ވަރުގަދަ ވެލެންސިއާ ބަލިކޮށް ޔޫވީ ކުރިއަށް

ދިރާގު ދިވެހި ޕްރިމިއާ ލީގުގައި ބުރާސްފަތި ދުވަހުގެރޭ ވަރުގަދަ ކުލަބު ވެލެންސިއާ ބަލިކޮށް، ތާވަލުގެ ހަތްވަނައަށް ޔުނައިޓެޑް ވިކްޓަރީ (ޔޫވީ) ޖެހިލައިފިއެވެ.

ގައުމީ ފުޓްބޯޅަ ދަނޑުގައި ކުޅުނު މެޗުން ޔޫވީ މޮޅުވީ ފަހަތުން އަރައި 3-1 ގެ ނަތީޖާއަކުންނެވެ. މި މޮޅާއެކު ޔޫވީން ވަނީ އެންމެ ފަހުން ކުޅުނު ތިން މެޗުންވެސް މޮޅުވެފައެވެ.

މި މެޗު ފަށައިގެން ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މެޗުގެ 29 ވަނަ މިނެޓުގައި ވެލެންސިއާއިން ވަނީ ލަނޑު ޖަހައި، ލީޑު ނަގައިފައެވެ. އަލީ އަޝްފާގު (ދަގަނޑޭ) ގެ އެހީތެރިކަމާއެކު މި ލަނޑު އެ ޓީމަށް ކާމިޔާބުކޮށްދިނީ ސްޕެއިނުގެ ފޯވާޑް ބޯހަސް މާޓިންނެވެ. އެކަމަކު އޭގެ ހަތަރު މިނެޓު ފަހުން ޔުވީން ވަނީ ނަތީޖާ އެއްވަރުކޮށްފައެވެ. ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ އިސްމާޢީލް އީސަ (މެސީ) އެވެ. މިއީ އޭރިއާ ތެރެއިން ވެލެންސިއާގެ ޑިފެންޑަރު މެހެރުދާރު ޕޫލާދީ ޔޫވީގެ އަލީ ހައިސަމް (ޗުމްޕު) އަށް ކުރި ފައުލަކަށް ދިން ޕެނަލްޓީއެކެވެ.

އޭގެ ފަހުން މެޗުގެ 33 ވަނަ މިނެޓުގައި ޔޫވީގެ އަނަޓޯލީ ވްލަސީޗޭވަށް ލަނޑު ޖަހަން ހުސް ފުރުސަތެއް ލިބުނު ނަމަވެސް، އޭނާ ހުހަށްހުރެ ފޮނުވާލި ބޯޅަ ވެލެންސިއާގެ ގޯލްކީޕަރު މުޙައްމަދު ފައިސަލް ވަނީ ހުށިޔާރުކަމާއެކު ދިފާއުކޮށްފައެވެ. މި މެޗުގެ ފުރަތަމަ ހާފުގައި އަލުން ލީޑު ނަގަން ވެލެންސިއާއަށް އެންމެ ހުސް ފުރުސަތެއް ލިބުނީ އެ ޓީމުގެ އަކުރަމް އަބްދުލް ޣަނީ (އަކޫ) އަށެވެ. އެކަމަކު އޭރިއާ ތެރެއިން ހުހަށްހުރެ އޭނާ ފޮނުވާލި ހަމަލާ ޔޫވީގެ ގޯލްކީޕަރު ނާޖިހް އަލީ ވަނީ ދިފާއުކޮށްފައެވެ. އެއާއެކު މެޗުގެ ފުރަތަމަ ހާފުގެ އިތުރު ވަގުތު ޔޫވީން ވަނީ ލީޑު ނަގައިފައެވެ. މެސީ ނަގައިދިން ކޯނަރަކުން މި ލަނޑު އެ ޓީމަށް ކާމިޔާބުކޮށްދިނީ ކެޕްޓަން މުޙައްމަދު އާރިފް (ބަކާ) އެވެ.

މެޗުގެ ދެވަނަ ހާފުގައި ވެލެންސިއާއިން މެޗު ކޮންޓްރޯލް ނަގައި ކުޅުން ރަނގަޅުކުރިއިރު، މެޗުގެ 70 ވަނަ މިނެޓުގައި ދަގަނޑޭއަށް ވަނީ ލަނޑު ޖަހަން ރަނގަޅު ފުރުސަތެއް ލިބި ބޭކާރުވެފައެވެ. އޭރިއާ ތެރެއިން ބޮލުން ދަގަނޑޭ ފޮނުވާލި ހަމަލާގެ ހުރަހަކަށްވީ ޔޫވީގެ ގޯލްކީޕަރު ނާޖިހެވެ. އަދި އޭގެ ދެ މިނެޓު ފަހުންވެސް ދަގަނޑޭއަށް ވަނީ ލަނޑު ޖަހަން ރަނގަޅު ފުރުސަތެއް ލިބި ބޭކާރުވެފައެވެ. އެކަމަކު މެޗުގެ 83 ވަނަ މިނެޓުގައި ޔޫވީން ވަނީ ލީޑު ފުޅާކޮށްފައެވެ. ލިބުނު ހިލޭ ޖެހުމަކުން މި ލަނޑު އެ ޓީމަށް ކާމިޔާބުކޮށްދިނީ އެނަޓޯލީއެވެ.

މި މެޗަށްފަހު ވާހަކަދައްކަމުން ޔޫވީގެ ކޯޗު އިހުސާން އަބްދުލް ޣަނީ (ސާންތި) ބުނީ މެޗުން މޮޅުވީ ކުޅުންތެރިން ކުރި ބުރަ މަސައްކަތުން ކަމަށާއި، މި މޮޅާއެކު ޔޫވީން މި ބުރުގައި ހާސިލުކުރަން ބޭނުންވި ކަންތައް ހާސިލުވެއްޖެ ކަމަށެވެ. އަދި އިތުބާރުކޮށް އަލަށް ފުރަތަމަ އެގާރައިން ޖާގަ ހޯދި ކުޅުންތެރިން ދެއްކި ކުޅުމާމެދު ފަޚުރުވެރިވާ ކަމަށްވެސް ސާންތި ބުންޏެވެ.

ވެލެންސިއާގެ ކޯޗު މުޙައްމަދު އާތީފް (އާތީ) ބުނީ މެޗުން ބަލިވުމުން އެކަމާ ހިތްހަމަނުޖެހޭ ކަމަށާއި، އެކަމަކު މިއީ މި ބުރުގައި ވެލެންސިއާއިން އެންމެ ރަނގަޅަށް ކުޅުނު މެޗު ކަމަށެވެ. އާތީ ބުނީ މެޗުން ބަލިވުމަކީ ފުޓުބޯޅައިގެ އާދަ ކަމަށާއި، އެކަން ގަބޫލުކުރަން ޖެހޭ ކަމަށެވެ.

މި ނަތީޖާއާއެކު ތާވަލުގެ ހަތްވަނައަށް ޔޫވީ ޖެހިލިއިރު، އެ ޓީމަށް ކުޅުނު 14 މެޗުން ވަނީ 12 ޕޮއިންޓް ލިބިފައެވެ. އެއާއެކު ތާވަލުގެ ފުލަށް ސުޕަ ޔުނައިޓެޑް ސްޕޯޓްސް( ސަސް) ވެއްޓުނުއިރު، އެ ޓީމަށް ވަނީ 13 މެޗުން 12 ޕޮއިންޓް ލިބިފައެވެ. އެހެންކަމުން ޔޫވީއަށް ކުރި ލިބެނީ ލަނޑުގެ ތަފާތުންނެވެ. އަދި ޔޫވީ އަތުން ބަލިވި ވެލެންސިއާ އޮތީ ތާވަލުގެ ދެވަނައިގައި ކުޅުނު 13 މެޗުން ލިބުނު 24 ޕޮއިންޓާއެކުއެވެ. އެއްވަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަނަށް 13 މެޗުން 31 ޕޮއިންޓް ލިބިފައިވާއިރު، ވެލެންސިއާ ބަލިވުމުން މާޒިޔާގެ ލީޑު ވަނީ ހަތް ޕޮއިންޓަށް ފުޅާވެފައެވެ.