އއ. މާޅޮހު ބަނދަރު ތަރައްގީ ކުރުމުގެ އަމަލީ މަސައްކަތް ފަށައިފިއެވެ.
ބަނދަރު ތަރައްގީ ކުރުމުގެ އަމަލީ މަސައްކަތް ފެށުމަށް ހޯމަ ދުވަހު ބޭއްވި ރަސްމިއްޔާތުގައި ވާހަކަ ދައްކަވަމުން އެމްޓީސީސީގެ ސީއީއޯ އާދަމް އާޒިމް ވިދާޅުވީ މަސައްކަތް ކުރިއަށް ދަނީ ރައީސް ބޭނުންފުޅުވާ ގޮތަށް ކަމަށާއި ހުވެފެނުން ތަރައްގީ ދެކެން ބޭނުން ނުވާކަމަށާއި މި ސަރުކާރުން ތަރައްގީ ދެކޭނީ އަސްލަށް ކަމަށެވެ. އެމްޓީސީސީގެ އަމާޒަކީ އަންނަ އަހަރުގެ އޭޕްރިލް މަހުގެ ފުރަތަމަ ހަފުތާގައި މާޅޮހު ބަނދަރުގެ މަސައްކަތް ނިންމާލުން ކަމަށް ވެސް ވިދާޅުވިއެވެ.
އެމްޓީސީސީން މަސައްކަތް ކުރަނީ ބާރު ސްޕީޑުގައި ކަމަށާއި ކޮންމެ ރަށަކަށް ލިބޭ ތަރައްގީ އަކީ ގައުމަށް ލިބޭ ތަރައްގީ ކަމަށް އާޒިމް ވިދާޅުވިއެވެ. ސަރުކާރަށް ތާއީދު ނުކުރާ މީހުން ރަށްރަށުގެ ސިޔާސީ ގޮނޑިގޮނޑީގައި ތިބޭތީ އެ މީހުންނާއެކު މަސައްކަތް ކުރަން ދަތި ކަމަށް ވެސް އާޒިމް ވިދާޅުވިއެވެ.
މި ރަސްމިއްޔާތުގައި އާޒިމް އިތުރަށް ވިދާޅުވީ ކުރިން ހިންގަނީއަހަރެއް ގެ ތެރޭގައި 22 މަޝްރޫއެއް ކަމަށާއި އެހެންނަމަވެސް މިހާރު 50ށް ވުރެ ގިނަ މަޝްރުއޫ އަހަރެއްގެ މައްޗަށް ކުރިއަށް ގެންދާ ކަމަށެވެ. އެމްޓީސީސީން ރަށްރަށުގައި މަޝްރޫއުތައް ކުރިއަށް ގެންދަނީ އިންތިޚާބާ ދިމާކޮށް ކަޑަޖަހަން ނޫން ކަމަށާއި މިއީ ރައީސް ރައްޔިތުންނަށްޓަކައި ވެފައިވާ ވައުދުތައް ފުއްދުމަށް ކުރާ މަސައްކަތެއް ކަމަށް ވިދާޅުވިއެވެ. އަދި ނުބައި ތުހުތަމުތައް އަޅުވައި ވާހަކަތައް ނުފެތެރުމަށް ވެސް އާޒިމް ގޮވާލެއްވިއެވެ.
މި މަޝްރޫއުގައި 24،335 ކިއުބިކް މީޓަރު ކޮނުމާއި 394 މީޓަރު ސަރަހަދެއްގައި އެއްގަމު ތޮށިލުމާއި 407 މީޓަރު ސަރަހައްދެއްގެ ބޭރުތޮށިލުމާއި 56 މީޓަރުގެ ގްރޮއިންސް ޖެހުމާއި 100 މީޓަރުގެ ރިވެޓްމަންޓް ޖެހުމާއި 1970 އަކަމީޓަރުގެ ސަރަހައްދެއްގައި ޕޭވްމަންޓް ހެދުމާއި ބަނދަރު ސަރަހައްދުގައި ބައްތި ހަރުކުރުން ހިމެނޭ ކަމަށް އެމްޓީސީސީން ބުންޏެވެ.
މި މަޝްރޫއު އެމްޓީސީސީއާ ހަވާލުކޮށްފައިވަނީ މިދިޔަ އަހަރުގެ ނޮވެމްބަރު މަހުގެ 10 ވަނަ ދުވަހުއެވެ. މަޝްރޫއުގެ އަގަކީ 56.97 މިލިއަން ރުފިޔާގެ އެވެ.
