"ދަނޑުމަތީގައި ގޮނޑިއަކު ދަގަނޑޭ ބޭންދިޔަސް އެއީ އިދިކޮޅު ޓީމަށް ޕްރެޝަރު"

ކުލަބު ވެލެންސިއާގެ މުޅި ޓީމު ބިނާވެފައި އޮތީ ރާއްޖޭގެ އުފެދުނު އެންމެ މޮޅު ފުޓްބޯޅަ ކުޅުންތެރިޔާ އަލީ އަޝްފާގު (ދަގަނޑޭ) އަށް ކަމަށް ޔުނައިޓެޑް ވިކްޓަރީ (ޔޫވީ) ގެ ކޯޗު އިހުސާން އަބްދުލް ޣަނީ (ސާންތި) ބުނެފިއެވެ.

މި ސީޒަނުގައި މިހާތަނަށް ދަގަނޑޭއަށް އެންމެ އެދެވޭ ކުޅުމެއް ނުދެއްކުނު ނަމަވެސް، އޭނާ ވަނީ ލީގުގައި މިހާތަނަށް ކުޅުނު މެޗުތަކުގައި ފަސް ލަނޑު ވެލެންސިއާއަށް ކާމިޔާބުކޮށްދީފައެވެ. އަދި ވެލެންސިއާއިން ޖެހި ގިނަ ލަނޑުތަކެއްގައި ދަގަނޑޭގެ ހިއްސާ ބޮޑެވެ.

މިހާތަނަށް ދަގަނޑޭއަށް އެންމެ އެދެވޭ ކުޅުމެއް ނުދެއްކުނު އެއް ސަބަބަކީ މި ފަހުން އޭނާއަށް ކުރިމަތިވި އަނިޔާގެ ގިނަ މައްސަލަތަކެވެ. މީގެ ކުރިން ވެލެންސިއާގެ ކޯޗު މުޙައްމަދު އާތިފް (އާތީ) ވަނީ ދަގަނޑޭ އަނިޔާގައި ހުރި ނަމެވެސް، ވެލެންސިއާއަށް އެހީތެރިވަމުން އަންނަ ކަމަށް ބުނެފައެވެ. އަދި ބޭނުންވަނީ ދަގަނޑޭ އެއްކޮށް ރަނގަޅުވެގެން މެޗުތަކުގައި ކުޅުން ކަމުގައިވެސް އާތީ ބުންޏެވެ.

ދިރާގު ދިވެހި ޕްރިމިއާ ލީގުގައި ވެލެންސިއާ އާއި ޔޫވީ ބައްދަލުކުރާ މެޗުގެ ކުރިން އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ސާންތި ބުނީ ވެލެންސިއާގެ މުޅި ޓީމު ބިނާވެފައި އޮތީ ދަގަނޑޭއަށް ކަމަށާއި، އެގޮތުން މި ސީޒަނުގައި ވެލެންސިއާ މިހާރު އޮތް ހިސާބަށް އައުމުގައި ދަގަނޑޭގެ ހިއްސާ ބޮޑު ކަމަށެވެ. އަދި ވެލެންސިއާގެ ސްކޮޑަށް ބަލާނަމަ ކޮންމެ ފަދަ މެޗެއްގައިވެސް ނަތީޖާ ނެރެވޭނެ ތިބީ ދެ ކުޅުންތެރިން ކަމަށާއި، އެއީ ދަގަނޑޭގެ އިތުރުން އަލީ ފާސިރު (ސެންޓޭ) ކަމަށްވެސް ބުންޏެވެ.

ސާންތި ބުނީ ދަނޑުމަތީގައި ދަގަނޑޭ ގޮނޑިއެއްގައި ބޭންދިޔަސް އިދިކޮޅު ޓީމުގެ ގޯލާ ކައިރީއްޖެނަމަ އަދިވެސް ނުރައްކާކުރާނެ ކަމަށެވެ. އަދި މި ވަގުތު ދަގަނޑޭ ފޯމުން ކަޓާފައި ހުރި ނަމަވެސް، އެންމެ ފަހުން ކުޅުނު މެޗުގައި ވެލެންސިއާއިން ކާމިޔާބުކުރި ފަހު ލަނޑަކީވެސް ދަގަނޑޭގެ ކުޅަދާނަކަމުން ވެލެންސިއާއިން ކާމިޔާބުކުރި ލަނޑެއް ކަމަށްވެސް ބުންޏެވެ.

މި ސީޒަނުގައި ދަގަނޑޭގެ ކެޕްޓަންކަމުގެ ދަށުން ވެލެންސިއާއިން ރަނގަޅު ނަތީޖާތަކެއް ނެރެފައިވާއިރު، ލީގުގައި އެ ޓީމު މިހާތަނަށް ބަލިވެފައިވަނީ އެންމެ ދެ މެޗުންނެވެ. އެއާއެކު ވެލެންސިއާ އޮތީ ތާވަލުގެ ދެވަނައިގައި ކުޅުނު 12 މެޗުން ލިބުނު 24 ޕޮއިންޓާއެކުއެވެ. އެއްވަނައިގައި ހަތް ޕޮއިންޓުގެ ލީޑަކާއެކު އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން އޮތްއިރު، ބުރާސްފަތި ދުވަހުގެރޭ ޔޫވީ ބަލިކޮށް، ވެލެންސިއާއަށް މާޒިޔާގެ ފަރަގު ހަތަރު ޕޮއިންޓަށް ކުޑަކުރެވޭނެއެވެ.