މާރާމާރީއެއްގައި އަނިޔާ ލިބުނު މީހަކު ހޯދަނީ
18 އެޕްރީލު 2021 | އާދީއްތަ 06:06މިކަން ހިންގާފައިވަނީ މާޗުމަހުގެ 29 ވަނަ ދުވަހު ގ. ބަށިމާވިލާ ގޭގެ ކައިރީގައި ހަދަމުންދިޔަ އިމާރާތެއްގެ ކައިރީގައި
މާރާމާރީގައި އަނިޔާ ލިބުނު މީހާ
ފުލުހުން ތަހުގީގު ކުރަމުންދާ މާރާމާރީގެ މައްސަލައެއްގައި އަނިޔާ ލިބުނު މީހާ ހޯދުމުގެ މަސައްކަތް ފަށައިފިއެވެ.
މި މާރާމާރީއަކީ ދެ މީހަކުވެގެން ބިދޭސިއެއްގެ ގަޔަށް އަތްލައި ހިންގާފައިވާ މާރާމާރީއެކެވެ. މިކަން ހިންގާފައިވަނީ މާޗުމަހުގެ 29 ވަނަ ދުވަހު ގ. ބަށިމާވިލާ ގޭގެ ކައިރީގައި ހަދަމުންދިޔަ އިމާރާތެއްގެ ކައިރީ ކަމަށް ފުލުހުން މައުލޫމާތު ދެއެވެ. މި މައްސަލައާ ގުޅިގެން ފުލުހުން ހޯދަމުން ދަނީ އެ މާރާމާރީގައި އަނިޔާ ލިބުނު މީހާއެވެ.
ފުލުހުން ބުނީ މި މައްސަލައިގެ ތަހުގީގުގައި މިހާތަނަށް ކުރެވުނު މަސައްކަތުން އެމީހާ ހޯދިފައި ނުވާކަމުގައެވެ. އަދި އެމީހާއަކީ ކާކުކަން ދެނެގަނެވިފައި ނުވާކަމަށް ފުލުހުން ބުނެއެވެ. މި މާރާމާރީގައި އަނިޔާ ލިބުނު މީހާގެ ފޮޓޯއެއް ފުލުހުންގެ ވެބްސައިޓްގައި އާންމުކޮށްފައިވެއެވެ. އަދި އޭނާއާބެހޭ މައުލޫމާތު މައްސަލަ ތަހުގީގު ކުރަމުންދާ ފުލުހުންގެ ޖެނެރަލް އިންވެސްޓިގޭޝަން ޑިޕާޓްމަންޓްގެ ނަންބަރު 9631696ށް ހިއްސާކުރުމަށް އެދިފައިވެއެވެ.
މި މައްސަލައާ ގުޅުންހުރި މައުލޫމާތު ހިއްސާކުރަން ގުޅާއިރު، މައްސަލައިގެ އިންސިޑެންޓް ނަންބަރު ކަމުގައިވާ، 483099 ބުނުމަށްފަހު، މައުލޫމާތު ހިއްސާކުރުމަށް ފުލުހުން އިރުޝާދު ދެއެވެ.
