ކުޑަކުއްޖަކަށް ޖިންސީގޯނާ ކުރިކަމުގެ ތުހުމަތުކުރެވޭ ބިދޭސީއެއް ހޯދަނީ
22 އެޕްރީލު 2021 | ބުރާސްފަތި 07:08ފުލުހުން ހޯދަމުންގެންދަނީ ބަންގްލަދޭޝްއަށް ނިސްބަތްވާ އުމުރުން 34 އަހަރުގެ އެމްޑީ އިދްރީސް ނަމަކަށް ކިޔާ މީހެއް
ޖިންސީ ގޯނާގެ ތުހުމަތުގައި ހޯދަމުންދާ އެމްޑީ އިދްރީސް
ކުޑަކުއްޖަކަށް ޖިންސީގޯނާ ކުރިކަމަށް ތުހުމަތުކުރެވޭ ބިދޭސީއެއް ހޯދުމަށް ފުލުހުން އިއުލާނުކޮށްފިއެވެ.
މި މައްސަލައާ ގުޅިގެން ހޯދުމަށް އިއުލާނުކޮށްފައިވަނީ ބަންގްލަދޭޝްއަށް ނިސްބަތްވާ އުމުރުން 34 އަހަރުގެ އެމްޑީ އިދްރީސް ނަމަކަށް ކިޔާ މީހެކެވެ. އޭނާ ހޯދުމަށް އިއުލާނުކޮށްފައިވަނީ، ކުޑަކުއްޖަކަށް ޖިންސީ ގޯނާ ކުރިކަމަށް ތުހުމަތުކުރެވޭ މައްސަލައެއްގެ ތަހުގީގުގަށް ސުވާލުކުރުމަށް ކަމަށް ފުލުހުން ބުނެއެވެ.
މިކަމާގުޅިގެން ފުލުހުން ކުރި އިއުލާނުގައި ބުނެފައިވަނީ، އެމީހާއަކީ އުޅޭ ވަކިތަނެއް ނޭނގުމުގެ ސަބަބުން ތަހުގީގަށް ހާޒިރުވުމަށް ޗިޓް ރައްދުކުރެވިފައިނުވާ މީހެއް ކަމަށެވެ. އަދި އެހެން ކަމުން ޖިނާއީ މައްސަލަތައް ތަހުގީގުކުރުމުގައި ފުލުހުން އަމަލުކުރާނެ އިޖުރާއަތުގެ ގަވާއިދުގެ 27 ވަނަ މާއްދާގައި ވާގޮތުގެ މަތިން ތަހުގީގަށް ހާޒިރުވުމަށް އަންގާކަމަށް އިއުލާނުގައި ވެއެވެ.
މި މައްސަލައިގައި ތުހުމަތު ކުރެވޭ އެމްޑީ އިދްރީސް ފުލުހުންގެ އިދާރާއަށް ހާޒިރުވާން ޖެހެނީ 29 އޭޕްރީލް ވަނަދުވަހުގެ 10:00 އަށެވެ. އެގޮތުން ސ. ހިތަދޫ ޕޮލިސްޓޭޝަން ނުވަތަ އެންމެ ކައިރީގައި ހުރި ފުލުހުންގެ އިދާރާއަކަށް ހާޒިރުވުމަށް ފުލުހުން އޭނާއަށް އަންގާފައިވެއެވެ.
އުމުރުން 3 އަހަރުގެ ކުޑަކުއްޖަކަށް ޖިންސީ ގޯނާ ކުރި މައްސަލައެއް ފުލުހުންނަށް ހުށަހެޅި، އެ މައްސަލަ ތަހުގީގު ކުރަމުން ދާކަމަށް ވެސް ބުރާސްފަތި ދުވަހު ފުލުހުން ބުނެފައިވެއެވެ.
