ސަރުކާރު ހިއްސާވާ ކުންފުނިތަކުގެ ޕްރޮކިއުމަންޓް ގައިޑްލައިންގެ ސަބަބުން ކޮރަޕްޝަންނަށް މަގުފަހިވުން ކުޑަކުރެވޭނެކަމަށް މިނިސްޓަރ އޮފް ފިނޭންސް އިބްރާހިމް އަމީރު ވިދާޅުވެއްޖެއެވެ.
ފިނޭންސް މިނިސްޓަރ މިހެން ވިދާޅުވެފައި މިވަނީ، ފުރަތަމަ ފަހަރަށް ސަރުކާރު ހިއްސާވާ ކުންފުނިތަކުން އަމަލުކުރުމަށްޓަކައި ޕްރޮކިއުމަންޓް ގައިޑްލައިންއާއި އަދި ކުންފުނިތަކަށް އަމާޒުކޮށްގެން ތައްޔާރުކުރި ޖޮބް ކްލެސިފިކޭޝަން ފްރޭމް ވޯކް ނެރުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ. ފިނޭންސް މިނިސްޓަރ އަމީރު ވަނީ، ސަރުކާރު ހިއްސާވާ ކުންފުނިތަކުގެ އަދަދު 30ށްވުރެ މަތީގައި އުޅޭއިރު މިއިން ކޮންމެ ކުންފުންޏަކީވެސް ރައްޔިތުންގެ ސީދާ ބޭނުންތަކާ ގުޅިފައިވާ ކުންފުންޏެއްކަމަށް ވިދާޅުވެފައެވެ. މި ސަބަބައްޓަކައި، ހިދުމަތްތަކުގެ އަގު ދަށްކުރުމާއި ހިދުމަތްތަކުގެ ފެންވަރު ރަނގަޅު ކުރުމަށްޓަކައި ރަނގަޅު ޕްރޮކިއުމަންޓް ގައިޑްލައިންއެއް އޮތުމަކީ ކޮންމެހެން މުޙިއްމުކަމެއްކަމަށްވެސް ވިދާޅުވިއެވެ.
މިހާރު ރު ކުންފުނިތަކުން އެކުންފުންޏެއްގެ އަމިއްލަ ޕްރޮކިއުމަންޓް ޕޮލިސީއަކަށް އަމަލުކުރަމުން އަންނައިރު ޕްރޮކިއުމަންޓް ޕޮލިސީ ތަކުގައި ވަރަށް ބޮޑެތި ތަފާތުތަކެއް ހުރިއިރު، މިގޮތަށް މިކަންތައް އޮތުމުގެ ސަބަބުން ކޮރަޕްޝަނަށް މަގުފަހިވާ ގޮތަށް ކަންތައްތައް ކުރުމަށް ބައެއްފަހަރު ފުރުސަތު އޮތްކަމަށް ވިދާޅުވިއެވެ. އެހެންނަމަވެސް، އަލަށް ލޯންޗްކުރެވުނު ޕްރޮކިއުމަންޓް ގައިޑްލައިންގެ ސަބަބުން ސަރުކާރު ހުރިހާ ކުންފުނިތަކުންވެސް އެންމެ ކުޑަ މިންވަރަށް އަމަލުކުރަންޖެހޭނެ ޕްރޮކިއުމަންޓް އުސޫލްތަކެއް ގާއިމްވެގެންދާނެކަމަށް ވިދާޅުވިއެވެ.
ކުންފުނިތަކަކީ ދައުލަތް ހިންގުމުގެ އެންމެ މުހިއްމު އެއް ތަނބު. ސަރުކާރުން ރައްޔިތުންނަށް ދޭން ބޭނުންވާ މައިގަނޑު ގިނަ ހިދުމަތްތަކެއް މި ދެވެނީ ކުންފުނިތައް މެދުވެރިކޮށް. ސަރުކާރު ހިއްސާވާ ކުންފުނިތަކުގެ އަދަދު 30ށްވުރެ މަތީގައި އުޅޭއިރު މިއިން ކޮންމެ ކުންފުންޏަކީވެސް ރައްޔިތުންގެ ސީދާ ބޭނުންތަކާ ގުޅިފައިވާ ކުންފުންޏެއް. އެހެންކަމުން ކުންފުނިތަކުން ފޯރުކޮށްދޭ ހިދުމަތްތަކުގެ އަގު ދަށްކުރުމާއި ހިދުމަތްތަކުގެ ފެންވަރު ރަނގަޅު ކުރުމަށްޓަކައި ރަނގަޅު ޕްރޮކިއުމަންޓް ގައިޑްލައިންއެއް އޮތުމަކީ ކޮންމެހެން މުޙިއްމުކަމެއް. މިހާރު ސަރުކާރު ކުންފުނިތަކުން އެކުންފުންޏެއްގެ އަމިއްލަ ޕްރޮކިއުމަންޓް ޕޮލިސީއަކަށް އަމަލުކުރަމުން އަންނައިރު ޕްރޮކިއުމަންޓް ޕޮލިސީ ތަކުގައި ވަރަށް ބޮޑެތި ތަފާތުތަކެއް ހުރޭ. އަދި މިގޮތަށް މިކަންތައް އޮތުމުގެ ސަބަބުން ކޮރަޕްޝަނަށް މަގުފަހިވާ ގޮތަށް ކަންތައްތައް ކުރުމަށް ބައެއްފަހަރު ފުރުސަތު ލިބިގެންދޭ. މިއަދު މި ލޯންޗްކުރެވުނު ޕްރޮކިއުމަންޓް ގައިޑްލައިންގެ ސަބަބުން ސަރުކާރު ހުރިހާ ކުންފުނިތަކުންވެސް އެންމެ ކުޑަ މިންވަރަށް އަމަލުކުރަންޖެހޭނެ ޕްރޮކިއުމަންޓް އުސޫލްތަކެއް ގާއިމްވެގެންދާނެ.ފިނޭންސް މިނިސްޓަރ އިބްރާހިމް އަމީރު
މި ސަރުކާރު ވެރިކަމާ ހަވާލުވެ އެންމެ އިސްކަންދީގެން ކުރިއަށް ގެންދާ މަސައްކަތްތަކަކީ ކުންފުނިތަކުގެ ނިޒާމުތައް ހަރުދަނާ ކުރުންކަން ފާހަގަކުރައްވާ މިނިސްޓަރ އަމީރު ވަނީ، ޖޮބް ކްލެސިފިކޭޝަން ފްރޭމް ވޯކްގެ ސަބަބުން ކުންފުނިތަކުގެ މުވައްޒަފުންނަށް ހެދިފައިވާ އުސޫލް އިތުރަށް ހަރުދަނާވެ، ޚިދުމަތް ފުރިހަމަ ގޮތުގައި ދިނުމަށް ބާރު އެޅިގެންދާނެކަމަށް ވިދާޅުވެފައެވެ. އެގޮތުން މުވައްޒަފުން ނެގުމުގައާއި މުވައްޒަފުންނަށް ކުރިއެރުން ދިނުމުގައި މި ފްރޭމްވޯކްގައި ފާހަގަ ކޮށްފައިވާ މަޤާމުގެ ޝަރުތުތަކަށް ކުންފުނިތަކުން އަމަލު ކުރަން ފެށުމުގެ ސަބަބުން މުވައްޒަފުންނަށް އިންސާފުވެރިގޮތަކަށް އަމަލު ކުރެވޭނެކަމަށެވެ. އަދި ކުންފުނީގެ މުވައްޒަފުންނަކީ މަސައްކަތަށް ޤާބިލް މުވައްޒަފުންކަން ކަށަވަރު ކޮށްދޭނެކަމަށް ފިނޭންސް މިނިސްޓަރ ވިދާޅުވިއެވެ.
މި ސަރުކާރުގެ އަމާޒަކީ ކުންފުނިތައް ގިނަކޮށް އަދަދު އިތުރު ކުރުމެއް ނޫން. އުފެއްދުންތެރިކަމާއެކު ރަނގަޅު ޚިދުމަތާއި ދެމެހެއްޓެނިވި އުސޫލުން ހިންގޭނެ ކުންފުނިތަކަށް ޖާގަ ދިނުން. އެގޮތުން މިހާރުވެސް ޖުމްލަ 17 ކުންފުންޏެއް ވާނީ އުވާލުމަށްޓަކާ ލިކުއިޑޭޝަން މަރުހަލާގައި. މި ބަދަލުތަކާއެކު ކުރިމަގުގައި ކުންފުނިތަކުގައި މަސައްކަތް ކުރާ މުވައްޒަފުން ވެގެންދާނީ އެންމެ ޤާބިލް ކަމަށް ފަރުވާތެރި އުފެއްދުންތެރި ނަތީޖާ ނެރޭ ބަޔަކަށް. އާޚިރު ނަތީޖާއަކަށްވާނީ ރައްޔިތުންނަށް މިހާރަށްވުރެވެސް ރަނގަޅު ޚިދުމަތެއް ލިބި މަޝްރޫޢު ތަކުގެ ދުވެލި ހަލުވި ވެގެން ދިޔުން.ފިނޭންސް މިނިސްޓަރ އިބްރާހިމް އަމީރު
ފިނޭންސް މިނިސްޓަރ އަމީރު ވަނީ މި ސަރުކާރަކީ އަބަދުވެސް ކަރަޕްޝަނަށް ނޫނެކޭ ބުނާނެ ސަރުކާރެއްކަމަށް ވިދާޅުވާ ވިދާޅުވުން ތަކުރާރުކުރައްވާފައެވެ. މިކަން ޓްރާންސްޕޭރަންސީ އިންޓަނޭޝަނަލްއިން ކޮންމެ އަހަރަކު އާއްމުކުރާ ކޮރަޕްޝަން ޕާސެޕްޝަން އިންޑެކްސްގައި 2020 ވަނަ އަހަރު 55 ދަރަޖައިގެ ކުރިއެރުމެއް ހޯދުމުން ސާބިތުކޮށްދޭކަމަށް ވިދާޅުވިއެވެ.
