ރަމަޟާން މަހާއި ދިމާކޮށް މޯލްޑިވްސް ޕޯޓްސް ލިމިޓެޑްގެ އޮޕަރޭޝަންތަކަށް ބަދަލުތަކެއް ގެނަސްފައިވާ ކަމަށާއި، ރަމަޟާން މަހު ވިޔަފާރި ބަނދަރުން މުދާ ބޭރުކުރުމުގައި ދައްޗެއް ކުރިމަތިނުވާނެ ކަމުގެ ޔަގީންކަން އަރުވާކަމަށް އެމްޕީއެލްގެ ޗީފް އެގްޒެކެޓިވް އޮފިސަރ ޝާހިދު އަލީ ވިދާޅުވެއްޖެއެވެ.

އަންގާރަ ދުވަހު އެމްޕީއެލްގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޝާހިދު ވިދާޅުވީ އެހެން އަހަރުތަކާއި ޚިލާފަށް މިއަހަރުގެ މިހާ ހިސާބަށްވެސް ގިނަ އަދަދަކަށް މުދާ އެތެރެކުރާކަން ފާހަގަވެފައިވާ ކަމަށެވެ. އަދި ކުރިޔަށް މިއޮތް ފަސް ދުވަހާއި ރަމަޟާން މަހުގެ ކުރީ ކޮޅު ގިނަ އަދަދަކަށް މުދާ އަންނާނެކަމަށް ލަފާ ކުރެވޭ ކަމަށާއި، އެހެންކަމުން މުދާ ލަސްތަކެއް ނުވެ ވިޔަފާރި ބަނދަރުން ބޭރު ކުރުމުގެ ގޮތުން މީގެ ދެމަހެއްހާ ދުވަސް ކުރިން ތައްޔާރީތައްވާން ފަށާފައިވާ ކަމަށް ޝާހިދު ވިދާޅުވިއެވެ.

ޝާހިދު ވިދާޅުވީ ރަމަޟާން މަހަށް ތައްޔާރުވުމުގެ ގޮތުން އެ ކުންފުންޏައް އިތުރު މުވައްޒަފުން ނަގާފައިވާ ކަމަށާއި، ޚާއްސަކޮށް މުދާ ކްލިއަރ ކުރުމަށް އިތުރު މުވައްޒަފުންތަކެއް ނަގާފައިވާ ކަމަށެވެ.

މީގެ އިތުރުން ކާބޯތަކެތި ހިފައިގެން އަންނަ ކާގޯ ބޯޓުތަކުން ބަންދު ދުވަސްކަމުގައިވީ ނަމަވެސް މުދާ ހުސްކުރުމުގެ މަސައްކަތް އެހެން މަސްތަކެކޭ އެއްފަދައިން ކުރަމުން ގެންދާނެ ކަމަށް ޝާހިދު ވަނީ ވިދާޅުވެފައެވެ.

އެމްޕީއެލްގެ ޚިދުމަތްތައް އެހެން މަސްތަކެކޭ އެއްފަދައިން ދިނުމުގެ ގޮތުން ރަމަޟާން މަހުވެސް އެމްޕީއެލްގެ މުވައްޒަފުން ބޯޓުތައް އައުމާއިއެކު ހަރަކާތްތެރިވާނެ ކަމަށާއި، ވިޔަފާރި ބަނދަރަށް ބާރުބޮޑުވާނަމަ ދަންވަރު ޑިއުޓީއަށްވެސް މުވައްޒަފުން ނެރުމަށް ނިންމާފައިވާ ކަމަށް ޝާހިދު ވިދާޅުވިއެވެ.

ރޯދަ މަހު އެމްޕީއެލުގެ މަސައްކަތުގެ ރަސްމީ ގަޑިތައް ކަނޑައަޅާފައިވަނީ ހެނދުނު 9:00ން ހަވީރު 4:00ށް ރޭގަނޑު 9:00ން 10:30 އަށެވެ. ނަމަވެސް އަވަހަށް ހަލާކުވާ ޒާތުގެ މުދާ ކްލިއާ ކުރަން ޖެހިއްޖެ ހާލަތެއްގައި ބަންދު ދުވަސްތަކުގައި ވެސް އޮޕަރޭޝަން ކުރިއަށް ގެންދާނެ ކަމަށް ޝާހިދު ވިދާޅުވިއެވެ.

މީގެ އިތުރުން އެމްޕީއެލުން ވަނީ މުދާ އަވަހަށް ކްލިއާ ކުރުމަށް ހުޅުމާލެ ޕޯޓަށް މުދާ ގެންދިއުމުގައިވެސް ވިޔަފާރިވެރިންނަށް ލުއިތަކެއް ދީފައެވެ. އެގޮތުން ހުޅުމާލެއަށް މުދާ ގެންދާއަގު ކުޑަ ކޮށްފައިވާ ކަމަށް އެމްޕީއެލުން ބުނެއެވެ.