ލީޑްސްއާ އެއްވަރުވެ ލިވަޕޫލުން ފުރުސަތު ނަގާލައިފި

އިނގިރޭސި ޕްރިމިއާ ލީގުގައި ހޯމަ ދުވަހުގެރޭ ލީޑްސް ޔުނައިޓެޑާ އެއްވަރުވެ، ތާވަލުގެ ގަދަ ހަތަރަކަށް އަރަން ލިބުނު ފުރުސަތު އެންމެ ފަހުގެ ޗެމްޕިއަން ލިވަޕޫލުން ނަގާލައިފިއެވެ.

ލީޑްސްގެ ދަނޑުގައި ކުޅުނު މެޗު އެއްވަރުވީ 1-1 ގެ ނަތީޖާއަކުންނެވެ.

މި މެޗުގެ ފުރަތަމަ ހާފުގައި ލިވަޕޫލުން ރަނގަޅު ކުޅުމެއް ދެއްކިއިރު، މެޗުގެ ވަރަށް ކުރީކޮޅު އެ ޓީމުގެ ތިއާގޯ އަލްކަންޓާރާ ވަނީ ނުރައްކާތެރި ހަމަލާއެއް ފޮނުވާލާފައެވެ. އޭރިއާ ބޭރުން ތިއާގޯ ބާރު ހަމަލާއެއް އުފެއްދިއިރު، އެ ހަމަލާ ލީޑްސްގެ ގޯލްކީޕަރު ވަނީ ހުށިޔާރުކަމާއެކު ދިފާޢުކޮށްފައެވެ. އަދި އޭގެ ފަހުންވެސް ލިވަޕޫލުން ރަނގަޅަށް ކުޅެ، ގިނަ ފުރުޞަތުތަކެއް ތަނަވަސްކުރިއިރު، މި ހާފުގައި އެ ޓީމުން ވަނީ ލީޑު ނަގާފައެވެ. މެޗުގެ 31 ވަނަ މިނެޓުގައި ޓްރެންޓް އަލެކްސަންޑަ-އާނޯލްޑް ތަނަވަސްކޮށްދިން ފުރުސަތަކުން މި ލަނޑު ލިވަޕޫލަށް ކާމިޔާބުކޮށްދިނީ ސަޑިއޯ މާނޭއެވެ.

އެކަމަކު މި މެޗުގެ ދެވަނަ ހާފުގައި ލީޑްސްއިން އެ ޓީމު ކުޅުން ރަނގަޅުކުރިއިރު، މި ހާފުގައި އެ ޓީމަށް ވަނީ ލަނޑު ޖަހަން ގިނަ ފުރުސަތުތަކެއް ލިބިފައެވެ. އެގޮތުން މެޗުގެ 75 ވަނަ މިނެޓުގައި ޕެޓްރިކް ބަމްފޯޑް ފޮނުވާލި ހަމަލާއެއް ގޯލުގެ ހުރަސް ދަނޑިއަށް އަމާޒުވިއިރު، އޭގެ ދެ މިނެޓު ފަހުން އެ ޓީމުގެ ޓައިލާ ރޮބާޓްސްއަށް ވަނީ ހުސް ފުރުސަތެއް ލިބި ބޭކާރުވެފައެވެ. ނަމަވެސް މެޗު ނިމެން ތިން މިނެޓަށް ވެފައި ވަނިކޮށް ލީޑްސްއިން ވަނީ ލަނޑު ޖަހައި، ނަތީޖާ އެއްވަރުކޮށްފައެވެ. ޖެކް ހެރިސަން ނަގައިދިން ކޯނަރަކުން މި ލަނޑު އެ ޓީމަށް ކާމިޔާބުކޮށްދިނީ ޑިއޭގޯ ޔޮރެންޓޭއެވެ.

މި ނަތީޖާއާއެކު ތާވަލުގެ ގަދަ ހަތަރަކަށް އަރަން ލިބުނު ފުރުސަތު ލިވަޕޫލުން ނަގާލިއިރު، އެ ޓީމު އޮތީ ތާވަލުގެ ހަވަނައިގައި ކުޅުނު 32 މެޗުން ލިބުނު 53 ޕޮއިންޓާއެކުއެވެ. ތާވަލުގެ ހަތަރުވަނައިގައި އޮތް ވެސްޓް ހޭމް ޔުނައިޓެޑަށް 32 މެޗުން 55 ޕޮއިންޓް ލިބިފައިވާއިރު، ފަސްވަނައިގައި އޮތް ޗެލްސީއަށް 31 މެޗުން ވަނީ 54 ޕޮއިންޓް ލިބިފައެވެ. އަދި ލިވަޕޫލާ އެއްވަރުކުރި ލީޑްސް އޮތީ ތާވަލުގެ 10 ވަނައިގައި 32 މެޗުން 46 ޕޮއިންޓާއެކުއެވެ.