ލޯކަލް ކައުންސިލްގެ އިންތިޚާބުގެ މިހާރު ފެންނަންހުރި ނަތީޖާތަކަށް ބަލާއިރު 9 ދާއިރާއެއްގައި އެންމެ ކުރީގައި ތިބި ކެންޑިޑޭޓުންނާއި އެދާއިރާތަކަށް ވާދަކުރި އެމްޑީޕީގެ ކެންޑިޑޭޓުންނާއި ދެމެދުގައި ހުރި ފަރަގު ކުޑަކަމަށް ފާހަގަވާތީ އެދާއިރާތަކުގެ ފުރިހަމަ ނަތީޖާ ދެނެގަތުމަށް މަސައްކަތްކުރަމުން އަންނަކަމަށް އެމްޑީޕީން ބުނެފިއެވެ.
އެޕާޓީން މިކަމާއި ގުޅިގެން ނެރެފައިވާ ބަޔާނެއްގައި ބުނެފައިވަނީ މިމަހުގެ 10 ވަނަ ދުވަހު ބޭއްވި ލޯކަލް ކައުންސިލް އިންތިޚާބުގެ ނަތީޖާ ޝީޓުތަކަށް ބަލާއިރު، މާލޭގެ 18 ގޮނޑީގެ ތެރެއިން 5 ގޮނޑި ވަނީ އެމްޑީޕީން ކާމިޔާބު ކޮށްފައި ކަމަށެވެ. އަދި އައްޑޫ ސިޓީގެ 12 ގޮނޑީގެ ތެރެއިން 6 ގޮނޑިވަނީ އެމްޑީޕީން ކާމިޔާބުކޮށްފައި ކަމަށް މިބަޔާނުގައި ބުނެފައިވެއެވެ.
މާލެއާއި އައްޑޫ ސިޓީ އިން މިޕާޓީން ކާމިޔާބު ކުރި ގޮނޑިތަކުގެ އިތުރުން، މާލޭގެ އެހެން 5 ދާއިރާއެއްގެ ނަތީޖާ ޝީޓާއި އައްޑޫ ސިޓީގެ 4 ދާއިރާއެއްގެ ނަތީޖާ ޝީޓުތަކަށް ބަލާއިރު އެދާއިރާތަކުގައި އެންމެ ކުރީގައި ތިބި ކެނޑިޑޭޓުންނާއި މިޕާޓީގެ ކެންޑިޑޭޓުންނާ ދެމެދު ހުރި ފަރަގަކީ 40 އަކަށް ވޯޓަށްވުރެ ކުޑަ ފަރަގެއް. މިދެންނެވި ކޮންމެ ދާއިރާއެއްގައި މިހާތަނަށް އަދި ނުގުނާ 50-60 ވޯޓު ކަރުދާސް ރާއްޖޭގެ އެކި ރަށްރަށުގައާއި ޖަލުތަކުގައި ހުރިކަން ފާހަގަކުރެވޭ. އަދި މިއިން ކޮންމެ ދާއިރާއެއްގައި ބާޠިލު ވޯޓުގެ ގޮތުގައި 50-90 ވޯޓުކަރުދާސް ހިމެނިފައިވާކަންވެސް ފާހަގަކުރެވޭ.އެމްޑީޕީގެ ނޫސްބަޔާން
އެހެންކަމުން އެމްޑީޕީން ގެންދަނީ އެ ވޯޓުފޮށިތަކުގެ ފުރިހަމަ ނަތީޖާ ދެނެގަތުމުގެ މަސައްކަތް ކުރަމުންކަމަށް އެމްޑީޕީން ނެރެފައިވާ ބަޔާނުގައި ބުނެފައިވެއެވެ. އަދި މިކަންކަން އެހެން ހުރުމުން އެމްޑީޕީއަށް މިހާތަނަށް ކަށަވަރުވެފައިވާ ގޮނޑިތަކުގެ އިތުރުން މާލެ އާއި އައްޑޫ ސިޓީގެ އިތުރު ގޮނޑި ލިބުމުގެ ފުރުޞަތު އޮތްކަމަށް ފާހަގަކުރާކަމަށް މިބަޔާނުގައި ބުނެފައިވެއެވެ.
އެމްޑީޕީން މިމޭރުމުން ނޫސް ބަޔާން ނެރެފައިވާއިރު މީގެކުރީ އިންތިޚާބުތަކުގައި އެމްޑީޕީއަށް ބޮޑު އަޣްލަބިއްޔަތެއް ލިބެމުން އައި މާލެ ސިޓީގެ ގިނަ ގޮނޑިތަކެއް މިފަހަރުގެ އިންތިޚާބުގައި ގެއްލިފައިވާއިރު މާލެ ސިޓީގެ މޭޔަރުކަންވެސް ވަނީ އެޕާޓީއަށް ގެއްލިފައެވެ. މީގެއިތުރުން އެމްޑީޕީން ސާފު އަޣްލަބިއްޔަތު ނަގަމުން އަންނަ އައްޑޫ ސިޓީގެ ސާފު އަޣްލަބިއްޔަތު ވަނީ މިފަހަރުގެ އިންތިޚާބުގައި ގެއްލިފައެވެ.
ބައެއް ފޮށިތަކުގެ ވޯޓް އަލުން ގުނައިދިނުމަށް އެދި އެމްޑީޕީން ވަނީ އިލެކްޝަންސް ކޮމިޝަނަށްވެސް ހުށަހަޅާފައެވެ.
ވޯޓްފޮށިތައް އަލުން ގުނަން ހުށައަޅާފައި ވީނަމަވެސް ނަތީޖާއަށް ބަދަލު އަތުވެދާނެ ފަދަ އެއްވެސް ޝަކުވާއެއް ނެތް ކަމަށް އިލެކްޝަންސް ކޮމިޝަނުން އަންނަނީ ބުނަމުންނެވެ.
ކައުންސިލް އިންތިޚާބުގައި މާލެ ސިޓީން ބޮޑު ނާކާމިޔާބީއަކާއި އެމްޑީޕީއަށް ކުރިމަތިވެފައިވާއިރު އެޕާޓީގެ ރައީސް، ރައީސް މުހައްމަދު ނަޝީދު އާދިއްތަ ދުވަހު ނޫސްވެރިންނާ ބައްދަލުކުރައްވާ ވާހަކަދައްކަވަމުން ވިދާޅުވީ މިފަހަރުގެ ލޯކަލް ކައުންސިލް އަދި އަންހެނުންގެ ތަރައްގީގެ ކޮމެޓީ އިންތިޚާބުން މުޅި ރާއްޖެއިން އެމްޑީޕީ މޮޅުވެއްޖެ ކަމަށާއި މާލޭގެ އިންތިޚާބުން ނާކާމިޔާބު ވެއްޖެކަމަށް ގަބޫލުކުރައްވާކަމަށެވެ.
