"އަމާޒަކީ ރޯދަމަހު ކަރަންޓު ކެނޑުމުގެ ރިސްކު އެންމެ ސިކުންތަކުވެސް ނުނެގުން"
ފެބުރުއަރީން މެއިމަހުގެ ނިޔަލަށް ކަރަންޓު ބޭނުންކުރާ ނިސްބަތް 11.5 އިންސައްތަ އުފުލޭ
ސްޓެލްކޯގެ މެނޭޖިން ޑިރެކްޓަރ ހަސަން މުޣުނީ
އަމާޒަކީ ރޯދަމަހު ކަރަންޓު ކެނޑުމުގެ ރިސްކު އެންމެ ސިކުންތަކުވެސް ނުނެގުންކަމަށް ސްޓޭޓް އިލެކްޓްރިކް ކޮމްޕެނީ ލިމިޓެޑް، ސްޓެލްކޯގެ މެނޭޖިން ޑިރެކްޓަރ ހަސަން މުޣުނީ ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަދައްކަވަމުން މުޣުނީ ވިދާޅުވީީ ރޯދަމަސް މި ފަހަރު ކުރިމަތިލާފައި މިވަނީ ރާއްޖެއަށް އެންމެ ހޫނު ގަދަ ދުވަސްވަރާ ކަމަށްވާތީ ކަރަންޓު ބޭނުން ކުރުން އިތުރުވާނެކަމަށް ބަލައި ތައްޔާރުވެފައިވާކަމަށެވެ. އެގޮތުން ނެޓްވޯކްތައް އަޕްގްރޭޑް ކުރުމުގެ ގިނަ މަސައްކަތްތަކެއް ކޮށްފައިވާކަމަށް ވިދާޅުވިއެވެ. އެހެންނަމަވެސް، މި ދުވަސްވަރު ކަރަންޓުގެ މައްސަލަ ކުޑަކުރުމަށް ރައްޔިތުންވެސް ހަކަތަ ސަލާމަތްކުރުމަށް އާދަކުރަންޖެހޭ ކަމަށް ވިދާޅުވިއެވެ.
ކަރަންޓު ބިލު ބޮޑުވަނީ ޖައްވު ހޫނުވުމުގެ ސަބަބުން ގޭގައި ބޭނުންކުރާ ފިނިކުރާ އާލާތްތަކުން އިސްރާފުވާ ހަކަތަ އިތުރުވެ، ގޭގައި ބޭނުންކުރެވޭ ހަކަތައިގެ ނިސްބަތް މައްޗަށް ދިއުމުގެ ސަބަބުންކަމަށް ވިދާޅުވިއެވެ. ކޮންމެ އަހަރެއްގެވެސް ފެބުރުއަރީން ފެށިގެން މެއިމަހުގެ ނިޔަލަށް ކަރަންޓު ބޭނުންކުރާ ނިސްބަތް 11.5 އިންސައްތަ އުފުލޭ ކަމަށާއި، ސްޓެލްކޯއިން ކުރި ދިރާސާތަކުން މާހައުލުގެ ފިނިހޫނުމިނާއި ހަކަތަ ބޭނުންކުރެވޭ ނިސްބަތާ ސީދާ ގުޅުންވާކަން ހާމަވެފައިވާއިރު، މިއަހަރު މީގެ ކުރީ އަހަރުތަކަށް ވުރެ ވެސް ހަކަތަ ބޭނުންކުރާ ނިސްބަތް މަތިވެފައިވާ ކަމަށް މުޣުނީ ވިދާޅުވިއެވެ.
އެއްވެސް ކަސްޓަމަރަކަށް ކަރަންޓު ބިލާމެދު ޝައްކު އުފެދޭނަމަ ސްޓެލްކޯއަށް ޝަކުވާ ހުށަހެޅޭނެ ކަމަށާއި، ކަރަންޓު މީޓަރާއި މެދު ޝައްކުވާނަމަވެސް އެކަމަށް ޚާއްސަ ފޯމުން ކަންބޮޑުވުން ހުށަހަޅައި ބެލޭނެ އިންތިޒާމް ހަމަޖެހިފައިވާކަމަށް މުޣުނީ ވިދާޅުވިއެވެ.
ވޭތުވެދިޔަ އަހަރުގެ ހޫނު މޫސުމުގައި 56 މެގަވޮޓުގެ ހަކަތަ ބޭނުންކުރެވުނު ކަމަށް ރެކޯޑްތަކުން ދައްކާއިރު، މިއަހަރުގެ މިހާތަނަށްވެސް 58 މެގަވޮޓުގެ ހަކަތަ އުފައްދައި ރެކޯޑް އަދަދަކަށް އަރާފައިވާއިރު، މަތީ ވޯލްޓޭޖްގެ ކަރަންޓު ބޭނުންކުރާ ސާމާނު ޕީކް ގަޑިތަކުގައި ބޭނުން ނުކުރުމަށާއި، އެސީ އާއި އައިސްއަލަމާރި ފަދަ ތަކެތި ބޭނުންކުރައްވާއިރު ވީހާވެސް އިސްރާފް ކުޑަވާނެ ގޮތަތްކަށް ބޭނުންކުރެއްވުމަށް ސްޓެލްކޯއިން އިލްތިމާސް ކުރެއެވެ.
ރޯދައަށް ވެފައިވާ ތައްޔާރީތަކަށް އަލިއަޅުއްވާލައްވަމުން މުޣުނީ ވަނީ އަމާޒަކީ ރޯދަމަހު ކަރަންޓު ކެނޑުމުގެ ރިސްކު އެންމެ ސިކުންތަކުވެސް ނުނެގުންކަމަށެވެ. ޕީކް ގަޑިތަކުގައި ކަރަންޓު ކެނޑޭ މައްސަލަ ހައްލުކުރުމަށް ކޮންމެ ދެ އަހަރަކުން އެއް އަހަރު ނެޓްވޯކް އަޕްގްރޭޑްކުރަމުންދާކަމަށް މުޣުނީ ވިދާޅުވިއެވެ. މީގެ އިތުރުން މި މައްސަލަ ހައްލުކުރުމަށް މި ސަރުކާރުން ފެށި "ގްރޭޓާރ މާލެ އިންޓަރ ކަނެކްޝަން ގްރިޑް ޕްރޮޖެކްޓް" ބޮޑު އެހީއެއް ވެދޭނެކަމަށް ވިދާޅުވިއެވެ. މި ގްރިޑްގެ މަސައްކަތް ޖުލައި މަހަށް ނިންމުމަށް އަމާޒު ހިފާފައިވާއިރު ޕްރޮޖެކްޓްގެ 93 އިންސައްތަ މަސައްކަތް މިހާރު ވަނީ ނިމިފައެވެ.
