60،000 ލީޓަރުގެ ތެޔޮ ބަރުކޮށްގެން ދިޔަ ބާޖެއްގައި ރޯވެ އަޑިއަށް ހިނގައްޖެ
10 އެޕްރީލު 2021 | ހޮނިހިރު 13:55އަލިފާން ނިއްވުމުގެ މަސައްކަތް އެމްއެންޑީއެފުން މިހާރު ދަނީ ކުރަމުން
އެނބޫދޫފިނޮޅު ކައިރީގައި އޮތް ތެޔޮބޯޓުގައި އަލިފާން ރޯވެ އަނދަނީ
60،000 ލީޓަރުގެ ތެޔޮބަރުކޮށްގެން ދަތުރުކުރަމުން ދިޔަ ތެޔޮ ބާޖެއްގައި އަލިފާން ރޯވެ އަޑިއަށް ހިނގައްޖެއެވެ.
މި ބާޖުގައި އަލިފާން ރޯވެފައިވަނީ، ތެޔޮ ބަރުކޮށްގެން، މާލެއިން ފުރައިގެން ލ. އަތޮޅަށް ދަތުރު ކުރަމުން ދަނިކޮށެވެ. ބާޖުގައި އަލިފާން ރޯވިއިރު، ދަތުރުކުރަމުން ދިޔައީ ކ. އެނބޫދޫފިނޮޅު ކައިރިންނެވެ.
ހާދިސާ ހިނގިއިރު ބާޖުން ދަތުރުކުރަމުން ދިޔައީ ހަތަރު މީހުންނެވެ. އެ ހަތަރު މީހުން ވަނީ އެވަގުތު ސަރަހައްދުން ދަތުރު ކުރަމުން ދިޔަ އުޅަނދެއްގައި މާލެ ގެނެސްފައެވެ.
ބާޖު އަޑިއަށް ދިޔައީ އަލިފާން ނިއްވުމުގެ މަސައްކަތުގައި އެމްއެންޑީއެފްގެ ފަޔަރ އެންޑް ރެސްކިއު ސާވިސް އިން ހަރަކާތްތެރިވަމުން ދަނިކޮށެވެ. އެމްއެންޑީއެފުން ބުނީ، ތެޔޮ ބާޖުގައި އަލިފާން ރޯވެފައިވާ ކަމުގެ މައުލޫމާތު ލިބިފައިވަނީ މިއަދު 17:50 ހާއިރު ކަމަށެވެ.
