ފައިޒާ ވެކްސިންޖެހުމަށް އެޕޮއިންޓްމެންޓަށް ގަޑިއަށް އައުމަށް އިލްތިމާސްކޮށްފި
ރާއްޖޭގައި މިވަގުތު ބޭނުންކުރުމަށް ހުއްދަ ދީފައިވަނީ ކޮވިޝީލްޑް ވެކްސިނާއި، ސިނޮފާމް އަދި ފައިޒާ ވެކްސިން
ފައިޒަރ ވެކްސިން
ކޮވިޑް-19އިން ރައްކާތެރިވުމަށް ޖަހާ ފައިޒާ ވެކްސިން ޖެހުމަށް އެޕޮއިންޓްމެންޓަށް ގަޑިއަށް އައުމަށް އިލްތިމާސްކޮށްފިއެެވެ.
ބައެއް ނުރައްކާތެރިބަލިތަކަށް ފަރުވާ ހޯދާ ކުޑަކުދިންނާއި ބޮޑެތި މީހުންނަށް ފައިޒާ ވެކްސިން ޖަހަން އޭޕްރީލް 5 ވަނަ ދުވަހު ވަނީ ހުޅުވާލާފައެވެ. ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބޭއްވި ނޫސްވެރިންގެ ބައްދަލުވުމުގައި އެޗްއީއޯސީގެ ތަރުޖަމާން ޑރ. ނަޒްލާ ރަފީގް ވިދާޅުވީ އެޕޮއިންޓްމަންޓް އުސޫލުން ބައެއް މީހުންނަށް ފައިޒާ ވެކްސިން ޖަހަން ފަށާފައިވާ ކަމަށެވެ. އެގޮތުން ވެކްސިން ޖަހަނީ ހަށިގަނޑުގެ ގުނަވަނެއް ބަދަލުކޮށްފައިވާ މީހުންނާއި، ޑައިލަސިސް ހަދަމުން އަންނަ މީހުންނާއި، ކެންސަރު ބަލީގެ ފަރުވާއަށް ކީމޯތެރަޕީ ހޯދަމުން އަންނަ މީހުންގެ އިތުރަށް ހަށިގަނޑުގެ ދިފާއީ ނިޒާމު ބަލިކަށިކޮށްލާ ފަދަ ބޭހެއް ބޭނުންކުރަމުން އަންނަ މީހުންނަށްކަމަށް ޑރ. ނަޒްލާ ވިދާޅުވިއެވެ.
ޑރ. ނަޒްލާ ވިދާޅުވީ ފައިޒާ ވެކްސިންއަކީ އަދި 18 އަހަރުން ދަށުގެ ކުދިންނަށް ޖަހަން ރާއްޖޭގައި އާންމު ހާލަތްތަކުގައި ހުއްދަ ދީފައިވާ ވެކްސިނަކަށް ނުވި ނަމަވެސް، އެ ހާލަތުގައި ތިބި އުމުރުން 16 އަހަރާއި 17 އަހަރުގެ ކުދިންނަށްވެސް ވެކްސިން ޖެހުމުގެ ފުރުސަތު ހުޅުވާލާފައިވާ ކަމަށެވެ. އަދި އޭގެ އިތުރަށް އެ އުމުރުފުރާގެ ކުދިންގެ ތެރެއިން ހަކުރު ބަލި އަދި ސިކްލް ސެލް އެނީމިއާ ހުންނަ ކުދިންނާއި، ޑައުން ސިންޑްރޯމް ސިސްޓިކް ފައިބްރޯސިސްއާއި ފުއްޕާމޭގެ ބައެއް އެހެން ބަލިތައް ހުންނަ ކުދިންނަށްވެސް ވެކްސިންޖެހުމުގެ ފުރުސަތު ހުޅުވާލާފައިވާކަމަށް ވިދާޅުވިއެވެ. އަދި މީގެ އިތުރަށް އުފެދުމުގައި ހިތުގެ ބައްޔެއް ހުރެ އެކަން ރަނގަޅުކުރަން ސަރޖަރީއެއް ހަދާފައިވާ ކުދިންގެ ތެރެއިން ރަނގަޅު ނުވާ އެ އުމުރުފުރައިގެ ކުދިންނަށް ފައިޒަރ ވެކްސިން ޖެހޭނެކަމަށްވެސް ޑރ.ނަޒްލާ ވިދާޅުވިއެވެ.
މިވެކްސިން ޖެހުމަށް އެޕޮއިންޓްމަންޓް ހަދައިގެން ވެކްސިން ޖަހަން ފަށާފައިވާއިރު، އެޕޮއިންޓްމަންޓަށް މީހުން ގަޑިއަށް ނާންނަކަން އެޗްޕީއޭއިން ވަނީ ފާހަގަކޮށްފައެވެ. ކޮވެކްސް ފެސިލިޓީގެދަށުން ރާއްޖެއަށް ލިބިފައިވަނީ ފައިޒާ ވެކްސިންގެ 5500 ޑޯޒް ކަމުގައިވާއިރު، މި ވެކްސިންގެ ވައިލްއެއް ކަނޑާތާ 6 ގަޑިއިރުގެ ތެރޭގައި ބޭނުންކުރަން ޖެހޭކަމަށް އެޗްޕީއޭއިން ވަނީ ބުނެފައެވެ. މި ވަގުތުގައި ބޭނުން ނުކުރެވިއްޖެނަމަ 70- ޑިގްރީގައި ބަހައްޓަން ޖެހޭ މި ވެކްސިން ބޭކާރުވެ އެއްލާލަން ޖެހޭކަމަށް އެޗްޕީއޭއިން ބުނެއެވެ. މިއާއެކު މި ވެކްސިން ޖެހޭ މީހުންގެ އަދަދު މަދުވާނެކަމަށް އެޗްޕީއޭއިން ވަނީ ބުނެފައެވެ.
ރާއްޖޭގައި މިހާރު އާންމު އުސޫލުން ބޭނުންކުރަމުން އަންނަނީ އިންޑިއާގެ ކޮވިޝީލްޑް ވެކްސިންއާއި ޗައިނާގެ ސިނޮފާމް ވެކްސިންއެވެ. އޭގެ ތެރެއިން މިހާތަނަށް ދެ ލައްކައަށްވުރެ ގިނަ މީހުން ކޮވިޝީލްޑް ވެކްސިންްގެ ފުރަތަމަ ޑޯޒު ޖަހާފައިވާއިރު މިދިޔަ މަހުގެ 15ން ފެށިގެން ޖަހަމުން އަންނަނީ ސިނޮފާމް ވެކްސިންގެ ފުރަތަމަ ޑޯޒެވެ. އަދި ކޮވިޝީލްޑް ވެކްސިންގެ ދެވަނަ ޑޯޒު ޖެހުން މިހާރު ވަނީ ފަށާފައެވެ. ރާއްޖޭގައި މިވަގުތު ބޭނުންކުރުމަށް ހުއްދަ ދީފައި ވަނީ ކޮވިޝީލްޑް ވެކްސިންއާއި، ސިނޮފާމް އަދި ފައިޒާ ވެކްސިންއެވެ.
