މުޅި ރާއްޖޭގައި ލޯކަލް ކައުންސިލް އިންތިހާބުގެ ވޯޓުލާން ފަށައިފި
6 މެއި 2017 | ހޮނިހިރު 07:55މިފަހަރުގެ ލޯކަލް ކައުންސިލް އިންތިހާބުގައި 422 ވޯޓް ފޮށި ބަހައްޓާފައިވޭ
ލޯކަލް ކައުންސިލް އިންތިހާބުގެ ވޯޓުލުން ކުރިއަށްދަނީ
ތިންވަނަ ލޯކަލް ކައުންސިލް އިންތިހާބުގެ ވޯޓުލުން މުޅި ރާއްޖޭގައި ފަށައިފިއެވެ.
ރާއްޖޭގެ ހުރިހާ ސަރަހައްދެއްގައި މިއަދުގެ އެއްވަގުތެއްގައި ވޯޓުލުން ފެށިއިރު، މައިގަނޑު ގޮތެއްގައި މިފަހަރުގެ އިންތިހާބުގައި ވާދަކޮށްފައިވަނީ ސަރުކާރު އިދިކޮޅު އެމްޑީޕީ އާއި ސަރުކާރު ހިންގާ ޕާޓީ ކަމަށްވާ ޕީޕީއެމްގެ ކެނޑިޑޭޓުންނެވެ. މީގެ އިތުރުންވެސް އަމިއްލަ ގޮތުންނާއި އަދި ބައެއް ޕާޓީތަކުން އެކި ފަރާތްތައް މި އިންތިހާބުގައި ވާދަކުރެއެވެ.
މިއަދުގެ އިންތިހާބުގައި ވޯޓުލުމަށް ބައެއް ސަރަހައްދުތަކުގައި ކިއު ހަދާފައިވާ އިރު، ގއ. ކޮލަމާފުށީ ވޯޓުލާ މަރުކަޒަށް ފުލުހުންގެ ބެލުމުގެ ދަށުން މިހާރު ވަނީ ވޯޓު ފޮށި ގެނެސްފައެވެ. މީގެ އިތުރުން އެރަށު ވޯޓުލާ މަރުކަޒު ކައިރިއަށް ހެނދުނު 6:15 އިން ފެށިގެން މީހުން ވަނީ ކިއުއަށް އަރަން ފަށާފައެވެ.
ބައެއް ރަށްރަށުގެ ވޯޓާސް ލިސްޓު އެ ރަށްރަށުގެ އޮބްޒާވަރުންނަށް ވޯޓާސް ލިސްޓް ލިބިފައިވާ ނުވާއިރު، އިލެކްޝަނުން އެފުރުސަތު ތަނަވަސްކޮށްދީފައި ނުވާކަން އެފަރާތްތަކުން ވަނީ ބުނެފައެވެ.
މިފަހަރުގެ ލޯކަލް ކައުންސިލް އިންތިހާބުގައި 422 ވޯޓް ފޮށި ބަހައްޓާފައިވާއިރު، ވޯޓް ދިނުމުގެ ހައްގު ލިބިގެންވާ ޖުމުލަ މީހުންގެ އަދަދަކީ 255،987 އެވެ.
ތިން ވަނަ ލޯކަލް ކައުންސިލް އިންތިހާބު މި ބާއްވަނީ، ތިން ވަނަ ފަހަރަށް ފަސްކުރުމަށް ފަހު އެވެ. ފުރަތަމަ މި އިންތިހާބު ބާއްވަން ތާވަލްކުރީ ޖެނުއަރީ، 14، 2016 ވަނަ ދުވަހު އެވެ.
ނަމަވެސް ޕީޕީއެމުން ކޯޓަށް ހުށަހެޅި މައްސަލައަކާ ގުޅިގެން އިންތިހާބު ދެ މަސް ދުވަހަށް ފަސްކުރި އެވެ. އެއަށް ފަހު ދެން އިންތިހާބު ބާއްވަން އުޅުނީ އޭޕްރީލް 8 ގަ އެވެ. އޭގެ ފަހުން ސްކޫލްތައް ނުލިބޭ ކަމަށް ބުނެ އިންތިހާބު އޭޕްރީލް 15 އަށް ފާސްކުރި އެވެ.
އަދި މެއި 6 އަށް އިންތިހާބު ފަސްކުރީ އެޗްވަންއެންވަން ރޯގާ އާ ގުޅިގެންނެވެ.
