ހޮނިހިރު ދުވަހުން ފެށިގެން އިންތިޚާބާ ގުޅޭ ޝަކުވާ ހައިކޯޓަށް ހުށައެޅޭނެ

ލޯކަލް ކައުންސިލް އިންތިޚާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިޚާބާއި ގުޅިގެން ހުށައަޅަން ބޭނުންވާ ޝަކުވާ ހުށައެޅުމުގެ ފުރުސަތު ހޮނިހިރު ދުވަހުން ފެށިގެން ހުޅުވާލެވިފައިވާކަމަށް ދިވެހިރާއްޖޭގެ ހައިކޯޓުން ބުނެފިއެވެ.

އިންތިޚާބީ ޝަކުވާގެ މައްސަލަތައް ފުރަތަމަ މަރުހަލާގައި ބެލުމުގެ އިހުތިސާސް ލިބިގެންވަނީ އެ ކޯޓަށްކަން ފާހަގަކޮށް ހައިކޯޓުން ބުނީ، ހޮނިހިރު ދުވަހު އޮންނަ އިންތިޚާބާއި ގުޅިގެންވެސް ފަސޭހަކަމާއެކު ޝަކުވާ ހުށައެޅުމުގެ ފުރުސަތު މިހާރު ހުޅުވާލެވިފައިވާ ކަމަށެވެ. އެގޮތުން ކުރިއަށް އޮތް 3 ދުވަހުވެސް ހައިކޯޓުގެ ރިސެޕްޝަން ހުޅުވާފައި ހުންނާނެކަން ފާހަގަކޮށް ހައިކޯޓުން ބުނީ، އޭޕްރީލް 10، 11 އަދި 12 ވަނަ ދުވަހު ހެނދުނު 0900ން ފެށިގެން ރޭގަނޑު 2200ށް ހައިކޯޓުގެ ރިސެޕްޝަން ހުޅުވާފައި ހުންނާނެ ކަމަށެވެ.

އޭގެ އިތުރުން، އޭޕްރީލް މަހުގެ 12 ވަނަ ދުވަހަކީ ރަމަޟާން މަހުގެ ފުރަތަމަ ދުވަހަށް ވެއްޖެނަމަ، އެދުވަހުގެ ހެނދުނު 0900ން ފެށިގެން މެންދުރު ފަހު 1500ށް އަދި ރޭގަނޑު 2100ން ފެށިގެން 2300ށް ވެސް ޝަކުވާ ހުށައެޅުމުގެ ފުރުސަތު ލިބިގެންދާނެކަމަށް ހައިކޯޓުން މައުލޫމާތުދެއެވެ.

ހައިކޯޓުން ވަނީ އިންތިޚާބާއި ގުޅޭ ޝަކުވާތައް އޮންލައިންކޮށްވެސް ހުށައެޅުމަށް ފުރުސަތު ހުޅުވާލާފައެވެ. އެގޮތުން އިންތިޚާބާއި ގުޅޭ ޝަކުވާތައް elections@highcourt.gov.mv ށް މެއިލް ކުރުމަށް ހައިކޯޓުން ވަނީ އެދިފައެވެ. އަދި އެހެން ގަޑިއެއްގައި މައުލޫމާތު ހޯދަން ބޭނުންނަމަ، 7902206ށް ގުޅައި މައުލޫމާތު ސާފު ކުރުުމަށް އެދިފައިވެއެވެ.

އޭޕްރީލް މަހުގެ 10 ވަނަ ދުވަހު ބާއްވާ ލޯކަލް ކައުންސިލްތަކުގެ އިންތިޚާބަކީ ލާމަރުކަޒީ ނިޒާމު ރާއްޖެއަށް ތައާރަފްވީ ފަހުން ބާއްވާ 4 ވަނަ އިންތިޚާބެވެ.