ފޯބްސް މަޖައްލާއިން ހޮވާ ދުނިޔޭގެ އެންމެ އަގުބޮޑު ފުޓްބޯޅަ ކުލަބުގެ ލިސްޓުގެ އެއްވަނައަށް ބާސެލޯނާ ޖެހިލައިފިއެވެ.

އެމެރިކާގެ މަޝްހޫރު ވިޔަފާރި މަޖައްލާއިން މި ހިސާބުތައް ޖަހާފައިވަނީ މިދިޔަ އަހަރުގެ ރިޕޯޓުތަކަށް ބެލުމަށްފަހުއެވެ. އެގޮތުން މި ލިސްޓުގެ އެއްވަނައިގައި ބާސާ އޮތްއިރު، އެ ކުލަބުގެ އަގަކީ 4.76 ބިލިޔަން ޑޮލަރެވެ. މިއީ މިދިޔަ ދެ އަހަރާ ބަލާއިރު 18 އިންސައްތަ ކުރިއެރުމެކެވެ. އެގޮތުން ބާސާގެ ދަރަނި މިދިޔަ އަހަރެއްހާ ދުވަސް ތެރޭގައި އެއް ބިލިޔަން ޑޮލަރަށްވުރެ އިތުރުވި ނަމަވެސް، މިދިޔަ އަހަރު އެ ކުލަބުގެ އާމްދަނީ އުޅެނީ 792 މިލިޔަން ޑޮލަރުގައެވެ.

މީގެ ކުރިން މި ލިސްޓުގެ އެއްވަނައިގައި އޮތް ރެއާލް މެޑްރިޑް ދެވަނައަށް ވެއްޓުނުއިރު، އެ ކުލަބުގެ އަގަކީ 4.75 ބިލިޔަން ޑޮލަރެވެ. ދެން މި ލިސްޓުގެ ތިންވަނައިގައި އޮތީ ދުނިޔޭގެ ޗެމްޕިއަން ބަޔާން މިއުނިކެވެ. އެގޮތުން ފޯބްސްގެ ތަފާސްހިސާބުތައް ދައްކާގޮތުން އެ ކުލަބުގެ އަގަކީ 4.22 ބިލިޔަން ޑޮލަރެވެ.

މި ފަހަރު ފޯބްސްއިން ހާމަކުރި ދުނިޔޭގެ އެންމެ އަގުބޮޑު ފުޓްބޯޅަ ކުލަބުގެ ލިސްޓުގެ ގަދަ 10 ކުލަބުގެ ތެރޭގައި އިންގްލެންޑުގެ ހަ ކުލަބެއް އެބައޮތެވެ. އެގޮތުން އިނގިރޭސި ކުލަބުތަކުގެ ތެރެއިން އެންމެ ކުރީގައި އޮތީ ލިސްޓުގެ ހަތަރުވަނަ ހޯދި މެންޗެސްޓާ ޔުނައިޓެޑެވެ. އެ ޓީމުގެ އަގު އުޅެނީ 4.2 ބިލިޔަން ޑޮލަރުގައެވެ.

މި ލިސްޓުގެ ފަސްވަނައިގައި އޮތް ލިވަޕޫލުގެ އަގު 4.1 ބިލިޔަން ޑޮލަރުގައި އުޅޭއިރު، ހަވަނައިގައި އޮތް މެންޗެސްޓާ ސިޓީގެ އަގު އުޅެނީ ހަތަރު ބިލިޔަން ޑޮލަރުގައެވެ. ލިސްޓުގެ ހަތްވަނައިގައި އޮތް ޗެލްސީގެ އަގު 3.2 ބިލިޔަން ޑޮލަރުގައި އުޅޭއިރު، އަށްވަނައިގައި އޮތް އާސެނަލުގެ އަގު އުޅެނީ 2.8 ބިލިޔަން ޑޮލަރުގައެވެ. ދެން ގަދަ 10 ކުލަބުގެ ތެރޭގައި ހިމެނޭ ޕީއެސްޖީއަށް ލިސްޓުގެ ނުވަވަނަ ލިބުނުއިރު، އެ ކުލަބުގެ އަގު އުޅެނީ 2.5 ބިލިޔަން ޑޮލަރުގައެވެ. އަދި 10 ވަނައިގައި އޮތް ޓޮޓެންހަމް ހޮޓްސްޕާގެ އަގު އުޅެނީ 2.3 ބިލިޔަން ޑޮލަރުގައެވެ.

ފޯބްސްއިން ހާމަކުރި ދުނިޔޭގެ އެންމެ އަގުބޮޑު ފުޓްބޯޅަ ކުލަބުގެ ލިސްޓުގެ ގަދަ 10 ކުލަބުގެ ތެރޭގައި ޔޫރަޕުގެ ގަދަ ފަސް ލީގުގެ ތެރެއިން، އެއްވެސް ޓީމެއް ނުހިމެނޭ ލީގަކީ އިޓާލިއަން ލީގެވެ. އެގޮތުން މި ލީގުގެ އެންމެ ފަހުގެ ޗެމްޕިއަން ޓީމު ކަމަށްވާ ޔުވެންޓަސް އޮތީ 11 ވަނައިގައެވެ. އަދި އެ ކުލަބުގެ އަގު އުޅެނީ 1.95 ބިލިޔަން ޑޮލަރުގައި ކަމަށް ފޯބްސްއިން ވަނީ ހާމަކޮށްފައެވެ.