މިއަދު ދިމާވިކަމަކީ ސިޔާސީ ޕާޓީތަކުގެ ޒިންމާ ކުޑަކަމުން ވެގެންދިޔަ ކަމެއް – ޝަރީފް
13 އެޕްރީލު 2021 | އަންގާރަ 17:32މިކަހަލަ ހަމަނުޖެހުމެއް މީގެކުރިން ހިނގާފައެއް ނުވޭ
އިލެކްޝަންސް ކޮމިޝަންގެ ރައީސް އަހުމަދު ޝަރީފް
އިލެކްޝަން ކޮމިޝަނުގެ އިންތިޚާބީ މަރުކަޒު ކަމަށްވާ ބާ ޖަމާލުއްދީންގައި ހިނގައިދިޔަ ކަންތަކަކީ ސިޔާސީ ޕާޓީތަކުގެ ޒިންމާ ކުޑަވެގެން ވީ ކަމެއް ކަމަށް އިލެކްޝަންސް ކޮމިޝަނުގެ ރައީސް އަހުމަދު ޝަރީފް ވިދާޅުވެއްޖެއެވެ.
ރާއްޖެޓީވީން ގެނެސްދޭ ފަލަ ސުރުޚީ ޕްރޮގްރާމްގައި ވާހަކަ ދައްކަވަމުން ޝަރީފް ވިދާޅުވީ ސުލްހަވެރިކަމާއެކު ވޯޓުގެ ނަތީޖާ ކަށަވަރު ކުރުމަށް ސެކިއުރިޓީ އުރަތައް ކެނޑުމަށް މަސައްކަތް ކުރަމުން ދަނިކޮށް އިދިކޮޅު ޕާޓީތަކުންނާއި ސަރުކާރު ހިންގާ މައި ޕާޓީގެ އިސްވެރިން ބާ ޖަމާލުއްދީންއަށް އެއްވެ ހިނގިކަމެއް ހިނގީ ޕާޓީތަކުގެ ޒިންމާ ކުޑަވެގެން ކަމަށެވެ.
ޝަރީފް އިތުރަށް ވިދާޅުވީ، އަންގާރަ ދުވަހު ހިނގާދިޔަ ކަންކަމާއި ގުޅިގެން ރައްކާތެރިކަމުގެ ފިޔަވަޅުތަކެއް އަޅަން ޖެހިފައިވާ ކަމަށާއި، މީގެ ކުރިން ވަރަށް ވާދަވެރި ފޮށިތައް ކަނޑައިގެންވެސް ނަތީޖާ ބަލާފައިވާނެ ކަމަށާއި، އެކަމަކު މިކަހަލަ ކަމެއް އޭރު ހިނގާފައި ނުވާ ކަމަށެވެ. އަންގާރަ ދުވަހު ހިނގާދިޔަ ކަންކަމާއި ގުޅިގެން ކުރިޔަށް އޮތް ތަނުގައި މިފަދަ ކަމެއް ކުރާނަމަ ކުރާނީ ރައްކާތެރިކަމުގެ ފިޔަވަޅުތައް އެޅުމަށް ފަހުގައި ކަމަށެވެ.
ޝަރީފް ވިދާޅުވީ އިންތިޚާބީ ކަންކަމުގައި ހޭލުންތެރި މީހުންނަށް ވޯޓު ބަދަލުކުރުން ނުވަތަ ސެކިއުރިޓީ އުރަ ކެނޑުމުން ނަމްބަރު ބަދަލުވާނެ ކަން އެނގޭނެ ކަމަށާއި، ސެކިއުރިޓީ އުރަ ބަންދު ކުރުމަށްފަހު އެ އުރަ ނުކެނޑޭނެ ކަމަށާއި، އުރަ ޖެހޭނީ ވީދާލަން ކަމަށެވެ. އެހެންކަމުން ސެކިއުރިޓީ އުރައިގެ ނަމްބަރު ބަދަލުވާނެކަން އެންމެނަށްވެސް އެނގޭނެ ކަމަށެވެ. ވޯޓު އޮޅުވާލުމާއި، ވޯޓުގެ ނަތީޖާ ބަދަލުކުރުން އެއީ ނުވާނެ ކަމެއް ކަމަށްވެސް ޝަރީފް ވިދާޅުވިއެވެ.
މީގެ ކުރިން ނޫސްވެރިންގެ ބައްދަލުވުމުގައި ވާހަކަދައްކަމުން ޝަރީފް ވިދާޅުވީ ކުރިޔަށް އޮތް ތަނުގައި މިގޮތަށް ވޯޓު ގުނާނަމަ އާންމުންނަށް ވޯޓު ގުނާ ތަނުގައި ހަރަކާތްތެރިވުމުގެ ފުރުސަތެއް ނޯންނާނެ ކަމަށާއި، އެކަމަކު ކެންޑިޑޭޓުންނާއި ކެންޑިޑޭޓުންގެ މަންދޫބުން އަދި މީޑިއާއަށް އެ ފުރުސަތު އޮންނާނެ ކަމަށެވެ.
ޝަރީފް ވަނީ އަންގާރަ ދުވަހު ހިނގި ހަމަ ނުޖެހުމާއި ގުޅިގެން ސިޔާސީ ޕާޓީތަކުން ދައްކާފައިވާ ވާހަކަތައް ދޮގު ކުރައްވާފައެވެ. ޝަރީފް ވިދާޅުވީ އީސީން މަސައްކަތް ކުރަނީ އަދި ކުރާނީވެސް ވަކި ފަރާތަކަށް ބުރަ ނުވެ ދެފުށް ފެންނާނެހެން ކަމަށެވެ.
