މާލެ ރައްޔިތުންގެ 24 އިންސައްތަ ލިބުމުން އެއީ ޕާޓީކުރަންވީ ސަބަބެއް ނޫން!
މާލޭގެ ވޯޓުލެވޭ އާބާދީ ނުވަތަ ކަންކަން ނިންމުމުގައި ބަސް ބުނަން ތިބި ރައްޔިތުންގެ އެންމެ 24.07 އިންސައްތަ ވޯޓު
ކުރީގެ ހައުސިން މިނިސްޓަރ ޑރ. މުހައްމަދު މުއިއްޒު
ނިމިގެން ދިޔަ ލޯކަލް ކައުންސިލް އިންތިޚާބަކީ މިހާތަނަށް މާލޭގައި އެންމެ މަދުން ވޯޓުލާން މީހުން ނުކުތް އިންތިޚާބެވެ. ވާދަވެރި އިންތިޚާބެއް ކަމަށް ގިނަ ބަޔަކަށް ފެނުނު ނަމަވެސް، އިންތިޚާބު ނިމިގެން ދިޔަ އިރު އުއްމީދުކުރިވަރާ ގާތަށް ވެސް ވޯޓުލާން މީހުން ނުނުކުމެއެވެ. ގިނަ ސަބަބުތަކެއް ހުރެގެންނެވެ.
އިންތިޚާބުގެ ވަގުތީ ނަތީޖާ އިލެކްޝަންސް ކޮމިޝަނުން އާންމުކޮށްފައިވާ އިރު، މާލެ ސިޓީގެ މޭޔަރުކަން ކަށަވަރު ކުރި ކެންޑިޑޭޓް، އަދި ކުރީގެ ހައުސިން މިނިސްޓަރ ޑރ. މުހައްމަދު މުއިއްޒަށް މާލެ ރައްޔިތުންގެ އަޣުލަބިއްޔަތުން އާނއެކޭ ނުބުނެއެވެ.
އަޅުގަނޑު މިހެން މި ދަންނަވަނީ ސަބަބުތަކެއް ހުރެގެންނެވެ. މިފަހަރު މާލެ ސިޓީން ވޯޓުލުމުގެ ހައްގު 51،702 މީހަކަށް ލިބެއެވެ. ނަމަވެސް ވޯޓުލާފައިވަނީ 21125 މީހުންނެވެ. އެއީ މާލޭގެ ވޯޓުލެވޭ އާބާދީގެ 40.8 އިންސައްތައެވެ. މިއީ އަދި ޑރ މުއިއްޒަށް ލިބުނު ވޯޓުގެ އަދަދެއް ނޫނެވެ. އަދި އިންސައްތައެއް ވެސް ނޫނެވެ. ތަފާސް ހިސާބުތަކަށް ބަލާލާނަމެވެ. 21،125 މީހުންގެ ތެރެއިން ސައްހަ ވޯޓު ދީފައިވަނީ 20،140 މީހުންނެވެ. އެއީ މާލޭގެ ވޯޓުލެވޭ އާބާދީގެ 38.95 އިންސައްތައެވެ.
ސައްހަ ވޯޓު ދިން މީހުންގެ ތެރެއިން ވެސް ޑރ. މުއިއްޒަށް ވޯޓު ދިނީ 12،449 މީހުންނެވެ. އެއީ ވޯޓުގެ 61.81 އިންސައްތައެވެ. މިހިސާބުން އަދި މާލޭގެ ރައްޔިތުން ޑރ މުއިއްޒަށް އަޣުލަބިއްޔަތު ދިން ކަމަށް ބުނެވޭކަށް ނެތެވެ. އަދިވެސް ތަފާސްހިސާބުތައް ހުޅުވާލާނަމެވެ. އެމްޑީޕީގެ ސަޕޯޓަރުން ޑރ މުއިއްޒަށް ވޯޓު ދިން ކަމަށް ބުނެ ދައްކާ ވާހަކައަކީ ވެސް ފޮލާއެކެވެ. އެވާހަކަވެސް އަދި ތަފްސީލުކޮށްލާނަމެވެ. ޑރ މުއިއްޒުގެ އަސްލު ސައިޒް ހާމަކޮށްލަން ބޭނުމެވެ.
ލޯކަލް ކައުންސިލް އިންތިޚާބުގައި މާލެ ސިޓީން ވޯޓުލުމުގެ ހައްގު ލިބިގެންވާ 51،702 މީހުން ތިބި އިރު، މި މީހުންގެ ތެރެއިން ޑރ މުއިއްޒަށް ލިބުނީ މާލޭގެ ވޯޓުލެވޭ އާބާދީ ނުވަތަ ކަންކަން ނިންމުމުގައި ބަސް ބުނަން ތިބި ރައްޔިތުންގެ އެންމެ 24.07 އިންސައްތަ ވޯޓެވެ. އާބާދީގެ 4 ބައިކުޅަ 1 ބައި ވެސް ނުލިބެއެވެ. މި އަދަދަށް ބަލާއިރު، އެންމެ ފަހުން ބޭއްވި ރިޔާސީ އިންތިޚާބުގައި މާލެ ސިޓީން ޕީޕީއެމަށް ލިބުނު ވޯޓަށް ވުރެ ވެސް ޑރ މުއިއްޒަށް ލިބުނު ވޯޓުގެ އަދަދު ދެބައިކުޅަ އެއްބަޔާ އެއްވަރަށް މަދެވެ.
2018 ވަނަ އަހަރުގެ ރިޔާސީ އިންތިހާބުގައި އެއިރު ޕީޕީއެމްގެ ޓިކެޓުގައި ވާދަކުރެއްވި ކުރީގެ ރައީސުލް ޖުމްހޫރިއްޔާ އަބްދު ﷲ ޔާމީނަށް ލިބިވަޑައިގެންނެވީ މާލޭގެ ވޯޓުލެވޭ އާބާދީގެ 40.5 އިންސައްތައެވެ. އެހެންކަމުން ކުރިން އަޅުގަނޑު މި ރިޕޯޓުގައި ފާހަގަކުރި ގޮތަށް އެމްޑީޕީގެ ސަޕޯޓަރުން ޑރ މުއިއްޒަށް ވޯޓެއް ނުދެއެވެ. އެއިރުވެސް ޕީޕީއެމަށް ލިބުނީ 12 ހާހެއްހާ ވޯޓެވެ. މިފަހަރު ވެސް ލިބުނީ ހަމަ އެ އަދަދެވެ. އެހެންކަމުން އަމިއްލަ ޚިޔާލީ ފޮލާއެއްގެ މައްޗަށް ބުރަވެ ހުރެ ތިމަންނާއަށް އެމްޑީޕީގެ ސަޕޯޓަރުން އަދި މާލޭގެ ރައްޔިތުން ތާއީދު ކުރި ކަމަށް ބުނެވޭކަށް ނެތެވެ. މާލެއިން ލިބުނީ އެންމެ 12،000 އެއްހާ ވޯޓެވެ. އެންމެ 24 އިންސައްތައެވެ.
މިކަމުން ދައްކައިދެނީ 7 އަހަރު ދުވަހު މިނިސްޓަރުކަމުގައި ހުރެގެން އެކުވެރިންނާއި އާއިލާ މީހުންނާއި ތިމާގެ މީހުންނާއި ޕާޓީގެ ކުދިންކޮޅަށާއި ޕީޕީއެމް އޮފީހުން ނެރޭ ލިސްޓްތަކަށް ފުލެޓް ބަހާލުން ރައްޔިތުންނަށް އޯކޭ ނޫންކަމެވެ. މިއިން ދައްކުވައިދެނީ އެއިރުވެސް ޚުދުމުޚުތާރުކަމަށް ބާރުދިން 12 ހާހެއްހާ މީހުން ޑރ މުއިއްޒަށް ބާރުދީ 7 އަހަރު މާލޭގެ ރައްޔިތުންނަށް ކުރި ޖެއްސުން އަލުން ތަކުރާރު ކުރުމަށް ފުރުސަތު ދިން މަންޒަރެވެ. މާލޭގެ ރައްޔިތުންގެ އަޣުލަބިއްޔަތެއް ނެތްތާގައި މާލޭގައި ފިޔާތޮށި ބެނާތަނުން ވި ވައުދުތައް އިންތިޚާބު ކާމިޔާބުވިކަން ޔަގީންވި ދުވަހު ދައްކާކަށް މުއިއްޒަކަށް ނުވެސް އެނގުނެވެ. ދެއްކީ ރައްޔިތުންގެ ލާރިން ވައްކަން ކޮށްގެން ޖަލުގައި އޮތް ކުށްވެރިއަކު މިނިވަން ކުރުމުގެ ވާހަކައެވެ.
