އަންގާރަ ދުވަހު ރާއްޖެއިން ވެކްސިން ޖެހީ 7056 މީހުން
21 އެޕްރީލު 2021 | ބުދަ 12:461،589 މީހުންނަކީ ވެކްސިންގެ ފުރަތަމަ ޑޯޒު ޖެހި މީހުން
ވެކްސިން ޖެހުމުގެ ގައުމީ ކެމްޕޭންގެ ތެރެއިން ޓްރީ ޓޮޕް ހޮސްޕިޓަލުގައި ވެކްސިން ދިނުމުގެ މަސައްކަތް ކުރިއަށް ދަނީ
އަންގާރަ ދުވަހު މުޅި ރާއްޖެއިން 7،056 މީހުން ވެކްސިން ޖަހާފައިވާ ކަމަށް އެޗްޕީއޭގެ ތަފާސްހިސާބުތަކުން ދައްކައިފިއެވެ.
އެޗްޕީއޭއިން އާންމުކޮށްފައިވާ ތަފާސްހިސާބުތައް ދައްކާގޮތުން އަންގާރަ ދުވަހު ރާއްޖެއިން ވެކްސިން ޖެހި 7،056 މީހުންގެ ތެރެއިން 1،589 މީހުންނަކީ ވެކްސިންގެ ފުރަތަމަ ޑޯޒު ޖެހި މީހުންނެވެ. މާލެ ސަރަހައްދުން ވެކްސިންގެ ފުރަތަމަ ޑޯޒުޖަހާފައި ވަނީ 385 މީހުންނެވެ. އަދި އަތޮޅުތެރެއިން ފުރަތަމަ ޑޯޒު ޖެހީ 1،204 ،މީހުންނެވެ.
އެޗްޕީއޭގެ ތަފާސްހިސާބުތައް ދައްކާގޮތުން 5،467 މީހުންނަކީ ދެވަނަ ޑޯޒު ޖެހި މީހުންނެވެ. އޭގެ ތެރެއިން 2،852 މީހުންނަކީ މާލެ ސަރަހައްދުން ވެކްސިންޖެހި މީހުންނެވެ. އަތޮޅުތެރެއިން ދެވަނަ ޑޯޒު ޖެހީ 2،615 މީހުންނެވެ.
މުޅި ރާއްޖޭގެ ތަފާސްހިސާބުތަކަށް ބަލާއިރު މިހާރު މާލޭގައިވެސް އަތޮޅުތެރޭގައިވެސް ގިނައީ ވެކްސިންގެ ދެވަނަ ޑޯޒު ޖަހާ މީހުންނެވެ. މުޅި ރާއްޖެއިން މިހާތަނަށް 285،562 މީހުން ވެކްސިން ޖަހާފައިވާއިރު އޭގެ ތެރެއިން 56،817 މީހުންނަކީ ދެވަނަ ޑޯޒު ޖަހާފައިވާ މީހުންނެވެ.
މިދިޔަ ފެބްރުއަރީ މަހުގެ 1 ވަނަ ދުވަހުން ފެށިގެން ރާއްޖޭގައި ވެކްސިނޭޝަން ޕްރޮގްރާމް ކުރިއަށްގެންދާއިރު، ދެވަނަ ޑޯޒު ޖަހަން ފަށާފައި ވަނީ މި މަހު ކުރީކޮޅުއެވެ. ދެވަނަ ޑޯޒު ޖަހަނީ ކޮވިޝީލްޑް ވެކްސިންއާއި ސިނޮފަރމް ވެކްސިންގެއެވެ. ދެވަނަ ޑޯޒުޖަހަން ފެށުމާއެކު ވެކްސިން ކިއުތަކުގައި މައްސަލަ ދިމާވެ އެކަމުގެ ރަނގަޅު އުސޫލެއް ނެތި ކަންބޮޑުވުންތައް އިތުރުވެފައިވާއިރު އެކަން ހައްލުކޮށްދޭނެކަމަށް އެޗްޕީއޭއިން ބުނެފައިވެއެވެ.
މުޅި މާލެ ސަރަހައްދުގައި ޖުމްލަ 11 ވެކްސިނޭޝަން ސެންޓަރު ހުރިއިރު އަތޮޅުތެރޭގައި 240 ވެކްސިނޭޝަން ސެންޓަރު އެބަހުއްޓެވެ. މި ވަގުތު ރާއްޖޭގައި ބޭނުންކުރަމުން އަންނަނީ ކޮވިޝީލްޑް، ސިނޮފަރމް އަދި ފައިޒާ ވެކްސިންއެވެ. އޭގެ ތެރެއިން މިހާރު ކޮވިޝީލްޑް ވެކްސިންގެ ފުރަތަމަ ޑޯޒު ޖެހުން ވަނީ ހުއްޓާލާފައެވެ. މިހާރު ފުރަތަމަ ޑޯޒު ޖަހަނީ ސިނޮފަރމް އަދި ފައިޒަރ ގެއެވެ. ފައިޒަރ ވެކްސިން ޖަހަމުން އަންނަނީ ވަކި ބަލިތަކަކަށް ބޭސްކުރާ މީހުންނަށް ޚާއްސަ ހާލަތްތަކުގައެވެ.
