލުގެ ގޯލްކީޕަރު އެލިސަން ބެކާ ވަނީ ދިފާއުކޮށްފައެވެ.

އޭގެ ފަހުން ފުރަތަމަ ހާފުގައި ލިވަޕޫލަށް ވަނީ ލީޑު ފުޅާކުރަން ގިނަ ފުރުސަތުތަކެއް ލިބިފައެވެ. ނަމަވެސް އެ ޓީމުގެ ޑިއޯގޯ ޖޮޓާ އާއި، ސަޑިއޯ މާނޭ އަދި ސަލާހަށް ލިބުނު ހުސް ފުރުސަތުތަކުގެ ބޭނުން ހިފިފައެއް ނުވެއެވެ.

އެއާއެކު މެޗުގެ ދެވަނަ ހާފުގައި ނިއުކާސަލުން ކުޅުން ރަނގަޅުކުރިއިރު، މި ހާފު ފަށައިގެން 10 ވަނަ މިނެޓުގައި އެ ޓީމުގެ ޖޯލިންޓަނަށް ވަނީ ނަތީޖާ އެއްވަރުކުރަން ހުސް ފުރުސަތެއް ލިބިފައެވެ. އެކަމަކު އޭނާ ފޮނުވާލި ނުރައްކާތެރި ހަމަލާ ލިވަޕޫލުގެ އެލިސަން ވަނީ މަތަކޮށްފައެވެ.

މި މެޗުގައި ލިވަޕޫލަށް ލިބުނު ފުރުސަތުތަކުގެ ބޭނުން ހިފިފައިނުވާއިރު، މެޗުގެ އިތުރު ވަގުތުގެ ދެވަނަ މިނެޓުގައި ނިއުކާސަލުގެ ކަލުމް ވިލްސަން ވަނީ ލަނޑެއް ޖަހާފައެވެ. އެކަމަކު އޭގެ ކުރިން އޭނާގެ އަތުގައި ބޯޅަ ޖެހުމުން ވީޑިއޯ އެސިސްޓަންޓް ރެފުރީ (ވީއޭއާރް) އިން އެ ލަނޑު ބަލައިގެންފައެއް ނުވެއެވެ. އެކަމަކު އިތުރު ވަގުތުގެ ފަސްވަނަ މިނެޓުގައި ނިއުކާސަލުގެ ޖޯސެފް ވިލޮކް ވަނީ ލަނޑެއް ޖަހައި، ނަތީޖާ އެއްވަރުކޮށްދީފައެވެ.

މި ނަތީޖާއާއެކު ލިވަޕޫލް އޮތީ ތާވަލުގެ ހަވަނައިގައި ކުޅުނު 33 މެޗުން ލިބުނު 54 ޕޮއިންޓާއެކުއެވެ. ތާވަލުގެ ހަތަރުވަނައިގައި އޮތް ޗެލްސީއަށް 32 މެޗުން 55 ޕޮއިންޓް ލިބިފައިވާއިރު، ފަސްވަނައިގައި އޮތް ވެސްޓް ހޭމް ޔުނައިޓެޑަށްވެސް ވަނީ 32 މެޗުން ވަނީ 55 ޕޮއިންޓް ލިބިފައެވެ. އަދި ލިވަޕޫލާ އެއްވަރުކުރި ނިއުކާސަލް އޮތީ ތާވަލުގެ 15 ވަނައިގައި 33 މެޗުން 36 ޕޮއިންޓާއެކުއެވެ.