ހުޅުމާލެ ތަރައްގީކޮށް ޚިދުމަތުގެ ފެންވަރު ރަނގަޅު ކުރުމަށް ހައުސިން ޑިވަލޮޕްމެންޓް ކޯޕްރޭޝަން (އެޗްޑީސީ)ން ގިނަ މަސައްކަތްތަކެއް ކޮށްފައިވާ ކަމަށް އެކޯޕްރޭޝަނުން ބުނެފިއެވެ.

އެޗްޑީސީ ޚިދުމަތުގައި 20 އަހަރު ފުރުމާއި ގުޅިގެން އެކޯޕްރޭޝަނުން ބުނީ ހުޅުމާލެ މާލޭގެ ވަކި އަވަށެއްގެ ގޮތުގައި ތަރައްޤީކުރުމަށް ޕްލޭންއެއް އެކުލަވާލައި، އެކަން ވިލަރެސްކޮށް ހިންގުމަށް ވަކި ޔުނިޓެއް އުފައްދާ މިއަދާ ހަމައަށް ވަނީ ގިނަ މަސައްކަތްތަކެއް ކުރެވިފައިވާ ކަމަށެވެ. ސަރުކާރު ހިއްސާވާ ކުންފުންޏަކަށް ބަދަލުކޮށް ހުޅުމާލޭގައި ދިރިއުޅޭ ރައްޔިތުންނަށާއި ހުޅުމާލެ އެކި ބޭނުންތަކަށް ޒިޔާރަތްކުރާ ފަރާތްތަކަށް ގިނަ ޙިދުމަތްތަކެއް ފޯރުކޮށްދިނުމަށް ވޭތުވެދިޔަ 20 އަހަރު އެކި ފެންވަރުގައި، އުމްރާނީ ގޮތުންނާއި އިޖްތިމާއީ ގޮތުން ގިނަ މަސައްކަތަކެއް ކުރެވިފައިވާ ކަމަށް އެޗްޑީސީން ބުނެއެވެ.

ޚިދުމަތުގެ 20 އަހަރު ފާހަގަކުރުމަށް ބުރާސްފަތި ދުވަހު ވޭޗުއަލްކޮށް ބޭއްވުނު ރަސްމިއްޔާތުގައި އެޗްޑީސީގައި ފެށުނީންސުރެއް މިއަދާއި ހަމައަށް 20 އަހަރު ޚިދުމަތް ކޮށްދީފައިވާ މުވައްޒަފުންގެ އަގު ވަޒަންކޮށް ވަނީ ޚާއްސަ ހަނދާނީ ފިލައެއް އަރުވާފައިވެއެވެ. މިއެވޯޑް ޖުމްލަ 9 ބޭފުޅަކަށް ހަވާލުކުރެވިފައިވާ ކަމަށް އެޗްޑީސީން ބުނެއެވެ. މީގެ އިތުރުން މިކުންފުނީގެ 20 އަހަރުގެ ރަން ތާރީޙުގައި އެކި ގޮތްގޮތުން އަގު ނުކުރެވޭ ވަރުގެ ގިނަ ޚިދުމަތްތަކެއް ކޮށްދީފައިވާ 4 ބޭފުޅަކަށް ވަނީ ސްޕެޝަލް ރެކޮގްނިޒިޝަން އެވޯޑެއް ދީފައެވެ. އެގޮތުން އެޗް.ޑީ.ޔޫގެ ނަމުގައި އެކޯޕަރޭޝަންގެ މަސައްކަތްތައް ހިންގަމުން ދިޔަ ދުވަސްތަކުގައި ޑިރެކްޓަރ ޖެނެރަލްގެ މަގާމު އަދާ ކުރެއްވި މަޢުރޫފް ޖަމީލް، އެޗްޑީސީގެ ފުރަތަމަ މެނޭޖިންގ ޑިރެކްޓަރ ކަމުގެ މަގާމު އަދާ ކުރެއްވި މަހްޖޫބް ޝުޖާއު، އެޗްޑީސީގެ ޑެޕިއުޓީ ޑިރެކްޓަރއެއްގެ މަގާމުގައި ހުންނެވި ފަޔާޒް މަންސޫރު އާއި މެނޭޖިންގ ޑިރެކްޓަރގެ މަގާމު އަދާ ކުރައްވަމުންގެންދަވާ ސުހައިލް އަހްމަދް ހިމެނެއެވެ.

އެޗްޑީސީއަށް 20 އަހަރު ފުރިގެން ދިއައިރު އެކޯޕްރޭޝަންއަށް ވަނީ އެތައް ބަދަލެއް އައިސްފައެވެ. ހުޅުމާލޭގެ އިތުރުން ގުޅީފަޅު އަދި ތިލަފުށި ތަރައްގީކުރުން އިހްތިސާސްގައި ހިމެނި މަސައްކަތްތައް ފުޅާކުރެވިގެން ގޮސްފައިވާކަން އެޗްޑީސީން ފާހަގަކުރެއެވެ.