އަންނަ އާދީއްތަ ދުވަހާއި ހޯމަ ދުވަސް ސަރުކާރު ބަންދު
4 އެޕްރީލު 2021 | އާދީއްތަ 14:09ރަމަޟާން މަހުގެ ފުރަތަމަ ދުވަސްވެސް ބަންދުކުރަން ވަނީ ނިންމަވާފައި
ރައީސުލްޖުމްހޫރިއްޔާގެ އޮފީސް - އާދީއްތަ ދުވަހާއި ހޯމަ ދުވަސް ސަރުކާރު ބަންދުވާނެ
އަންނަ ހަފުތާގެ އާދީއްތަ ދުވަހާއި ހޯމަ ދުވަހަކީ ސަރުކާރު ބަންދު ދެ ދުވަސްކަމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ހަމަޖައްސަވައިފިއެވެ.
ރައީސް އޮފީހުން ބުނީ މި ހިނގާ އެޕްރީލް މަހުގެ 11 އަދި 12 ވަނަ ދުވަސް ސަރުކާރު ބަންދު ދެ ދުވަސްކަމުގައި ރައީސް ޞާލިޙް ހަމަޖައްސަވާފައިވާ ކަމަށެވެ.
އަދި މި ނިންމުން ނިންމާފައިވަނީ އެޕްރީލް 10 ވާ ހޮނިހިރު ދުވަހު ލޯކަލް ކައުންސިލްތަކުގެ އިންތިޚާބުގެ ވޯޓުލުން ބޭއްވުމަށް ހަމަޖެހިފައިވުމާއެކު، އިންތިޚާބާ ގުޅޭ އެކިއެކި މަސައްކަތްތަކުގައި ސަރުކާރުގެ ގިނަ އަދަދެއްގެ މުވައްޒަފުން ހަރަކާތްތެރިވާނެތީ ކަމަށް ރައީސް އޮފީހުން ވަނީ ބުނެފައެވެ.
މީގެ އިތުރުން ކަލަންޑަރުގައިވާ ގޮތަށް 1442 ވަނަ އަހަރުގެ ރަމަޟާން މަހުގެ ފުރަތަމަ ދުވަސް، އޭޕްރީލް މަހުގެ 13 ވާ އަންގާރަ ދުވަހަށް ވެއްޖެނަމަ، އެ ދުވަސްވެސް ސަރުކާރު ބަންދު ދުވަހެއްގެ ގޮތުގައި ހަމަޖެއްސުމަށް ރައީސް ޞާލިޙް ނިންމަވާފައިވާ ކަމަށް ރައީސް އޮފީހުން ބުނެއެވެ.
