ޗެމްޕިއަންސް ލީގުގެ އައު ފޯމެޓަށް ކްލޮޕާއި ގާޑިއޯލާގެ ފާޑުކިއުން

ޔޫރަޕުގެ އެންމެ ޝަރަފުވެރި ކުލަބު ފުޓްބޯޅަ މުބާރާތް ކަމަށްވާ ޔުއެފާ ޗެމްޕިއަންސް ލީގުގެ ފޯމެޓް ބަދަލުކުރުމާ ގުޅިގެން ލިވަޕޫލުގެ ކޯޗު ޔާގެން ކްލޮޕާއި މެންޗެސްޓާ ސިޓީގެ ކޯޗު ޕެޕް ގާޑިއޯލާ ވަރަށް ބޮޑަށް ފާޑުކިޔައިފިއެވެ.

ޔުއެފާއިން ޗެމްޕިއަންސް ލީގުގެ އައު ފޯމެޓް ފާސްކުރީ ދާދި ފަހުން ޔޫރަޕުގެ ނަން މަޝްހޫރު 12 ކުލަބު ހިމެނޭ ގޮތަށް "ޔޫރަޕިއަން ސުޕަ ލީގު" ވުޖޫދުކުރުމާއެކުއެވެ. ޔުއެފާއިން އިއުލާންކުރި ޗެމްޕިއަންސް ލީގުގެ އައު ފޯމެޓުގައިވާ ގޮތުން ގްރޫޕް ސްޓޭޖުގައި 32 ޓީމުގެ ބަދަލުގައި 36 ޓީމު ވާދަކުރާނެއެވެ. އަދި ގްރޫޕް ސްޓޭޖުގައި ކޮންމެ ޓީމަކަށް 10 މެޗު ކުޅެން ލިބޭއިރު، އެ 10 މެޗުން އެންމެ ގިނަ ޕޮއިންޓް ހޯދާ ގަދަ އަށް ޓީމު ދެވަނަ ބުރަށް ދަތުރުކުރާނެއެވެ.

ދެން ލީގުގެ ނުވަވަނައިން ފެށިގެން 24 ވަނައާ ދެމެދު ނިންމާ ޓީމުތައް ދެ ލެގުގެ ޕްލޭއޮފް ބުރެއް ކުޅޭއިރު، އެ ބުރުން ކުރި ހޯދާ އަށް ޓީމު ދެވަނަ ބުރަށް ދަތުރުކުރާނެއެވެ. އެހެންކަމުން ދެވަނަ ބުރު ކުރިއަށްދާނީ މިހާރުވެސް މުބާރާތް ކުރިއަށްދާ އުސޫލުން ގަދަ 16 ޓީމުގެ މެދުގައެވެ. ދެން ލީގުގެ 17 ވަނައިން ފެށިގެން 24 ވަނައާ ދެމެދު ނިންމާ ކުލަބުތަކަށް ޔުއެފާ ޔޫރޮޕާ ލީގުގެ ޖާގަ ލިބޭއިރު، އޭގެ ފުލުން ނިންމާ އަށް ޓީމު މުބާރާތުން ކަޓާނެއެވެ.

އެކަމަކު ފޯމެޓަށް ގެނައި ބަދަލާއެކު ކުޅެން ޖެހޭ މެޗުތަކުގެ އަދަދު އިތުރުވުމާއެކު ކްލޮޕާއި ގާޑިއޯލާ ވަނީ ފާޑުކިޔާފައެވެ. ދާދި ފަހުން ދިން އިންޓަވިއުއެއްގައި ކްލޮޕް ބުނީ ސުޕަ ލީގު ހުއްޓުމަކަށް އައުމުން ހިތްހަމަޖެހޭ ކަމަށާއި، އެކަމަކު ޗެމްޕިއަންސް ލީގުގެ ފޯމެޓް ބަދަލުކުރުމުމް އެކަމާ ހިތްހަމަނުޖެހޭ ކަމަށެވެ. އެގޮތުން ގްރޫޕް ސްޓޭޖުގައި ހަ މެޗުގެ ބަދަލުގައި 10 މެޗު ކުޅެން ނިންމުމުން، އޭގެ އަސަރުކުރާނީ ކުލަބުތަކާއި ކުޅުންތެރިންނަށް ކަމަށާއި، އަދި ފުޓްބޯޅައިގައި ނިންމުމެއް ނިންމާއިރު، ކޯޗުންނާއި ކުޅުންތެރިން އަދި ސަޕޯޓަރުންގެ ކިބައިން އަހާލުމެއް ނޯންނަ ކަމަށްވެސް ބުންޏެވެ.

މީގެ އިތުރުން ސިޓީގެ ކޯޗު ގާޑިއޯލާ ބުނީ މިފަދަ ނިންމުމެއް ނިންމާއިރު، ކުޅުންތެރިންނަށް ވިސްނާލުން ރަނގަޅު ކަމަށެވެ. އެކަމަކު ލަފާ ދިނަސް އެއާ މެދު ވިސްނާތަނެއް ނުފެންނަ ކަމަށާއި، ކުޅުންތެރިންގެ އަޑުއަހާނެ ބައެއް ނެތް ކަމަށްވެސް ބުންޏެވެ. އަދި ފުޓްބޯޅައިގެ ޝޯ ކުރިއަށްދަނީ އިދާރާތަކުން ބޭނުންވާ ގޮތަކަށް ކަމަށްވެސް ގާޑިއޯލާ ވަނީ ބުނެފައެވެ.

ޗެމްޕިއަންސް ލީގުގެ އައު ފޯމެޓާ ގުޅިގެން ފުޓްބޯޅަ ކުޅުންތެރިންނާއި ކޯޗުން ކަންބޮޑުވުން ފާޅުކޮށްފައިވާއިރު، ޔުއެފާއިން ނިންމާފައިވަނީ އައު ފޯމެޓުގެ ޗެމްޕިއަންސް ލީގު 2024-2025 ވަނަ އަހަރުގެ ސީޒަނުގައި ފެށުމަށެވެ. އަދި މި ފޯމެޓަށް 2033 ވަނަ އަހަރުގެ ނިޔަލަށް މުބާރާތް ކުރިއަށްގެންދަންވެސް ވަނީ ނިންމާފައެވެ.