"ސޭފަރ އިންޓަނެޓް ޑޭ" ކުރެހުމުގެ މުބާރާތުގެ ވަނަވަނައަށް ދިޔަ ކުދިން ހޮވައިފި
9 އެޕްރީލު 2021 | ހުކުރު 12:46"ސޭފާ އިންޓަނެޓް އެމްބެސެޑަރ" ސެޓްފިކެޓާއި ބެޖް 12 ދަރިވަރަކަށް ވަނީ ދީފައި
"ސޭފަރ އިންޓަނެޓް ޑޭ" ކުރުމުގެ މުބާރާތުގެ އިނާމު ހާސިލުކުރި ބައެއް ކުދިން
"ސޭފަރ އިންޓަނެޓް ޑޭ" ކުރެހުމުގެ މުބާރާތުގެ ވަނަ ވަނައަށް ދިޔަ ކުދިން ހޮވައިފިއެވެ.
ބައިނަލްއަގުވާމީ ސޭފަރ އިންޓަނެޓު ދުވަހާ ގުޅުވައިގެން ކުޑަކުދިންނަށް ޚާއްސަ ކުރެހުމުގެ މުބާރާތް އިންތިޒާމުކުރީ މިނިސްޓްރީ އޮފް ކޮމިއުނިކޭޝަން ސައިންސް އެންޑް ޓެކްނޮލޮޖީންނެވެ. މިއަހަރުގެ ފެބްރުއަރީމަހުގެ 7 ވަނަ ދުވަހު ފާހަގަކުރި "ސޭފަރ އިންޓަރނެޓް ޑޭ"އާ ގުޅިގެން ބޭއްވި މި މުބާރާތް ކުރިއަށްގެދިޔައީ 3 އުމުރުފުރައަކަށް ބަހާލައިގެންނެވެ. އެއީ 7 އަހަރުން ދަށުގެ އުމުރުފުރާ، 7 އަހަރާއި 11 އަހަރާއި ދެމެދުގެ އުމުރުފުރާ އަދި 12 އަހަރާއި 16 އަހަރާ ދެމެދުގެ އުމުރުފުރައެވެ.
7 އަހަރުން ދަށުގެ އުމުރު ފުރައިން 1 ވަނައަށް ގޮސްފައިވަނީ އައިލީ ބިންތް އަލީ ޝާކިރު، ގދ. ކަނޑުހުޅުދޫއެވެ. 2 ވަނައަށް ގޮސްފައިވަނީ އައްޝަމް އަލީ ރަޝީދު، ލ. ހިތަދޫ ހުށަހެޅި ކުރެހުމެވެ. އަދި 3 ވަނައަށް ދިޔައީ ބަތޫލް ބިންތި ހަސަން ސަނީޒް، ކ.ގުރައިދޫ ހުށަހެޅި ކުރެހުމެވެ. 7 އަހަރާއި 11 އަހަރާއި ދެމެދުގެ އުމުރު ފުރައިން 1 ވަނައަށް ގޮސްފައިވަނީ އައިޝަތު ޔޫލީ އަޒްހަން، ލ. ފޮނަދޫ އެވެ. 2 ވަނައަށް ގޮސްފައިވަނީ ފާތިމަތު ލާރާ ފާރިޝް ހުށަހެޅި ކުރެހުމެވެ. އަދި 3 ވަނައަށް ދިޔައީ ލައާލީ ޝަފްނީޒް މޫސާ، މާލެ ހުށަހެޅި ކުރެހުމެވެ. 12 އަހަރާއި 16 ދެމެދުގެ އުމުރު ފުރައިން 1 ވަނައަށް ގޮސްފައިވަނީ އާމިނަތު ފައިހާ ފަޒީލް، މާލެ އެވެ. 2 ވަނައަށް ގޮސްފައިވަނީ އަމަލް އަހުމަދު ޝިފާއު، ސ.ހިތަދޫ ހުށަހެޅި ކުރެހުމެވެ އަދި 3 ވަނައަށް ދިޔައީ އައިޝަތު ލައިޝާ ޝިހާމް، ސ.މީދޫ ހުށަހެޅި ކުރެހުމެވެ. މި ރަސްމިއްޔާތުގައި އިންޓަނެޓް ބޭނުން ކުރުމަށް ސްކޫލްތަކުގައި އިސްނަގައި ޕްރޮމޯޓްކުރުމަށް މާލޭގެ ބައެއް ސްކޫލްތަކުން ބައިވެރިވި ކުދިންގެ ތެރެއިން 12 ކުއްޖަކަށް "ސޭފާ އިންޓަނެޓް އެމްބެސެޑަރ" ސެޓްފިކެޓާއި ބެޖް ވަނީ ދީފައެވެ.
"ސޭފަރ އިންޓަނެޓް ޑޭ" ކުރެހުމުގެ މުބާރާތުގެ ވަނަ ވަނައަށް ދިޔަ ކުދިންނަށް އިނާމު ދިނުމަށް ބޭއްވި ރަސްމިއްޔާތު ޝަރަފުވެރިކޮށްދެއްވީ މިނިސްޓަރ އޮފް ހަޔަރ އެޑިއުކޭޝަން ޑ.ރ. އިބްރާހިމް ހަސަނެވެ. މީގެ އިތުރުން މިނިސްޓަރ އޮފް ސްޓޭޓް ފޮރ ކޮމިއުނިކޭޝަން ސައިންސް އެންޑް ޓެކްނޯލޮޖީ، އަލީ ސާލިހްވެސް މި ރަސްމިއްޔާތުގައި ބައިވެރިވެވަޑައިގެންނެވިއެވެ.
ބައިނަލްއަގުވާމީ ސޭފަރ އިންޓަނެޓު ދުވަހަކީ ފެބްރުއަރީ މަހުގެ 9 ވަނަ ދުވަހެވެ. އެ ދުވަހަކީ އިންޓަނެޓްގެ ރައްކާތެރިކަން ކަށަވަރުކުރުމާއި، މި ވަސީލަތުގެ ބޭނުން ހެޔޮގޮތުގައި ހިފުމަށް ޒުވާން ޖީލު އަހުލުވެރިކުރުމަށް ފާހަގަކުރާ ދުވަހެކެވެ. މިއަހަރަށް ބައިނަލްއަގުވާމީގޮތުން ސޭފަރ އިންޓަނެޓު ދުވަސް ފާހަގަކުރާތާ 18 އަހަރު ފުރޭނެއެވެ.
