ތ. ވޭމަންޑޫން ޕޮޒިޓިވް ކޭސްތަކެއް ފެނިއްޖެ

ތ.ވޭމަންޑޫން ކޮވިޑް-19ގެ ޕޮޒިޓިވް ކޭސްތަކެއް ފެނިފައިވާކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ބުނެފިއެވެ.

ވޭމަންޑޫން ޕޮޒިޓިވް ކޭސްތަކެއް ފެނުމާއި ގުޅިގެން، 15 މާރިޗް 2021 ގެ ފަހުން އެރަށުގައި އުޅުމަށްފަހު އެހެން ރަށަކަށް  ގޮސްފައިވާ މީހެއްނަމަ، އެކަން ވީ އެންމެ އަވަހަކަށް އެރަށެއްގެ ހޮސްޕިޓަލް ނުވަތަ ސިއްޚީ މަރުކަޒަށް އެނގުމަށް އެޗްޕީއޭއިން އިލްތިމާސް ކުރެއެވެ. އަދި އެ ދުވަހުގެ ފަހުން ވޭމަންޑޫން އައި މީހުން 10 ދުވަސް ވަންދެން ކަރަންޓީނުގައި ތިބުމަށް އެޗްޕީއޭއިން އަންގާފައިވެއެވެ.

ހަމަ އެއާއެކު ވޭމަންޑޫން އައިފަހުން 10 ދުވަސް ފާއިތުވެފައިވީ ނަމަވެސް ކޮވިޑަށް ޓެސްޓުކުރުމަށް އެޗްޕީއޭއިން އެދެއެވެ. އެގޮތުން، ސާމްޕަލް ނެގުމުގެ ކަންކަން އެރަށެއްގައި ހުންނަ ހޮސްޕިޓަލް ނުވަތަ ސިއްހީ މަރުކަޒުން ހަމަޖެހިގެންދާނެ ކަމަށް އެޗްޕީއޭއިން މައުލޫމާތުދެއެވެ.

އެޗްޕީއޭއިން ބުނީ، ވޭމަންޑޫން މާލެއަށް އައިސްފައިވާ މީހުންގެ ސާމްޕަލް  މާލެހިޔާ ކައިރީގައި ހުންނަ ފްލޫ ކްލިނިކް، ހުޅުމާލޭ ފްލޫ ކްލިނިކް، ނުވަތަ ވިލިމާލޭ ފްލޫ ކްލިނިކަށް ގޮސް ނެގޭނެ ކަމަށެވެ. އަދި ލިބޭ ނަތީޖާ ނެގެޓިވް ވީކަމުގައި ވިޔަސް، ވޭމަންޑޫން އެހެން ރަށްރަށަށް ނުވަތަ މާލެ އައި މީހުން، އެނބުރި އައި ދުވަހުންފެށިގެން 10 ދުވަސް ވަންދެން ކަރަންޓީނުގައި ތިބުމަށް އެޗްޕީއޭއިން އިލްތިމާސްކުރެއެވެ.

މީގެ އިތުރުން ވޭމަންޑޫން އެހެން ރަށްރަށަށް ގޮސްފައިވާ މީހުން، އެރަށަށް ކުރި ދަތުރުގެ މައުލޫމާތު 1676 ހިއްސާކުރުމަށް އެޗްޕީއޭއިން އެދެއެވެ.

ފަހަކަށް އައިސް މާލޭގައި ކޮވިޑް ކޭސްތައް އެއްވަރެއްގައި ހިފެހެއްޓިފައި ވީނަމަވެސް، އަތޮޅުތެރޭގެ ގިނަ ރަށްތަކުންދަނީ ކޮވިޑް ކޭސްތައް ފެންނަމުންނެވެ.