ޔޫނިއަން ބާލިން ބަލިކޮށް ޑޯޓްމުންޑް އުއްމީދުގައި

ޖަރުމަން ލީގުގައި ބުދަ ދުވަހުގެރޭ ކުޅުނު މެޗުން ޔޫނިއަން ބާލިން ބަލިކޮށް، ގަދަ ހަތަރެއްގެ އުއްމީދު ބޮރޫޝިއާ ޑޯޓްމުންޑުން ދަމަހައްޓައިފިއެވެ.

އަމިއްލަ ދަނޑުގައި ކުޅުނު މެޗުން ޑޯޓްމުންޑް މޮޅުވީ 2-0 ގެ ނަތީޖާއަކުންނެވެ.

މި މެޗުގައި ޑޯޓްމުންޑުން ރަނގަޅު ކުޅުމެއް ދެއްކިއިރު، އެ ޓީމުން ވަނީ ގިނަ ހަމަލާތަކެއް އުފައްދާފައެވެ. އެއާއެކު މެޗުގެ 27 ވަނަ މިނެޓުގައި ޑޯޓްމުންޑުގެ ކެޕްޓަން މާކޯ ރެއުސް ވަނީ އެ ޓީމަށް ލީޑު ނަގައިދީފައެވެ. މި ލަނޑު އޭނާ ކާމިޔާބުކުރީ އެ ޓީމު އާލިން ބްރައިޓް ހާލަންޑް ފޮނުވާލި ޕެނަލްޓީގެ ރިބައުންސް ބޯޅައަކުންނެވެ.

އޭގެ ފަހުންވެސް މި މެޗުގައި ޑޯޓްމުންޑަށް ގިނަ ފުރުސަތުތަކެއް ލިބިގެންދިޔައިރު، އެ ޓީމުން ލީޑު ފުޅާކޮށްފައިވަނީ މެޗު ނިމެން ދެ މިނެޓަށް ވެފައި ވަނިކޮށެވެ. ހޫލިއަން ބްރަންޓް ދިން ޕާހަކުން މި ލަނޑު އެ ޓީމަށް ކާމިޔާބުކޮށްދިނީ ރަފައެލް ގުއެރޭރޯއެވެ.

މި މޮޅާއެކު ޑޯޓްމުންޑް އޮތީ ތާވަލުގެ ފަސްވަނައިގައި ކުޅުނު 30 މެޗުން ލިބުނު 52 ޕޮއިންޓާއެކުއެވެ. ތާވަލުގެ ހަތަރުވަނައިގައި އޮތް އެއިންޓްރެކްޓް ފްރެންކްފަޓަށް 30 މެޗުން ވަނީ 56 ޕޮއިންޓް ލިބިފައެވެ. މީގެ އިތުރުން ޑޯޓްމުންޑް އަތުން ބަލިވި ޔޫނިއަން ބާލިން އޮތީ ތާވަލުގެ އަށްވަނައިގައި 30 މެޗުން ލިބުނު 43 ޕޮއިންޓާއެކުއެވެ.