ސަރުކާރު ހިއްސާވާ ކުންފުނިތަކުގެ ޕްރޮކިއުމަންޓް ގައިޑްލައިންގެ ސަބަބުން ކޮރަޕްޝަންނަށް މަގުފަހިވުން ކުޑަކުރެވޭނެ - މިނިސްޓަރ
7 އެޕްރީލު 2021 | ބުދަ 09:15ހިދުމަތްތަކުގެ އަގު ދަށްކުރުމާއި ހިދުމަތްތަކުގެ ފެންވަރު ރަނގަޅު ކުރުމަށްޓަކައި ރަނގަޅު ޕްރޮކިއުމަންޓް ގައިޑްލައިންއެއް އޮތުމަކީ ކޮންމެހެން މުޙިއްމުކަމެއްކަމަށް ވިދާޅުވި
ފިނޭންސް މިނިސްޓަރ އިބްރާހިމް އަމީރު
ސަރުކާރު ހިއްސާވާ ކުންފުނިތަކުގެ ޕްރޮކިއުމަންޓް ގައިޑްލައިންގެ ސަބަބުން ކޮރަޕްޝަންނަށް މަގުފަހިވުން ކުޑަކުރެވޭނެކަމަށް މިނިސްޓަރ އޮފް ފިނޭންސް އިބްރާހިމް އަމީރު ވިދާޅުވެއްޖެއެވެ.
ފިނޭންސް މިނިސްޓަރ މިހެން ވިދާޅުވެފައި މިވަނީ، ފުރަތަމަ ފަހަރަށް ސަރުކާރު ހިއްސާވާ ކުންފުނިތަކުން އަމަލުކުރުމަށްޓަކައި ޕްރޮކިއުމަންޓް ގައިޑްލައިންއާއި އަދި ކުންފުނިތަކަށް އަމާޒުކޮށްގެން ތައްޔާރުކުރި ޖޮބް ކްލެސިފިކޭޝަން ފްރޭމް ވޯކް ނެރުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ. ފިނޭންސް މިނިސްޓަރ އަމީރު ވަނީ، ސަރުކާރު ހިއްސާވާ ކުންފުނިތަކުގެ އަދަދު 30ށްވުރެ މަތީގައި އުޅޭއިރު މިއިން ކޮންމެ ކުންފުންޏަކީވެސް ރައްޔިތުންގެ ސީދާ ބޭނުންތަކާ ގުޅިފައިވާ ކުންފުންޏެއްކަމަށް ވިދާޅުވެފައެވެ. މި ސަބަބައްޓަކައި، ހިދުމަތްތަކުގެ އަގު ދަށްކުރުމާއި ހިދުމަތްތަކުގެ ފެންވަރު ރަނގަޅު ކުރުމަށްޓަކައި ރަނގަޅު ޕްރޮކިއުމަންޓް ގައިޑްލައިންއެއް އޮތުމަކީ ކޮންމެހެން މުޙިއްމުކަމެއްކަމަށްވެސް ވިދާޅުވިއެވެ.
މިހާރު ރު ކުންފުނިތަކުން އެކުންފުންޏެއްގެ އަމިއްލަ ޕްރޮކިއުމަންޓް ޕޮލިސީއަކަށް އަމަލުކުރަމުން އަންނައިރު ޕްރޮކިއުމަންޓް ޕޮލިސީ ތަކުގައި ވަރަށް ބޮޑެތި ތަފާތުތަކެއް ހުރިއިރު، މިގޮތަށް މިކަންތައް އޮތުމުގެ ސަބަބުން ކޮރަޕްޝަނަށް މަގުފަހިވާ ގޮތަށް ކަންތައްތައް ކުރުމަށް ބައެއްފަހަރު ފުރުސަތު އޮތްކަމަށް ވިދާޅުވިއެވެ. އެހެންނަމަވެސް، އަލަށް ލޯންޗްކުރެވުނު ޕްރޮކިއުމަންޓް ގައިޑްލައިންގެ ސަބަބުން ސަރުކާރު ހުރިހާ ކުންފުނިތަކުންވެސް އެންމެ ކުޑަ މިންވަރަށް އަމަލުކުރަންޖެހޭނެ ޕްރޮކިއުމަންޓް އުސޫލްތަކެއް ގާއިމްވެގެންދާނެކަމަށް ވިދާޅުވިއެވެ.
މި ސަރުކާރު ވެރިކަމާ ހަވާލުވެ އެންމެ އިސްކަންދީގެން ކުރިއަށް ގެންދާ މަސައްކަތްތަކަކީ ކުންފުނިތަކުގެ ނިޒާމުތައް ހަރުދަނާ ކުރުންކަން ފާހަގަކުރައްވާ މިނިސްޓަރ އަމީރު ވަނީ، ޖޮބް ކްލެސިފިކޭޝަން ފްރޭމް ވޯކްގެ ސަބަބުން ކުންފުނިތަކުގެ މުވައްޒަފުންނަށް ހެދިފައިވާ އުސޫލް އިތުރަށް ހަރުދަނާވެ، ޚިދުމަތް ފުރިހަމަ ގޮތުގައި ދިނުމަށް ބާރު އެޅިގެންދާނެކަމަށް ވިދާޅުވެފައެވެ. އެގޮތުން މުވައްޒަފުން ނެގުމުގައާއި މުވައްޒަފުންނަށް ކުރިއެރުން ދިނުމުގައި މި ފްރޭމްވޯކްގައި ފާހަގަ ކޮށްފައިވާ މަޤާމުގެ ޝަރުތުތަކަށް ކުންފުނިތަކުން އަމަލު ކުރަން ފެށުމުގެ ސަބަބުން މުވައްޒަފުންނަށް އިންސާފުވެރިގޮތަކަށް އަމަލު ކުރެވޭނެކަމަށެވެ. އަދި ކުންފުނީގެ މުވައްޒަފުންނަކީ މަސައްކަތަށް ޤާބިލް މުވައްޒަފުންކަން ކަށަވަރު ކޮށްދޭނެކަމަށް ފިނޭންސް މިނިސްޓަރ ވިދާޅުވިއެވެ.
ފިނޭންސް މިނިސްޓަރ އަމީރު ވަނީ މި ސަރުކާރަކީ އަބަދުވެސް ކަރަޕްޝަނަށް ނޫނެކޭ ބުނާނެ ސަރުކާރެއްކަމަށް ވިދާޅުވާ ވިދާޅުވުން ތަކުރާރުކުރައްވާފައެވެ. މިކަން ޓްރާންސްޕޭރަންސީ އިންޓަނޭޝަނަލްއިން ކޮންމެ އަހަރަކު އާއްމުކުރާ ކޮރަޕްޝަން ޕާސެޕްޝަން އިންޑެކްސްގައި 2020 ވަނަ އަހަރު 55 ދަރަޖައިގެ ކުރިއެރުމެއް ހޯދުމުން ސާބިތުކޮށްދޭކަމަށް ވިދާޅުވިއެވެ.
